यहेजकेल 32

मिस्त्र अन राजा अन तुलना मगरमच्छ देल

1 हन्नेळवा वर्ष इन हन्नेळवा तिंगुळ इन पयला दिशी यहोवा अन ईद वचन नान हाती पोहचुस्त: 2 "हे मंळसा अन सन्तान, मिस्त्र अन राजा फिरौन उन बारा दा दुख इन हाळ माळकु आऊक केळ्स: जाती जाती दा नीन उपमा हारोद हुल्ल देल कोटकु आगीत, लेकीन नी समुद्र अन मगर इन घाई आय; नी तान गांगागोळ दा बीदोद, अदिक आंदुर नीर इक कालगोळ देल मथलुसकु डवा माळ कोंड. 3 परमेश्वर यहोवा ईद अनतान: ना हापाळ सा जातीगोळ सभा अन द्वारा नीन मा तान जाल फैलुसाईन अदिक आंदुर नीनी नान महाजाल दा जेडु कोंडार. 4 आग ना नीनी जमीन मा बिळाईन, अदिक मैदान दा भिटकु आकाश इन सप्पा पक्षीगोळ इक नीन मा कुरसाईन; अदिक नीन मास देल सप्पा पृथ्वी इन जीवजन्तुगोळ इक तृप्त माळाईन. 5 ना नीन मास इक पहाळी मा ईटाईन, अदिक तराईगोळी नीन ऊचाई देल तुम कोमाईन. 6 या द्याश दा नी तैरूसत्या, अदरी पहाळी ताका ना नीन रक्ता देल सीचिसाईन; अदिक अदुर नाला नीन देल तुम्मेदव. 7 या समय ना नीनी मिटुसली हताईन, आ समय ना आकाश इक ढापसाईन अदिक तारागोळी धुंधला माळ कोमाईन; ना सुर्य अक बादल देल होचकोमाईन, अदिक चंद्रमा तान ऊजोळ कोळतीदील. 8 आकाश दा यास प्रकाशमान ज्योतिगोळ आव, आ सप्पा अक ना नीन कारण धुंधला माळ कोमाईन, अदिक आकाश नीन द्याश दा अंधकार माळ कोमाईन, परमेश्वर यहोवा ईदा वाणी आद."

9 "याग ना नीन विनाश इन समाचार जाती जाती दा अदिक नीन अनजाना द्याशगोळ दा फैलुसाईन, आग धोड्डेव धोड्डेव द्याश इन लॉकुर इन मन दा सिट्ट पैदा माळाईन." 10 ना हापाळ सा जातीगोळी नीन कारण विस्मीत माळ कोमाईन, अदिक याग ना आंदुर राजागोळ मुंद तान तलवार कळाईन, आग नीन कारण आंदुर रोंगटा नीदरेदव, अदिक नीन बीळा दिशी आंदुर तान तान जीव इन साटी नळ्गतेला ईत्तार. 11 यतिकी परमेश्वर यहोवा ईद अनतान: बेबीलोन उन राजा अन तलवार नीन मा नळदीत. 12 ना नीन भीळ इक ईत्ता शूरवीरगोळ तलवार इक द्वारा केळसुसाईन जो सप्पा जातीगोळ दा भयानक आर. "आंदुर मिस्त्र अन घमण्ड इक मुरदार, अदिक अदुर सप्पा भीळ इन सत्यानाश आदीत. 13 ना आउन सप्पा जनावरगोळ इक आऊन हापाळ सा जलाशयगोळ तट मा टु नष्ट माळाईन; अदिक भविष्य दा न रा मंळसा अन काल देल अदिक न जनावर उन खुरगोळ देल डवला माळकु आदव. 14 आग ना आंदुर नीर निर्मल माळ कोमाईन, अदिक आंदुर गांगागोळ याण्णा अन घाई वाहुसीत, परमेश्वर यहोवा अन ईदा वाणी आद. 15 याग ना मिस्त्र द्याश उन उजाळ माळ कोमाईन अदिक यदुर देल अद हापाळ आद, अदुर देल छुछा माळ कोमाईन, अदिक याग ना आऊन सप्पा ईरावाळेर इक कोन्नाईन, आग आंदुर जान्स कोंडार कि ना यहोवा हुईन."

16 "लॉकुर दुख माळोर साटी दुख इन हाळ ईदा हुन; जाती जाती इन आर्तेर ईदरी हाळ्यार; मिस्त्र अदिक अदुर सप्पा भीळ इन बारा दा अव ईवा विलाप हाळ हाळ्यार, परमेश्वर यहोवा अन ईदा वाणी आद."

मृतकगोळ्द संसार

17 बाक हन्नेळवा वर्ष इन पयला तींगुळ इन पंद्रवा दिशी इक यहोवा अन ईद वचन नान हाती पोहचुस्त: 18 "हे मंळसा अन सन्तान, मिस्त्र अन भीळ इन साटी हाय हाय माळ, अदिक आऊक प्रतापी जातीगोळोर पोरगोळ सांगुळ कबर दा नळ्सकु आर आंदुर हाती अधोलोक दा ईळ्स. 19 नी यार से मनोहर आय? नी ईळकु खतनाहीनगोळ सांगुळ बिदकु ईर.

20 "आंदुर तलवार देल सोत्तुर इन न्याड्या बीद्दार, आंदुर साटी तलवार अच ठहरूसकु आग्याद, ईदुरसाटी मिस्त्र अक अदुर सप्पा भीळ इन सांगुळ जेडुकु तरी. 21 सामर्थी शूरवीर आऊन से अदिक सहायकगोळ से अधोलोक दा मातगोळ माळ्यार; आंदुर खतनाहीन लॉकुर अल तलवार देल बीदकु ईत्तार."

22 तान सप्पा सभा सांगुळ अश्शूर भी अल आर, आऊन कब्रगोळ आऊन नाकु दी आव; सप्पा च्या सप्पा तलवार देल कोंदकु आग्यार. 23 आउन कब्रगोळ गड्डा अन क्वाना दा बन्सकु आव, अदिक आऊन तलवार कबर इन नाकु दी आंदुरव सभा आव; आंदुर सप्पा च्या सप्पा जो जीवनलोक दा अंज्क उपजुसतार, ईग तलवार देल सोतकु बीदकु आर.

24 "अल एलाम आन, अदिक आऊन कबर इन नाकु दी आऊन सप्पा भीळ आद; आंदुर सप्पा अन तलवार देल सोतकु आग्यार, आंदुर खतनाहीन अधोलोक दा ईळदार; आंदुर जीवनलोक दा अंज्क उपजुसोर, लेकीन ईग कबर दा अदिक नळ्सकु आग्यार आंदुर बाय मा भी सियाही छाऊसकु आद. 25 आऊन सप्पा भीळ सांगुळ आऊक कोंदकु आर आंदुर न्याड्या सेज सिक्त, आऊन कब्रगोळ आऊन अच नाकु दी आव, आंदुर सप्पा मुंदुर खतनाहीन तलवार देल कोंदकु आग्यार; आंदुर जीवनलोक दा अंज्क पैदा माळीदुर, लेकीन ईग कबर दा अदिक गड्डागोळ सांगुळ आंदुर बाय मा सियाही छाऊसकु आद; अदिक आंदुर सोत्तुर इन न्याड्या ईटकु आग्यार."

26 अल सप्पा भीळ सांगुळ मेशेक अदिक तूबल आन, आंदुर नाकु दी कब्रगोळ आव; आंदुर सप्पा च्या सप्पा खतनाहीन तलवार देल कोंदकु आग्यार, यतिकी जीवनलोक दा आंदुर अंज्क पैदा माळोर. 27 आ आळ्दकु खतनाहीन शूरवीरगोळ सांगुळ आंदुर बीदकु ईरतीदील जो तान तान युध्द इन हथियार हुडुकु अधोलोक दा ईळदोग्यार, अल आंदुर तलवारगोळ आंदुर ताल्ला अन ल्यालमा ईटकु आव; अदिक आंदुर अधर्म इन क्याल्सा आंदुर येलुगोळ दा व्याप्त आव; यतिकी जीवनलोक दा आंदुर से शूरवीरगोळ भी अंज्क पैदा माळोन. 28 ईदुरसाटी नी भी खतनाहीन उन सांगुळ अंग-भंग आगकु तलवार देल सोत्तुर सांगुळ बीदकु ईत्या.

29 "अल एदोम अदिक आऊन राजा अदिक आऊन सप्पा प्रधान आर, जो पराक्रमी आगदुर मा भी तलवार देल सोत्तुरगोळ सांगुळ ईटकु आर; गड्डा दा गड्डा आदव खतनाहीन लॉकुर सांगुळ आंदुर भी बीदकु ईत्तार."

30 "अल उत्तर दिशा अन सप्पा प्रधान अदिक सप्पा सीदोनी भी आर जो सोत्तुर सांगुळ ईळदोग्यार; आंदुर तान पराक्रम देल अंज्क पैदा माळीदुर, लेकीन ईग आंदुर लज्जित आदुर अदिक तलवार देल अदिक सोत्तुरगोळ सांगुळ आंदुर भी खतनाहीन बीदकु आर, अदिक कबर दा अन्य नळ्सकु आर आंदुर सांगुळ बाय भी सियाही छाऊसकु आद. 31 ईंदरी नोळकु फिरौन भी तान सप्पा भीळ इन बारा दा शांती पाऊस्यान, हव फिरौन अदिक आऊन सप्पा सेन जो तलवार देल कोंदकु आगीत, परमेश्वर यहोवा अन ईदा वाणी आद. 32 यतिकी ना आऊन कारण जीवनलोक दा अंज्क पैदा माळीदीन; ईदुरसाटी अद सप्पा भीळ सांगुळ तलवार देल अदिक सोत्तुर सांगुळ खतनाहीनगोळ न्याड्या मिंग्सकु आदीत, परमेश्वर यहोवा अन ईदा वाणी आद."