1 "हे मंळसा अन सन्तान, नी ऊंद ईटा हुडु अदिक अदरी तान मुंद ईटकु अदुर मा ऊंद नगर, मतलब यरूशलेम इन ऊंद चित्र तेगु; 2 आग अदरी घेर्स मतलब अदुर विरूद्‍ध किला माळ अदिक अदुर मुंद नालीगोळ कट; अदिक छावनी हाक, अदिक अदुर नाकु दी युध्द अन यंत्र हच. 3 आग नी लोहा अन तावा हुडुकु अदरी लोहा अन शहरपनाह मान्सकु तान अदिक आ नगर इन बीच नीदरूस, आग तान बाय आऊन मुंद माळकु अदुर घेराबंदी माळ, ई रीती देल; नी अदरी घेर्सकु ईटेत. ईद इस्त्राएल उन घराना अन साटी चिन्ह ठहरूसीत."

4 "बाक नी ऊजवा कळ ताकोमकु इस्त्राएल उन घराना अन अधर्म तान म्याकुच ईट, यतिकी यास दिन नी ऊजवा कळ ताकोमकु मिंगतेला ईत्या, आस दिन ताका आ लॉकुर इन अधर्म इन भार सहुसतेला ईत्या. 5 ना आंदुर साटी अधर्म इन वर्षगोळ तुल्य नीन साटी दिनगोळ ठहरूसीन, मतलब मुर सौ नब्बे दिन; आस दिन ताका नी इस्त्राएल इन घराना अन अधर्म इन भार सहुसतेला ईर. 6 याग ईस दिन पुरा आगेदव, आग नी डाक्या कळ मींगकु यहूदा अन घराना अन अधर्म इन भार सहुस कोमेत; ना आंदुर साटी भी अदिक नीन साटी ऊंद वर्ष इन बदला ऊंद दिन मतलब चालीस दीन ठहरूसीन."

7 नी यरूशलेम इक घेर्सोर साटी बाह तेगुकु तान बाय आत्त माळकु अदुर विरूद्‍ध भविष्यवाणी माळेत. 8 नोळ, ना नीनी जाळीगोळ देल जकळुसाईन, अदिक यागासताका अदुर घेर्सोद इन दिन पुरा आगाल, आगासताका नी कळ ताकोम सकतीदील.

9 "नी गोदी, जौ, सेम, मसूर, बाजरा, अदिक कठिया गोदी, हुडुकु ऊंद बरतन दा ईटकु अऊर देल रोट्टी माळ तोगेत. यास दिन नी कळ मा मींगकु ईत्या, आस मतलब मुर सौ नब्बे दिन ताका अदरी तीन तोगेत. 10 जो भोजन नी तिंद्या, अदरी आळु आळुकु तिनेत, मतलब रोज येढ्ढ सौ तीस ग्राम* तीम तिन तोगेत, अदिक अदरी समय समय मा तिनेत. 11 नीर भी आळुकु कुडु तोगेत, मतलब हर दिशी येढ्ढ गिलास* कुडेत; अदिक नी नीर निश्चित समय मा कुडेत. 12 तान भोजन जौ इन रोट्टीगोळ घाई माळकु तीन तोगेत, अदिक अदरी मंळसा अन ल्यांडा अन कुळ्लगोळ मा आंदुर नोळतेला बनुस तोगेत."

13 बाक यहोवा अंदुन, "ईदा प्रकार देल इस्त्राएल आ राज्यगोळ बीच तान तान रोट्टी अशुध्दता देल तिंदार, यल ना आंदरी जबरदस्ती पोहचुसाईन."

14 आग ना अंदीन, "हाय, यहोवा परमेश्वर नोळ, नान मन कभी अशुध्द आगीदील, अदिक ना बचपन टु हुडुकु ईगासताका खुद देल सोतकु या बीचकु आग्याद जनावर इन मास तिंदीदील, अदिक न यातोदु प्रकार इन बेकार मास नान बाय दा कभी होग्याद."

15 आग आव नान से अंदुन, "नोळ, ना नीन साटी मंळसा अन ल्यांडा अन बदला सेंगळी ठहरूसीन, अदिक अदुर देला नी तान रोट्टी माळेत."

16 बाक आव नान से अंदुन, "हे मंळसा अन सन्तान, नोळ, ना यरूशलेम दा अन्नरूपी आधार इक दुर माळाईन; ईदुरसाटी अलेर लॉकुर आळु आळुकु अदिक चिन्ता माळ माळकु रोट्टी तिनतोदार; अदिक आळु आळुकु अदिक दुखी आग आगकु नीर कुडुतोदार. 17 अदिक ईदुर देल आंदरी नीर अदिक रोट्टी इन कमी आदीत; अदिक आंदुर सप्पा च्या सप्पा घबरूस्यार, अदिक तान अधर्म दा फसुसकु वंळ्गेदार."