1 जो मात यहोवा अनतान, अदरी केळी: येदकु पहाळीगोळ मुंद वादविवाद माळ, अदिक टिलागोळ भी नीन केळ सकुल. 2 हे पहाळीगोळा, अदिक हे धरती इन अटल पायवागोळा, यहोवा अन वादविवाद केळी, यतिकी यहोवा अन तान प्रजा अन सांगुळ शिकायत आद, अदिक आव इस्त्राएल से वादविवाद माळतान.

3 "हे नान प्रजा, ना नीन येन बिगळुसीन? याता मात देल ना नीमी दुख कोटीन? 4 ना रा नीनी मिस्त्र द्याश दा टु तेगुकु तंदीन, अदिक दासत्व अन मान्ना दा टु नीनी बिळ्सकु तंदीन; अदिक नीन अगुवाई माळली मूसा, हारून अदिक मरियम इक कळु बुट्टीन. 5 हे नान प्रजा, याद माळ, कि मोआब इन राजा बालाक नीन खिलाप यातोद युक्ति माळदुन, अदिक बोर उन पार बिलाम आऊक येन सम्मति कोट्टुन, अदिक शित्तीम टु गिलगाल ताका अन मातगोळ याद माळ, यदुर देल नी यहोवा अन न्याय इन क्याल्सा सम्स सक्या."

6 "ना येन हुडुकु यहोवा अन हात्ती होगाईन, अदिक म्याकुच ईरावाळा परमेश्वर उन मुंद बांगाईन? येन ना होमबलि इन साटी ऊंद ऊंद साल इन पाड्डगोळ हुडुकु आऊन हात्ती होगाईन? 7 येन यहोवा हजार म्यांढ्ढागोळ दा टु, या जैतुन याण्णा अन लाखों गांगागोळ देल खुश आदान? येन ना तान अपराध इन प्रायश्चित दा तान पयला पार उक या तान पाप इन बदला दा तान हाळ्द यारीकारा कोळाईन?" 8 हे मंळसा, आव नीनी हेळ बुटान कि वळ्लीद येन आद; अदिक यहोवा नीन से ईदरी बिटकु मात्त येन चाहासतान, कि नी न्याय देल क्याल्सा माळ, अदिक कृपा देल प्यार ईट, अदिक तान परमेश्वर उन सांगुळ नम्रता देल नळु?

9 यहोवा ई नगर इक कारेत्यान, अदिक सम्पूर्ण बुद्धि नीन हेसुर इन अंज्क मानसोद हुन: राजदण्ड इन, अदिक जो अदरी कोळावाळा हुन आऊन मात केळी! 10 येन ईगासताका दुष्ट उन मान्या दुष्टता देल सिक्द धन अदिक स्यांळ्द एपा घृणित हैलेच? 11 येन ना कपट इन तराजु अदिक घटबढ़ इन बटखरा अन झ्वारा हुळकु पवित्र ठहरूस सकतीन? 12 ईलेर पैस्यावाळेर लॉकुर उपद्रव इन क्याल्सा नोळतोगतार; अदिक ईलेर सप्पा ईरावाळेर ख्वाटा माताळतार अदिक आंदुर बाय दा टु छल इन मातगोळ होळताव. 13 ई कारण ना नीनी बडुत बडुत अच घायल माळतीन, अदिक नीन पापगोळ कारण नीनी उजाळ्स बुळतीन. 14 नी तिंद्या, लेकीन तृप्त आगतीदील, नीन व्हाट्टा होततेला अच ईत्तीत; अदिक नी तान संपत्ति हुडुकु नळद्या, लेकीन ऊळ्स सकतीदील, अदिक जो येनारा नी ऊळ्स भी कोंड, अदरी ना तलवार नळ्सकु लुटुस बुळाईन. 15 नी बोऊस्या, लेकीन कोय सकतीदील; नी जैतुन इन याण्णा तेगद्या, लेकीन हच सकतीदील; अदिक अंगुर अच्या, लेकीन अंगुर इन रास्सा कुडु सकतीदील. 16 यतिकी आंदुर ओम्री इन विधीगोळ मा, अदिक अहाब उन घराना अन सप्पा क्याल्सागोळ मा नळुतार; अदिक नीव आंदुर युक्ति इन अनुसार नळुतीर; इदुसाटी ना नीनी ऊजाळ्स बुळाईन, अदिक ई नगर इन ईरावाळेर मा थापळ्या मुरसुसाईन, अदिक नीव नान प्रजा अन नामधराई सयन माळीर.