योना अन आग्या मानसोद
1 प्रभु उन वचन योना अक दुसरा घन सिक्त: 2 "‘यदकु आ नीनवे नगर इक होग. अदिक जो बातणी ना नीन इक कोळाईन, नी आऊक केळसेत.’ 3 योना येद्दुन. आव यहोवा अन आदेश इन अनुसार नीनवे नगर इक होदुन. नीनवे ऊंद महानगर ईरोद. नगर इन ऊंद क्वाना टु दुसरा क्वाना ताका होगली मुर दिन हत्तोगोव. 4 योना नगर इन यात्रा माळोद शुरू माळदुन. आव ऊंद दिन इन दुरी तय माळदुन. आव ईद प्रचार माळदुन, ‘सिर्फ चालीस दिन मिक्कु आव, अदिक आग नीनवे नगर इन विनाश आगेदीत.’"
5 नीनवे अन्द ईरावाळेर परमेश्वर मा विश्वास माळदुर. आंदुर दुख माळोर साटी उपवास इन घोषणा माळदुर. स्यांण-धोड्डेर सप्पा ईरावाळेर दुख इन फळक्या हाकुल3:5 मत्ती 12:41, लूका 11:32.
6 ईद खबर नीनवे अन्द राजा अक सिक्त. आव आटोटीका तान सिंहासन टु येद्दुन. आव तान राजसी फळक्या ईळ्सदुन, अदिक दुख इन फळक्या हाकदुन. आग आव राख इन ढेर मा कुरतोदुन. 7 आव पुरा नीनवे नगर दा ईद राज आग्या अन घोषणा माळदुन: "राजा अदिक मंत्री-मंडल इन दी टु ईद आदेश आद: मंळसा अदिक जनावर, म्यांडा अदिक मर्री अदिक गोसी अदिक वस्ता तान बाय दा अनाज इन दाना भी ईटबाळुल. यारू भोजन माळबाळुल अदिक नीर कुडुबाळुल. 8 हर ऊंद मंळसा अदिक पशु तान मय मा शोक इन कपळा हाकुल. मंळसा याद्दा बडु बडुकु परमेश्वर उन दोहाई कोट्टार. हर ऊंद मंळसा तान दुराचरण इक त्याग्स बुळुल, अदिक दुष्ट हादी इक बिट्ट बुळुल. 9 आग सकतद, कि शायद परमेश्वर तान निर्णय इक बदलुस बुळुल अदिक तान भळकुस्द सिट्ट शांत माळुल अदिक नाव नष्ट आगदुर देल ऊळदेव?"
10 याग परमेश्वर ईद नोळदुन कि नीनवे अन्द निवासीगोळ दुख माळदुर, अदिक आंदुर तान दुष्कर्म बिट्ट बुट्टुर, आग आव आंदुर मा विपत्ति हाक्कोद विचार त्याग्स बुट्टुन. परमेश्वर अंदीदुन कि आव आंदुर मा विपत्ति हाक्यान. लेकीन आव हिंग माळीदिल.