Mateus 21

यरूशलेम दा विजय प्रवेश

1 याग आंदुर यरूशलेम इन हात्‍ती पोहचुसदुर अदिक जैतून पहाळ मा बैतफगे नगर इन हात्‍ती बंदुर, रा यीशु येढ्ढ चेलागोळी ईद अनकु कळुदुन, 2 "मुंदळोद ऊर दा होगी. अल होगतेला ऊंद गधा कटकु, अदिक अदुर सांगुळ पाड्डा नीमी सिक्‍कीत. अवरी खोल्सकु नान हात्‍ती तरी. 3 अगर नीम से यावारा येनारा अनुल, रा अनेतीर कि प्रभु अक ईऊर्द जरवत आद, आग आव तुरन्त अवरी कळु बुट्टान." 4 ईद इदुरसाटी आत कि जो वचन भविष्यवक्ता अन्द द्वारा अनकु आगीत, अद पुरा आगुल:

5 "सिय्योन इन पोर इन से अनी,

‘नोळ, नीन राजा नीन हात्‍ती बरेत्यान;

आव नम्र आन, अदिक गधा मा कुर्तकु आन;

मतलब गधा इन पाड्डा मा.’"✝२१:५ जकर्याह ९:९

6 चेलागोळ होगकु, ह्यांग यीशु आंदरी अंदिदुन, हांग अच माळदुर. 7 अदिक गधा अदिक अदुर्द पाड्डा अक तनकु, अऊर मा तान कपळा हाकदुर, अदिक आव आ पाड्डा मा कुरतुन. 8 आग हापाळ सा लॉकुर तान कपळा हादी मा हासदुर, अदिक दुसरा लॉकुर मार्रगोळ्द डगाली कडुकु हादी मा हासदुर. 9 जो भीळ मुंद-मुंद होगतोगोद अदिक हिंद-हिंद बरतोगोद, कारू-कारूकु अनतोगोर, "दाऊद उन औलाद उक स्तुति, धन्य आन आव जो प्रभु उन हेसुर देल बरतान, दाऊद उन औलाद उन स्तुति आगुल."

10 याग यीशु यरूशलेम दा प्रवेश माळदुन, रा पुरा नगर दा हलचल मचुसेत, अदिक लॉकुर अनली कुरतुर, "ईव याव हुन?"

11 लॉकुर अंदुर, "ईव गलील इन नासरत उन भविष्यवक्ता यीशु हुन."