यहेजकेल 43

भवन दा परमेश्वर उन तेज

1 बाक आव नान इक आ फाटक इन हाती वोतुन जो पूर्वमुखी ईरोद. 2 आग इस्त्राएल उन परमेश्वर उन तेज पूर्व दिशा टु बत्त; अदिक आऊन वाणी हापाळ सा नीर इन घरघराहट घाई आत; अदिक आऊन तेज देल पृथ्वी प्रकाशीत आत. 3 ईद दर्शन आ दर्शन इन बराबर ईरोद, जो ना आऊक नगर इन नाश माळोर साटी बर्त नोळीदीन; अदिक आ दर्शन इन घाई, जो ना कबार गांगा अन तट मा नोळीदीन; अदिक ना बाय इन भार बीदोदीन. 4 आग यहोवा अन तेज आ फाटक टु आगकु जो पूर्वमुखी ईरोद, भवन दा होट्ट बत्त. 5 आग आत्मा नानी नेगुकु बुळ्कळोद आंगुळ दा पोहचुस्त; अदिक यहोवा अन तेज भवन दा तुम्मेत. 6 आग ना ऊंद जन उन शब्द केळदीन, जो भवन दा टु नानी अनोन, अदिक आव मंळसा नान हाती नीदुरकु ईरोन. 7 आव नान से अंदुन, "हे मंळसा अन सन्तान, यहोवा अन ईद वाणी आद: ईद रा नान सिंहासन इन जागा अदिक नान काल ईटोद जागा हुन, येल ना इस्त्राएल इन न्याड्या सदा वास माळतेला ईराईन. न रा इस्त्राएल उन घराना, अदिक अदुर राजा तान व्यभिचार देल, या तान ऊचा जागा दा तान राजागोळ लाशगोळ द्वारा नान पवित्र हेसुर बाक अशुध्द ठहरूसेव. 8 आंदुर तान देवढी नान डेवढी इन हाती, अदिक तान दरवाजा अन खंबागोळ हाती माळतोगोर, अदिक नान अदिक आंदुर न्याड्या सिर्फ दिवाल अव ईरोद, अदिक आंदुर तान घिनोना क्याल्सागोळ से नान हेसुर अशुध्द ठहरूसीदुर; इदुरसाटी ना कोप माळकु आंदरी नष्ट माळदीन. 9 ईग आंदुर तान व्यभिचार अदिक राजागोळ लाश नान हाती टु दुर माळुल, आग ना आंदुर बीच सदा वास माळतेला ईराईन.

10 "हे मंळसा अन सन्तान, नी इस्त्राएल उन घराना अक ई भवन इन नमुना तोर्स कि आंदुर तान अधर्म इन क्याल्सागोळ से लज्जित आगकु आ नमुना अक नाप्सुल. 11 अगर आंदुर तान सप्पा क्याल्सागोळ से लज्जित आगुल, रा आंदरी ई भवन इन आकार अदिक स्वरूप, अदिक ईदुर व्हार्या होगा बरोद हादी, अदिक ईदुर सप्पा आकार अदिक विधीगोळ, अदिक नियम हेळेत, अदिक आंदुर मुंद लिख्सकु ईटेत; यदुर देल आंदुर इदुर सप्पा आकार अदिक इदुर सप्पा विधीगोळ याद माळकु अदुर अनुसार माळुल. 12 भवन इन नियम ईद आद कि पहाळी इन चोटी इन नाकु दीकळोद सप्पा हिस्सा परमपवित्र आद. नोळ, भवन इन नियम ईदा हुन.

वेदी इन बनावट

13 "ईत्ता कय इन नाप देल जो साधारण कय देल चौवा तीम येक्कुल ईरूल, वेदी इन नाप ईद हुन, मतलब अदुर आधार ऊंद कय इन, अदिक अदुर चौळाई ऊंद कय इन, अदिक अदुर नाकु दीकळोद छोर मा पटरी ऊंद चौवे अन. वेदी इन ऊचाई ईदा हुन: 14 जमीन मा हुडुकु आधार टु हुडुकु ल्यालमा अन कुर्ची ताका येढ्ढ कय इन ऊचाई ईरूल, अदिक अदुर चौळाई कय तिमुर्द ईरूल; अदिक श्याण कुर्ची टु हुडुकु धोळ कुर्ची ताका नाक कय ईरूल अदिक अदुर चौळाई कय तिमुर्द ईरूल; 15 अदिक म्याकुच इन हिस्सा नाक कय ऊचा ईरूल; अदिक वेदी मा होताकोद जागा अन नाक सींग म्याकुच इन दी होटकु ईरूल. 16 वेदी मा होततोगोद जागा चौकोर मतलब हन्नेळ कय लंबा अदिक हनुंद कय चौळा ईरूल. 17 ल्यालमा अन कुर्ची चौदा कय लंबा अदिक चौदा कय चौळा ईरूल, अदिक अदुर नाकु दिकळोद पटरी आरधा कय इन ईरूल, अदिक अदुर आधार नाकु दी कय तिमुर्द ईरूल. अदुर सीळी अदुर पूर्व दी ईरूल."

वेदी इन अर्पण

18 बाक आव नान से अंदुन, हे मंळसा अन सन्तान, परमेश्वर यहोवा ईद अनतान, या दिशी होमबली येर्सली अदिक रक्ता छिळकुसोर साटी वेदी माळकु आगुल, आ दिन इन विधीगोळ ईव ठहरूसुल:

19 "मतलब लेवीय याजक लॉकुर, जो सदोक उन सन्तान उर, अदिक नान स्यावा टहल माळली नान हाती ईरतार, आंदरी नी पापबली इन साटी ऊंद पाड्डा कोळेत, परमेश्वर यहोवा अन ईदा वाणी हुन. 20 आग नी अदुर रक्ता दा टु येनारा हुडुकु वेदी इन नाकु सींगगोळ अदिक कुर्चीगोळ क्वाना अदिक नाकु दी पट्टी मा हचेत; ई प्रकार देल आऊन साटी प्रायश्चित माळा द्वारा अदरी पवित्र माळेत. 21 आग पापबली इन पाड्डा अक हुडुकु, भवन इन पवित्र जागा अन व्हार्या ठहरूस्द जागा दा होताक कोमेत. 22 दुसरा दिशी ऊंद निर्दोष व्हात पापबली माळकु येर्सेत; अदिक ह्यांग पाड्डा अन द्वारा वेदी पवित्र माळकु आगुल, हांग अच अद ई व्हात इन द्वारा भी पवित्र माळकु आदीत. 23 याग नी अदरी पवित्र माळ कोंड्या, आग ऊंद निर्दोष पाड्डा अदिक ऊंद निर्दोष म्यांडा येर्सेत. 24 नी अवरी याजक उन मुंद तरेत, अदिक याजक लॉकुर अऊर मा ऊप्प हाक्कु अवरी यहोवा अक होमबली माळकु येरस्यार. 25 येळ दिन ताका नी रोज पापबली इन साटी ऊंद व्हात तैयार माळेत, अदिक निर्दोष पाड्डा अदिक मर्रगोळ दा टु निर्दोष म्यांडा भी तैयार माळकु आगुल. 26 येळ दीन याजक लॉकुर वेदी इन साटी प्रायश्चित माळकु अदरी शुद्ध माळतेला ईरूल; ईदा भाती आऊन संस्कार आगुल. 27 याग अव दीनगोळ खतम आगुल, आग आठवा दिन इन बाद्दा टु याजक लॉकुर नीम साटी होमबली अदिक मेलबली वेदी मा येर्स तोगुल; आग ना नीम से खुश आगाईन, परमेश्वर यहोवा अन ईदा वाणी हुन."