1 बाक यहोवा अन ईद वचन नान हाती पोहचुस्त, 2 "हे मंळसा अन सन्तान, सप्पा अंगुर इन लता अन येन श्रेष्टता आद? अंगुर इन डगाल जो आळी इन मार्रगोळ बीच पैदा आगतद, अदुर दा येन गुण आद? 3 येन यातोदारा वस्तु माळोरसाटी अदुर दा टु हुळ्ली हुडुकु आगतद, या यातोदारा बर्तन टांगसोर साटी दुर दा टु खुटा आग सकतद? 4 अद रा अंगुर इन हुळ्ली बेक्की दा होताकोद क्याल्सा दा बरतद; अदुर येढ्ढु सीरागोळ बेक्की देल होतेगताव, अदिक अदुर बीच इन भाग भस्म आगेतद, येन अद यातोदु क्याल्सा अन आद? 5 नोळ, याग अद बनसीत, आग भी अद येनु क्याल्सा अन ईला ईरोद, याग अद बेक्की दा होताक्कु भस्म आगेत, आग यातोद क्याल्सा अन आग सकतद."

6 ईदुरसाटी प्रभु यहोवा ईद अनतान, "ह्यांग आळी इन मार्रगोळ दा टु ना अंगुर इन लता अक बेक्की दा होताक, हांग अच ना यरूशलेम इन निवासीगोळ्द नाश माळ कोमाईन. 7 ना आंदुर खिलाप आगाईन, अदिक आंदुर ऊंद बेक्की दा टु होटकु बाक दुसरा बेक्की दा होताक्कु आदार; अदिक ना याग आंदुर विमुख आगाईन, आग नीव लॉकुर जान्स कोंडीर कि ना यहोवा हुईन. 8 ना आंदुर द्याश नाश माळ बुळाईन, यतिकी आंदुर नान से विश्वासघात माळ्यार, प्रभु यहोवा अन ईदा वाणी आद."