1 योना मेन इन व्हाट्टा दा तान परमेश्वर यहोवा से प्रार्थना माळदुर.

2 आव अंदुन: "हे यहोवा, ना तान संकट दा नीन इक कारदीन,

अदिक नी नान इक उत्तर कोट्ट. ना अधोलोक इन खाई दा

नीन दुहाई कोट्टीन,

अदिक नी बिना संकोच नान पुकार केळ्द.

3 नी नानी ल्यालमा

समुद्र अन गहराई दा हाक्क कोंडीद;

ना धारागोळ बीच दा बिदकु ईरीन.

नीन भळकुस्द लयरगोळ अदिक तरंगगोळ

नान म्याकुच टु वाहुसेदव.

4 आग ना ईद सोचदीन:

ना नीन मुंदु टु तेगुकु आगेगीन.

ईग ना ह्यांग नीन पवित्र मंदिर इन

दर्शन माळ सकाईन?

5 ना नीर देल ईल ताका घेर्सकु ईरीन

कि नान जीव होळतोगोद;

गयरा सागर नान नाकु दी ईरोद,

अदिक नान ताल्ला दा काई गुंळ्सकु ईरोद.

6 ना पहाळगोळ्द जळी ताका पोहचुसेगीदीन.

ना हमेशा साटी जमीन दा बन्द आगेगीदीन;

तरी भी हे नान परमेश्वर यहोवा,

नी नान जीव इक गड्डा दा टु नेगद्या.

7 याग ना बेहोस आगावाळा अच ईरीन,

आग ना यहोवा अक याद माळदीन;

अदिक नान प्रार्थना नीन हात्ती उलटा

नीन पवित्र मंदिर दा पोहचुसेत.

8 जो लॉकुर ध्वाका अन बेकार वस्तुगोळ मा मन हचतार,

आंदुर तान अनुग्रह माळावाळा परमेश्वर उक बिट बुळतार.

9 लेकीन ना धन्यवाद इन हाळ हाळकु

नीनी बलिदान येर्साईन;

जो मन्नत ना मानसीन,

अदरी पुरा माळाईन.

उद्धार यहोवा देल अच आगतद!"

10 आग यहोवा मेन इक आग्या कोट्टुन, अदिक मेन योना अक समुद्र किनारा मा व्हार्या तेग्त बुळ्त.