यहेजकेल 30

मिस्त्र द्याश मा संकट इन बादल

1 बाक यहोवा अन ईद वचन नान हाती पोहचुस्त: 2 "हे मंळसा आन पारा, भविष्यवाणी माळकु अन, परमेश्वर यहोवा ईद अनतान: हाय, हाय माळी, हाय आ दिन मा! 3 यतिकी अद दिन मतलब यहोवा अन दिन हाती आद; अद बादलगोळ दिन, अदिक जातीगोळ्द दण्ड इन समय आदीत. 4 मिस्त्र दा तलवार नळदव, अदिक याग मिस्त्र दा लॉकुर कोंदकु बिद्दार, आग कूश दा भी संकट बिद्दीत, लॉकुर मिस्त्र इक लुट्सकु वोतार, अदिक अदुर नीवगोळ उलटुसकु आदव. 5 कूश, पूत, लूद अदिक सप्पा दोगला, अदिक सप्पा कूब लॉकुर, अदिक वाचा कटकु आर द्याश इन लॉकुर, मिस्त्रीगोळ सांगुळ तलवार देल कोंदकु आदार."

6 यहोवा ईद अनतान: मिस्त्र अन संभाळसा वाळेर भी बिद्दार, अदिक तान याता सामर्थ मा मिस्त्री फुलुसतार, अद मुरदीत; मिग्दोल टु हुडुकु सवेने ताका आंदुर निवासी तलवार देल कोंदकु आदार, परमेश्वर यहोवा अन ईदा वाणी आद. 7 आंदुर ऊजळा द्याशगोळ बीच ऊजळा ठहरूस्यार, अदिक आंदुर नगर खण्डर माळकु आग्याव आ नगरगोळ दा गिन्सकु आदव. 8 याग ना मिस्त्र दा बेक्की हचाईन अदिक अलेर सप्पा सहायक नष्ट आदार, आग आंदुर जान्स कोंडार कि ना यहोवा हुईन. 9 "आ समय नान मुंदु टु दूत जहाजगोळ मा येरकु निडर होट्टार अदिक कूश लॉकुरी अंजुस्यार; अदिक आंदुर मा ईत्ता संकट बिद्दीत ह्यांग कि मिस्त्र अन दण्ड इन समय; यतिकी नोळ, अद दिन बरेत्याद! 10 परमेश्वर यहोवा ईद अनतान: ना बेबीलोन उन राजा नबूकदनेस्सर उन कय देल मिस्त्र अन भीळ-भाळ इन नाश माळसुस बुळाईन. 11 आव तान प्रजा अन सांगुळ, जो सप्पा जातीगोळ दा भयानक आद, आ द्याश इन नाश माळोर साटी पोहचुस्कु आदान; अदिक आंदुर मिस्त्र अन विरूद्‍ध तलवार जेडुकु द्याश इक सोत्त मंळसागोळ देल तुम कोंडार. 12 ना गांगागोळी वंळगास बुळाईन, अदिक द्याश इक बुरा लॉकुरगोळ कय दा माळ बुळाईन; अदिक ना परदेशीगोळ द्वारा द्याश इक, अदिक जो येनारा अदुर दा आद, ऊजाळ्स बुळाईन; ना यहोवा अच ईद अंदीन."

13 "परमेश्वर यहोवा ईद अनतान: ना नोप देल मुरतगोळ नाश माळाईन अदिक अदुर दाकळव मुरतीगोळी ईर गोळतीदिल; बाक याऊ प्रधान मिस्त्र द्याश दा येळतीदिल; अदिक ना मिस्त्र द्याश दा अंज्क पैदा माळाईन. 14 ना पत्रोस नगर इक ऊजाळ्स बुळाईन, अदिक सोअन दा बेक्की हचाईन, अदिक नो नगर इक दण्ड. 15 सीन जो मिस्त्र द्याश इन गढ़ जागा आद, अदुर मा ना तान जलजलाहट भळकुसाईन, अदिक नो नगर इन भीळ-भाळ इन अन्त माळ कोमाईन. 16 ना मिस्त्र दा बेक्की हचाईन; सीन हापाळ थरथरूसेदीत; अदिक नो नगर हरकु आदीत अदिक नोप नगर इन विरोधी हागुल इन होती येद्दार. 17 ओन अदिक पीवेसेत इन जवान तलवार देल बिद्दार, अदिक ई नगर गुलामी दा होटोदव. 18 याग ना मिस्त्र अन राज्य अन अन्त माळाईन, अदिक याग अदुर घमण्ड चुर-चुर आगेदीत, आग तहपन्हेस नगर दा हागुल इन ऊजोळ अंदार दा बदलुसेदीत, सप्पा मिस्त्र द्याश बादल देल मुचेदीत; अदिक अदुर सप्पा पोरगोळ गुलाम आगकु विदेश होटोदार. 19 ई प्रकार ना मिस्त्र द्याश इक दण्ड कोळाईन. आग मिस्त्र-निवासीगोळी मालुम आदीत कि ना अच यहोवा हुईन."

मिस्त्र अन राजा अन्द मुर्दकु शक्ती

20 बाक हनुंद वा वर्ष इन पयला तिंगुळ अन येळवा दिन इक यहोवा अन ईद वचन नान हाती पोहचुस्त: 21 "हे मंळसा अन सन्तान, ना मिस्त्र अन राजा फिरौन इन भुजा मुर्द बुट्टुन; अदिक नोळ, न रा अद जोळ्सकु आत, न रा अदुर लेप हचकु पट्टी येर्सकु आत कि अद कटदुर देल तलवार हुडा योग्य आग सकुल. 22 ईदुरसाटी प्रभु यहोवा ईद अनतान: नोळ; ना मिस्त्र अन राजा फिरौन इन विरूद्‍ध आईन, अदिक आऊंद वळ्लीद अदिक मुर्दकु येढ्ढु भुजागोळी मुराईन; अदिक तलवार इक आऊन कय देल केडाईन. 23 ना मिस्त्रीगोळी जाती-जाती दा तितर-बितर माळाईन, अदिक द्याश-द्याश दा छितरूसाईन. 24 ना बेबीलोन उन राजा अन भुजागोळी बली माळकु तान तलवार आऊन कय दा कोळाईन; लेकीन फिरौन इन भुजागोळी मुराईन, अदिक आव आऊन मुंद हिंग कन्नास्यान जसा कि सायावाळा घायल कन्नास्तान. 25 ना बेबीलोन उन राजा अन भुजागोळी संभाळसाईन, अदिक फिरौन उन भुजागोळ ढीला बिद्दव, आग आंदुर जानस्यार कि ना यहोवा हुईन. याग ना बेबीलोन उन राजा अन कय दा तान तलवार कोळाईन, आग आव अदरी मिस्त्र द्याश मा नळस्यान; 26 अदिक ना मिस्त्रीगोळ इक जाती जाती दा तितर-बितर माळाईन अदिक द्याश द्याश दा छिळकुस बुळाईन. आग आंदुर जान्स कोंडार ना यहोवा हुईन."