यहेजकेल 5

मुंडन माळदुर द्वारा यरूशलेम इन विनाश तोरसोद

1 "हे मंळसा अन सन्तान, ऊंद पन्यार तलवार हुडु, अदिक अदरी भाली इन उस्तरा अन घाई क्याल्सा दा तनकु तान ताल्ला अदिक दाळी इन चुट्टी तेगुकोम, आग तौलुसोद काटा हुडुकु चुट्टीगोळ्द भाग माळ. 2 याग नगर इन घेर्सव दिन पुरा आदव, आग नगर इन बुळ्क ऊंद तिहाई बेक्की दा हाक्कु होताकेत, अदिक ऊंद तिहाई हुडुकु नाकु दी तलवार देल बडेत; अदिक ऊंद तिहाई इक हवा दा ऊळुसेत, अदिक ना तलवार जेडुकु अदुर हिंद नळसाईन. 3 आग ईऊर दा टु थ्वाळासा चुट्टी हुडुकु कपळा अन क्वाना दा कटेत. 4 बाक ईऊर दा टु भी थ्वाळासा हुडुकु बेक्की इन बीच हाकेत कि अव बेक्की दा होत्तेगुल, आग अदुर दा टु ऊंद चिंगारी भळकुसकु इस्त्राएल इन सप्पा घराना दा फैलुसेदीत."

5 "प्रभु यहोवा ईद अनतान: यरूशलेम हींग अच आद; ना अदरी अन्य राज्यगोळ बीच दा ठहरूसीन, अदिक अद नाकु दी द्याशगोळ से घेर्सकु आद. 6 आव नान नियमगोळ खिलाप क्याल्सा माळकु अन्य राज्यगोळ से येक्कुल दुष्टता माळ्यान, अदिक नान विधीगोळ खिलाप नाकु दिकळोर द्याश इन लॉकुर से येक्कुल बुराई माळ्यार; यतिकी आंदुर नान नियमगोळी बेकार जान्सदुर, अदिक आंदुर नान विधीगोळ मा नळदिदील. 7 ई कारण प्रभु यहोवा ईद अनतान: नीव लॉकुर जो तान नाकु दिकळोर राज्यगोळ से येक्कुल हुल्लळ माळतेला, अदिक न नान विधीगोळ मा नळुतार, न नान नियमगोळी मान्सतार अदिक तान नाकु दिकळोर राज्यगोळ नियमगोळ अनुसार भी माळीदिल, 8 ई कारण प्रभु यहोवा ईद अनतान: नोळ, ना खुद नीन खिलाप आईन; अदिक अन्य राज्यगोळ नोळतेला ना नीन बीच न्याय इन क्याल्सा माळाईन. 9 नीनव सप्पा घिनोना क्याल्सा अन कारण ना नीन बीच हींग माळाईन, ह्यांग ईगासताका माळीदिल, अदिक न भविष्य दा बाक माळतीदील. 10 ईदुरसाटी नीन न्याड्या चिकोर तान तान आप्प उन, अदिक आप्प तान तान चिकोर्द मास तिंदार; अदिक नीनी इक दण्ड कोळाईन, अदिक जो लॉकुर ऊळ्दोदार, आंदरी ना नाकु क्वानागोळ दा बगरूस बुळाईन."

11 ईदुरसाटी प्रभु यहोवा अन ईद वाणी आद, कि नान जीवन इन किर्या, ईदुरसाटी कि नी नान पवित्र जागा अक तान सप्पा घिनोना मुर्तीगोळ अदिक सप्पा घिनोना क्याल्सा देल अशुध्द माळ्या, ना नीनी घटुसाईन, अदिक नीन मा दया अन नजर माळतीदील, अदिक नीन मा येनु भी तरस तिनतीदील. 12 नींद आबादी इन ऊंद तिहाई रा महामारी देल सोत्तीत, अदिक नीन बीच हसु देल सोतकु मिटुसेदीत; ऊंद तिहाई नीन आस पास तलवार देल कोंदकु आदीत; अदिक ऊंद तिहाई इक ना नाकु दी तितर बितर माळाईन अदिक तलवार जेडुकु आंदुर हींद नळसाईन.

13 ई प्रकार देल नान क्रोध शांत आदीत, अदिक तान जलजलाहट आंदुर मा पुरा रीती देल भळकुसकु ना शांती पाऊसाईन; अदिक याग ना तान जलजलाहट आंदुर पुरा रीती देल भळकुस बुळाईन, आग आंदुर जान्स कोंडार कि ना यहोवा अच जलन दा बंदकु ईद अंदीन. 14 ना नीनी नीन नाकु दीकळोर राज्यगोळ बीच, सप्पा होगा-बरावाळेर नोळतेला नाश माळाईन, अदिक नीन बदनामी माळसुसाईन.

15 "ईदुरसाटी याग ना नीन इक कोप अदिक जलजलाहट अदिक हापाळ डाट फटकार सांगुळ दण्ड कोळाईन, आग नीन नाकु दीकळोर राज्यगोळ मुंद नामधराई, मज्याक, सजा अदिक विस्मय आदीत, यतिकी ना यहोवा ईद अंदीन. 16 ईद आ समय आदीत, याग ना आ लॉकुर्द नाश माळोर साटी नीम मा अकाल इनव घातक तीर नळ्सकु, नीम बीच अकाल वाळुसाईन, अदिक नीम अन्नरूपी आधार इक दुर माळाईन. 17 ना नीम बीच अकाल अदिक दुष्ट जन्तु कळाईन जो नीमी बे:औलाद माळेव; अदिक महामारी अदिक खुन नीम बीच नळुतेला ईत्तव; अदिक ना नीम मा तलवार नळसाईन, नानी यहोवा खुद अंदुन."