यहेजकेल 40

यहेजकेल उन यरूशलेम पोहचुस्कु आगोद

1 नामव गुलामी इन पच्चीसवा वर्ष मतलब यरूशलेम नगर इन होगदुर बाद्दा चौदावा वर्ष इन पयला तींगुळ इन हतवा दिशी इक, यहोवा अन शक्ती नान मा आत, अदिक आव नानी अल पोहचुसदुन. 2 तान दर्शनगोळ दा परमेश्वर नानी इस्त्राएल उन द्याश दा पोहचुसदुन अदिक अल ताका ऊंद हापाळ ऊंचा पहाळी मा नीदरूसदुन, यदुर मा दक्षिण इन दी मान्सी यातोदारा नगर इन आकार ईरूल. 3 याग आव नानी अल वोतुन, रा ना येन नोळदीन कि पीतल इन घाई अदिक कय दा सन इन फिता अदिक नापसोद बास हुडुकु ऊंद मंळसा फाटक मा नीदुरकु आन. 4 आ मंळसा नान से अंदुन, "हे मंळसा अन सन्तान, तान कण्णगोळ देल नोळ, अदिक तान कीवगोळ से केळ; अदिक जो येनारा ना नीनी तोर्साईन अदुर मा ध्यान कोळ, यतिकी नी ईदुरसाटी अल पोहचुस्कु आग्या कि ना नीनी ईव मातगोळी तोर्साईन; अदिक जो येनारा नी नोळ्या अद इस्त्राएल उन घराना अक हेळेत."

पूर्वी फाटक

5 अदिक नोळी, भवन इन व्हार्या नाकु दी ऊंद दिवाल ईरोद, अदिक आ मंळसा अन कय दा नापसोद बास ईरोद, यदुर्द लंबाई हींग आर कय इन ईरोद जो साधारण कयगोळ देल चौवा तीम येक्कुल आद; अत: आव आ दिवाल इन मोटाई नाप्सकु बिदुर तिमुर्द नोळदुन, बाक अदुर्द ऊचाई भी नाप्सकु बिदुर तिमुर्द नोळदुन. 6 आग आव आ फाटक इन हाती बंदुन यदुर्द बाय पूर्व इन दी ईरोद, अदिक अदुर सीळी मा येरकु फाटक इन येढ्ढु डेवढीगोळ्द चौळाई नाप्सकु ऊंद ऊंद बास तिमुर्द नोळदीन. 7 पहरावाळा कोठरीगोळ बास तीम लंबा अदिक बास तीम चौळा ईरोद; अदिक येढ्ढ येढ्ढ कोठरीगोळ्द अन्तर अईद कय इन ईरोद; अदिक फाटक इन डेवढी जो फाटक इन ओसारा अन हाती भवन इन दी ईरोद, अद भी बास तीम इन ईरोद. 8 आग आव फाटक इन अद ओसारा जो भवन इन मुंद ईरोद, नाप्सकु बास तिमुर्द नोळदुन. 9 आव फाटक इन ओसारा नाप्सकु येठ्ठ कय इन नोळदुन, अदिक अदुर खंबागोळ येढ्ढ येढ्ढ कय इन नोळदुन, अदिक फाटक इन ओसारा भवन इन मुंद ईरोद. 10 पूर्वी फाटक इन येढ्ढु दी मुर मुर पहरेवाला कोठरीगोळ ईरव जो सप्पा ऊंद अच नाप इन ईरव, अदिक येढ्ढु दीकळव खंबा भी ऊंद नाप इन ईरव. 11 बाक आव फाटक इन द्वार इन चौळाई नाप्सकु हत्त कय इन नोळदुन; अदिक फाटक इन लंबाई नाप्सकु तेरहा कय इन नोळदुन. 12 येढ्ढु दीकळव पहरावाळा कोठरीगोळ मुंद कय तिमुर्द जागा ईरोद अदिक येढ्ढु दी कोठरीगोळ आर आर कय ईनव ईरव. 13 बाक आव फाटक इक ऊंद दी पहरेवाला कोठरी इन छत टु हुडुकु दुसरा दीकळोद पहरेवाला कोठरी इन छत नाप्सकु पच्चीस कय इन दुरी नोळदुन, अदिक दरवाजा आमने सामने ईरव. 14 बाक आव साठ कय इन खंबा नाप्सदुन, अदिक आंगुळ, फाटक इन आस पास, खंबा ताका ईरोद. 15 फाटक इन व्हार्या दरवाजा अन मुंद टु हुडुकु अदुर बुळ्कळोद ओसारा अन मुंद ताका पचास कय इन अन्तर ईरोद. 16 पहरावाला कोठरी दा, अदिक फाटक इन बुळ्क नाकु दीकळव कोठरीगोळ न्याड्या अन खंबागोळ न्याड्या न्याड्या दा झिलमिलीदार खिळकीगोळ ईरव, अदिक खंबागोळ ओसारागोळ दा भी हांग अच ईरव; अदिक फाटक इन बुळ्कळोद नाकु दी खिळकीगोळ ईरव, अदिक हर ऊंद खंबा मा खजुर इन मार्रगोळ अगुळकु ईरव.

व्हार्यागोळ आंगुळ

17 आग आव नानी व्हार्या अन आंगुळ दा वोतुन, अदिक आ आंगुळ इन नाकु दी कोठरीगोळ ईरव; अदिक ऊंद फर्श माळकु ईरोद, यदुर मा तीस कोठरीगोळ माळकु ईरव. 18 ईद फर्श मतलब ल्यालमागोळ्द फर्श टु हतकु ईरोद अदिक अदुरव लंबाई इन अनुसार ईरोद. 19 बाक आव ल्यालमागोळोद फाटक इन मुंद टु हुडुकु बुळ्कळोद आंगुळ ताका नाप्सकु सौ कय इन नोळदुन; अद पूर्व अदिक उत्तर येढ्ढु दी हींग अच ईरोद.

उत्तरी फाटक

20 आग व्हार्या अन आंगुळ उत्तरमुखी फाटक इन लंबाई अदिक चौळाई आव नाप्सदुन. 21 अदुर येढ्ढु दी मुर मुर पहरावाला कोठरीगोळ ईरव, अदिक ईदुर भी खंबागोळ ओसारा अन नाप पयले फाटक इन अनुसार ईरोद; ईदुर लंबाई पचास अदिक चौळाई पच्चीस कय इन ईरोद. 22 ईदुर भी खिळकीगोळ अदिक खंबागोळ ओसारा अदिक खजुरगोळ्द नाप पूर्वमुखी फाटक घाई ईरोद; अदिक ईदुर मा येरोर साटी येळ सीळीगोळ ईरव; अदिक अऊर मुंद ईदुर्द ओसारा ईरोद. 23 बुळ्कळोद आंगुळ इन उत्तर अदिक पूर्व इन दी दुसरा फाटक इन मुंद फाटक ईरव अदिक आव फाटक इन दुरी नाप्सकु सौ कय इन नोळदुन.

दक्षिणी फाटक

24 बाक आव नानी दक्षिण इन दी वोतुन, अदिक दक्षिण दी ऊंद फाटक ईरोद; अदिक आव ईदुरव खंबागोळ अदिक खंबागोळ्द ओसारा नाप्सकु ईऊरव हांग अच नाप नोळदुन. 25 आ खिळकीगोळ घाई ईदुरव अदिक ईदुरव खंबागोळ ओसारा अन नाकु दी भी खिळकीगोळ ईरव; ईदुर्द भी लंबाई पचास अदिक चौळाई पच्चीस कय इन ईरोद. 26 ईदुर दा भी येरोर साटी येळ सीळीगोळ ईरव अदिक अदुर मुंद खंबागोळ्द ओसारा ईरोद; अदिक अदुर येढ्ढु दी खंबागोळ मा खजुर इन मार्र अगुळकु ईरव. 27 दक्षिण इन दी भी बुळ्कळोद आंगुळ इन ऊंद फाटक ईरोद, अदिक आव दक्षिणी इन दी येढ्ढु फाटकगोळ दुरी नाप्सकु सौ कय इन नोळदुन.

बुळ्कळोद आंगुळ : दक्षिणी फाटक

28 आग आव दक्षिणी फाटक टु आगकु नानी बुळ्कळोद आंगुळ दा वोतुन, अदिक आव दक्षिणी फाटक इक नाप्सकु हांग अच नोळदुन. 29 मतलब ईदुरव भी पहरवाला कोठरीगोळ ईरव, अदिक खंबागोळ, अदिक खंबागोळ्द ओसारा, सप्पा हांग अच ईरव; अदिक ईदुर अदिक ईदुरव खंबागोळ ओसारा अन नाकु दी खिळकीगोळ ईरव; अदिक ईदुर्द लंबाई पचास अदिक चौळाई पच्चीस कय इन ईरोद. 30 ईदुर नाकु दीकळोद ओसारा भी पच्चीस कय लंबा, अदिक पचास कय चौळा ईरोद. 31 ईदुर खंबागोळ्द ओसारा व्हार्या आंगुळ दी ईरोद, अदिक ईदुर खंबागोळ मा भी खजुर इन मार्र अगुळकु ईरव, अदिक ईदुर मा येरली येठ्ठ सीळीगोळ ईरव.

बुळ्कोद आंगुळ : पूर्वी फाटक

32 बाक आव मंळसा नानी पूर्व इन दी बुळ्कोद आंगुळ दा वोतुन, अदिक आप्पाटी इन फाटक इक नाप्सकु हांग अच नोळदुन. 33 ईदुर्द भी पहरावाला कोठरीगोळ अदिक खंबागोळ अदिक खंबागोळ्द ओसारा, सप्पा हांग अच ईरव; अदिक ईदुर अदिक ईदुरव खंबागोळ ओसारा अन नाकु दी भी खिळकीगोळ ईरव; ईदुर लंबाई पचास अदिक चौळाई पच्चीस कय इन ईरोद. 34 ईदुर्द ओसारा भी व्हार्या अन आंगुळ इन दी ईरोद, अदिक अदुर येढ्ढु दी खंबागोळ मा खजूर इन मार्र अगुळकु ईरव; अदिक ईदुर मा भी येरली येठ्ठ सीळीगोळ ईरव.

बुळ्कोद आंगुळ : उत्तरी फाटक

35 बाक आ मंळसा नानी उत्तरी फाटक इन हाती वोतकु अदरी नाप्सदुन, अदिक अदुर्द भी नाप हांग अच नोळदुन. 36 अदुरव भी पहरावाला कोठरीगोळ अदिक खंबागोळ अदिक ओसारा ईरोद, अदिक अदुर नाकु दी भी खिळकीगोळ ईरव; ईदुर लंबाई पचास अदिक चौळाई पच्चीस कय इन ईरोद. 37 अदुर खंबागोळ व्हार्या अन आंगुळ इन दी ईरव, अदिक अऊर मा भी येढ्ढु दी खजुर इन मार्र अगुळकु ईरव; अदिक अदुर मा येरली येठ्ठ सीळीगोळ ईरव.

उत्तरी फाटक इन हात्ती उपस्थित कोठरीगोळ

38 बाक फाटकगोळ हात्ती इन खंबागोळ हात्ती दरवाजा सांगुळ कोठरी ईरव, येल होमबली तोळकु आग तोगोद. 39 होमबली, पापबली, अदिक दोषबली इन जनावरगोळ्द वध माळोरसाटी फाटक इन ओसारा अन हात्ती अदुर येढ्ढु दी येढ्ढ येढ्‌ढ मेजगोळ ईरव. 40 फाटक इन ऊंद व्हार्या अन अलंग मा मतलब उत्तरी फाटक इन दरवाजा अन चळाई मा येढ्ढ मेजगोळ ईरव; 41 फाटक इन येढ्ढु दी नाक नाक मेज ईरव, सप्पा मीलुस्कु येठ्ठ मेज ईरव, जो बलीपशु वध माळोर साटी ईरव. 42 बाक होमबली इन साटी तराशकु कल्ल इन नाक मेजगोळ ईरव, जो देळ कय लंबा, देळ कय चौळा, अदिक कयतीम ऊंचा ईरोद; अऊर मा होमबली अदिक मेलबली इन जनावरगोळ्द वध माळोरसाटी हथियार ईटकु आगतोगोव. 43 बुळ्क नाकु दी चौवातीम इन हुकगोळ हतकु ईरव, अदिक मेजगोळ मा चळावा अन मास ईटकु ईरोद. 44 बुळ्कोद आंगुळ इन उत्तरी फाटक इन व्हार्या हाळ हाळावाळेर्द कोठरीगोळ ईरव यार द्वारा दक्षिण इन दी; अदिक पूर्वी फाटक इन दी ऊंद कोठरी ईरोद, यदुर्द दरवाजा उत्तर इन दी ईरोद. 45 आव नान से अंदुन, "ईद कोठरी, यदुर्द दरवाजा दक्षिण इन दी आद, आ याजकगोळ साटी हुन जो भवन इन चौकसी माळतार, 46 अदिक या कोठरी इन दरवाजा उत्तर इन दी आद, अद आ याजकगोळ साटी आद जो वेदी इन चौकसी माळतार; ईंदुर सदोक उन सन्तान उर; अदिक लेवीगोळ दा टु यहोवा अन स्यावा टहल माळोरसाटी सिर्फ ईंदुर अच हात्ती होगतार."

बुळ्कोद आंगुळ अदिक मंदिर इन भवन

47 बाक आव आंगुळ इक नाप्सकु अदरी चौकोर मतलब सौ कय लंबा अदिक सौ कय चौळा नोळदुन; अदिक भवन इन मुंद वेदी ईरोद.

48 बाक आव नानी भवन इन ओसारा दा वोतुन, अदिक ओसारा अन येढ्ढु दी खंबागोळी नाप्सकु अईद अईद कय इन नोळदुन; अदिक येढ्ढु दी फाटक इन चौळाई मुर मुर कय इन ईरोद. 49 ओसारा अन लंबाई ईप्पत कय अदिक चौळाई हन्नेळ कय इन ईरोद; अदिक अदुर मा येरली सीळीगोळ ईरव; अदिक येढ्ढु दी खंबा अन हात्ती लाटगोळ ईरव.