यहेजकेल 8

परमेश्वर उन बारा दा यहेजकेल उन दुसरा दर्शन

यरूशलेम दा मूर्तिपूजा

1 बाक सहाव्वा वर्ष इन सहाव्वा तींगुळ इन पाचवा दिन इक याग ना तान मान्या कुर्तकु ईरीन, अदिक यहूदीगोळोर स्याणागोळ नान मुंद कुर्तकु ईरोर, आग प्रभु यहोवा अन शक्ती अल्या नान मा प्रगट आत. 2 आग ना नोळदीन कि बेक्की इन घाई ऊंद रूप कांळ्सतद; आऊन नेळु उन ल्यालमा बेक्की आद, अदिक आऊन नेळु उन म्याकुच इन दी चमकुस्द पीतल इन झलक घाई येनारा आद. 3 आव कय घाई येनारा वाळुसकु नान ताल्ला अन चुट्टीगोळ हुळदुन; आग आत्मा नानी धरती अदिक आकाश इन बीच दा नेगुकु परमेश्वर उन तोर्सद दर्शनगोळ दा यरूशलेम इन मंदिर इन बुळ्क, आंगुळ इन आ फाटक इन हाती पोहचुस बुट्टुन यदुर बाय उत्तर दी आद; अदिक यदुर दा आ जलन पैदा माळवाळा प्रतिमा अन जागा ईरोद यदुर कारण द्वेश उपजुसतद.

4 बाल अल इस्त्राएल इन परमेश्वर उन तेज हांग अच ईरोद ह्यांग ना मैदान दा नोळीदीन. 5 आव नान से अंदुन, "हे मंळसा अन सन्तान, तान कण्ण उत्तर दी नेगुकु नोळ." ना तान कण्ण उत्तर दी नेगुकु नोळदीन कि वेदी इन फाटक इन उत्तर दी अदुर प्रवेश जागा दा अच आव डाह पैदा माळावाळा प्रतिमा आद.

6 आग आव नान से अंदुन, "हे मंळसा अन सन्तान, येन नी नोळत्या कि ई लॉकुर येन माळीत्यार? इस्त्राएल इन घराना येन अच धोड्डेव बेकार क्याल्सा ईल माळतान, ताकी ना तान पवित्र जागा टु दुर आगेगाईन; लेकीन नी ईऊर से भी यक्कुल बेकार क्याल्सा नोळ्या."

7 आग आव नानी आंगुळ इन दरवाजा मा वोतुन, अदिक ना नोळदीन, कि दीवार दा ऊंद खॉद्रा आद. 8 आग आव नान से अंदुन, "हे मंळसा अन सन्तान, दिवाल इक वोडु;" ईदुरसाटी ना दिवाल इक वोडुकु नोळदीन कि ऊंद दरवाजा आद. 9 आव नान से अंदुन, "बुळ्क होगकु नोळ कि ई लॉकुर ईल ह्यांग ह्यांग अदिक हापाळ बेकार क्याल्सा माळेत्यार." 10 अत: ना बुळ्क होगकु नोळदीन कि नाकु दिकळोद दिवाल मा अलग अलग प्रकार इन रेंगसावाळा जन्तु अदिक बेकार जनावरगोळ अदिक इस्त्राएल इन सप्पा घराना अन मुर्तीगोळ चित्र तेगुकु आव. 11 इस्त्राएल उन घराना अन बाट्टुर दा टु सत्तर मंळसा यार बीच दा शापान उन पार याजन्याह भी आन, आंदुर आ चित्र अन मुंद नीदुरकु आर, अदिक हर ऊंद मंळसा तान कय दा धूपदान हुडुकु आन, अदिक धूप इन धुंगा अन बादल इन सुगन्ध म्याकुच येळेत्याद. 12 आग आव नान से अंदुन, "हे मंळसा अन सन्तान, येन नी नोळ्या कि इस्त्राएल उन घराना अन बाट्टुर तान तान नकाशीवाळा कोठरीगोळ बुळ्क मतलब अंधकार दा येन माळीत्यार? आंदुर अनतार कि यहोवा नाम इक नोळालुन; यहोवा द्याश इक त्याग्स बुटान."

13 बाक आव नान से अंदुन, "नी ईंदुर से अदिक भी हापाळ बेकार क्याल्सा नोळ्या जो आंदुर माळतार." 14 आग आव नानी यहोवा अन भवन इन आ फाटक इन हाती वोतुन जो उत्तर इन दी ईरोन अदिक अल आर्तेर कुर्तकु तम्मूज इन साटी वर्लोर.

15 आग आव नान से अंदुन, "हे मंळसा अन सन्तान, येन नी ईद नोळ्या? बाक ईऊर से भी धोड्डेव बेकार क्याल्सा नी नोळ्या." 16 आग आव नानी यहोवा अन भवन इन बुळ्कळोद आंगुळ दा वोतुन; अदिक अल यहोवा अन भवन इन द्वार इन हाती हांद्रा अदिक वेदी इन बीच येनारा पच्चीस मंळसा तान बेन यहोवा अन भवन इन दी अदिक तान बाय पूर्व इन दी माळकु ईरोर; अदिक आंदुर पूर्व दिशा अन दी सूर्य अक नमस्कार माळोर.

17 आग आव नान से अंदुन, "हे मंळसा अन सन्तान, येन नी ईद नोळ्या? येन यहूदा अन घराना अन साटी बेकार क्याल्सा अन माळोद जो आंदुर ईल माळतार श्याण मात आद? आंदुर तान द्याश इक उपद्रव देल तुम कोंडुर, बाक ईल बंदकु नानी रिस दिलुस तोगोर. बल्की आंदुर आ डगाल इक तान मुग्ग इन मुंद हुडुकु ईरतार. 18 ईदुरसाटी ना भी जलजलाहट इन सांगुळ क्याल्सा माळाईन, न ना दया माळाईन अदिक न ना कोमलता माळाईन, अदिक चाहे आंदुर नान किवगोळ दा धोळ शब्द देल कारदार, तरी भी ना आंदुर मात केळतीदील."