Mateus 26

यीशु उन खिलाप साजीश

1 याग यीशु इव सप्पा मात अंद बुट्टुन रा तान चेलागोळ से अनली कुरतुन, 2 "नीव जान्सतीर कि येढ्ढ दिन इन बाद्दा फसह*26:2 फसह याग यहूदी लॉकुर मिस्त्र द्याश टु 430 वर्ष इन गुलामी टु आजाद आदुर आग आंदुर याद माळोर साटी ई हाब्‍ब इक मान्सतार. अन्द हाब्ब आद, अदिक मंळसा अन्द पार क्रूस मा येरसोर साटी हुळसुसकु आदान."✝२६:२ निर्गमन १२:१-२७

3 आग प्रधान याजक अदिक प्रजा अन्द पुरनिए कैफा हेसुर इन महायाजक उन भवन दा जमा आदुर, 4 अदिक आपस दा विचार माळली कुरतुर कि यीशु उक गुप्त तरीका देल हुळकु कोंद बुटेव. 5 लेकीन आंदुर अनतोगोर, "हाब्बा अन समय दा ईला, ईलारा हिंग आगबाळुल कि लॉकुर दा दंगा फसाद आगेगुल."

बैतनिय्याह दा यीशु उन अभिषेक

6 याग यीशु बैतनिय्याह दा शमौन कोढ़ी इन मान्या ईरोन, 7 ✝२६:७ लूका ७:३७,३८रा ऊंद आर्त संगमरमर इन बाटुल दा बार्र ईत्‍तर हुळकु यीशु उन हात्‍ती बंदुर, अदिक याग आव ऊमोर साटी कुरतीदुन रा आऊन ताल्ला मा ऊलटुसदुर. 8 ईद नोळकु आऊन चेलागोळी सिट्ट बत्‍त अदिक आंदुर अनली कुरतुर, "ई ईत्‍तर येती बरबाद माळकु आग्याद? 9 इदरी रा वळ्लीद दाम दा मारकु कंगालगोळ दा वाटस्कु आग सकोद."

10 ईद जान्सकु यीशु आंदुर से अंदुन, "आ आर्त इक येती सतुसतीर? आक नान साटी भलाई इन क्याल्सा माळ्यार. 11 कंगाल रा नीम सांगुळ हमेशा ईरतार, लेकीन ना नीम सांगुळ हमेशा ईर सकालीन. 12 आक नान मय मा जो ईत्‍तर हाक्यार, अद नान सोत्‍तुर बाद्दा नळ्सकु आगोद तयारी हुन. 13 ना नीम से खरा माताळतीन, कि सप्पा दुनिया दा येल्यारा भी ईद खुशखबरी प्रचार माळकु आदीत, अल आकिन ईद क्याल्सा अन्द वर्णन भी आकिन याद दा माळकु आदीत."

यहूदा इस्करियोती इन विश्वासघात

14 आग यहूदा इस्करियोती, जो हन्नेळ चेलागोळ दा टु ऊंद ईरोन, प्रधान याजकगोळ्द हात्‍ती होदुन, 15 अदिक आव अंदुन, "अगर ना आऊक नीम कय दा हुळसुस कोळाईन रा नानी येन कोट्टीर?" आंदुर आऊक तीस चाँदी नव सिक्‍कागोळ आळुकु कोट बुटुर. 16 अदिक आव अदा समय टु आऊक हुळसुसोद सही मवका ढुंढ्सली कुरतुन.

चेलागोळ्द सांगुळ फसह हाब्ब इन आखरी भोज

17 अखमीरी रोट्टी इन हाब्बा इन पयला दिन, चेलागोळ यीशु उन हात्‍ती बंदकु केळली कुरतुर, "नी येन चाहासत्या कि नाव नींद साटी फसह तिनोद तयारी माळेव?"

18 यीशु अंदुन, "नगर दा अमुक मंळसा अन्द हात्‍ती होगकु आऊन से अनी, ‘गुरु अनेत्यान कि नांद समय हात्‍ती आद. ना तान चेलागोळ्द सांगुळ नीन मान्या फसह हाब्ब मानसाईन.’"

19 इदुरसाटी चेलागोळ यीशु उन आग्या स्वीकार माळदुर अदिक फसह तयार माळदुर.

20 याग द्याव आत रा आव हन्नेळ चेलागोळ सांगुळ ऊमली कुरतीदुन. 21 याग आंदुर तीनोर रा यीशु अंदुन, "ना नीम से खरा अनतीन कि नीम दा टु ऊंद नानी हुळसुस्यान."

22 इदुर मा आंदुर च्याच उदास आदुर, अदिक हर ऊंद चेला यीशु से केळली कुरतुन, "हे गुरु, येन आव ना हुईन?"

23 यीशु उत्‍तर कोट्टुन, "आव जो नान सांगुळ तंळग्या दा ऊमतान, आवा नानी हुळसुसकु सोपस्यान. 24 ना मंळसा अन्द पार ह्यांग नान बारा दा शास्त्र दा लिख्सकु आद, अद आदीत अच; लेकीन आ मंळसा अन्द साटी शोक आद याऊन द्वारा मंळसा अन पार हुळसुसकु आदान: अगर आ मंळसा अन्द जनम अच ईला आगाईत, रा आऊन साटी भला आगाईत."✝२६:२४ भजन संहिता २२:७-८; यशायाह ५३:९

25 आग यीशु उक हुळसुसकु सौप्सावाळा यहूदा अंदुन, "हे गुरु, येन आव ना हुईन?"

यीशु आऊन से अंदुन, "नी रा अंदबुट."

प्रभु भोज

26 "याग आंदुर ऊमोर रा यीशु रोट्टी ताकोंडुन, अदिक आशीष बेळकु मुरदुन, अदिक चेलागोळी कोटकु अंदुन, हुडी, तिनी; ईद नांद मय हुन."

27 बाक यीशु कटोरा हुळकु धन्यवाद माळदुन, अदिक आंदरी कोटकु अंदुन, "नीव सप्पा लॉकुर इदुर दा टु कुडी, 28 यतिकी ईद वाचा अन्द नान अद रक्ता हुन, जो सप्पा लॉकुर पापगोळ माफ अन्द साटी वाहुसकु आगतद.