यहेजकेल 29

मिस्त्र अन विरूद्ध भविष्यवाणी

1 हतवा वर्ष इन हतवा तींगुळ इन हन्नेळवा दिशी यहोवा अन ईद वचन नान हाती पोहचुस्त: 2 "हे मंळसा अन सन्तान, तान बाय मिस्त्र अन राजा फिरौन उन दी माळकु आऊन दी अदिक सप्पा मिस्त्र अन विरूद्ध भविष्यवाणी माळ; 3 ईद अन परमेश्वर यहोवा ईद अनतान: हे मिस्त्र अन राजा फिरौन, ना नीन विरूद्ध आईन, हे धोड्डेव मगर, नी जो तान गांगागोळ न्याड्या बिदकु ईरत्या, याव अंदान, नील गांगा नान खुद इन हुन, अदिक ना अदरी तान साटी माळीन." 4 नान नीन जबळागोळ दा आकळागोळ हाकाईन, अदिक नीन गांगा अन मेनगोळी नीन तोगुल दा चिपकुसाईन, अदिक नीन तोगुल दा चिपकुस्द नीन गांगा अन सप्पा मेनगोळ सांगुळ नीनी इक नीन गांगागोळ दा टु तेगाईन. 5 आग ना नीनी नीन गांगागोळ सप्पा मेनगोळ सांगुळ आळी दा तेगु कोमाईन, अदिक नी मैदान दा बीदकु ईत्या; यातोदु प्रकार देल नीन सुधी ताकोमकु आगतीदील. ना नीनी आळी दाकळव जनावर अदिक आकाश इन पक्षीगोळ्द आहार माळ कोंडीन. 6 आग मिस्त्र अन सप्पा निवासी जान्स कोंडार कि ना यहोवा हुईन. आंदुर रा इस्त्राएल उन घराना अन साटी नरकट इन टेक ठहरुसदुर. 7 याग आंदुर नीन मा कय इन बल कोट्टुर आग नी मुरदोद अदिक आंदुर खांदा कित्तेदव, अदिक याग आंदुर नीन मा टेक हचदुर, आग नी मुरदोद, अदिक आंदुर नेळु उन सप्पा नसगोळ येरेदव. 8 ई कारण प्रभु यहोवा ईद अनतान: नोळ, ना नीन मा तलवार नळ्सकु, नीन मंळसा अदिक जनावर, सप्पा अन नाश माळाईन. 9 आग मिस्त्र द्याश ऊजाळ अच ऊजाळ आदीत; अदिक आंदुर जान्स कोंडार कि ना यहोवा हुईन. "नी अंद्या, ‘नील गांगा नांद हुन, अदिक ना अच अदरी माळीन.’ 10 ई कारण नोळ, ना नीन अदिक नीन गांगागोळ विरूद्ध आईन अदिक मिस्त्र द्याश इक मिग्दोल टु हुडुकु सवेने ताका बल्की कूश द्याश इन सीमा ताका उजाळ अच उजाळ माळ कोमाईन." 11 चालीस वर्ष ताका अदुर दा मंळसा या जनावर इन काल ताका ईला बीदीत; अदिक न अदुर दा याऊ कुरतान. 12 चालीस वर्ष ताका ना मिस्त्र द्याश इक नाश आग्द द्याशगोळ न्याड्या उजाळ माळकु ईटाईन; अदिक अदुर नगर नाश आग्द नगरगोळ न्याड्या खण्डर अच ईत्तव. ना मिस्त्रीगोळी राज्य राज्य दा छिन्न भिन्न माळ कोमाईन, अदिक द्याश द्याश दा तितर-बितर माळ कोमाईन. 13 "परमेश्वर यहोवा ईद अनतान: चालीस वर्ष इन बित्सदुर मा ना मिस्त्रीगोळी आ राज्यगोळ न्याड्या टु जमा माळाईन, यदुर दा आंदुर तीतर बीतर आदुर; 14 अदिक ना मिस्त्रीगोळी गुलामी टु बीळ्सकु पत्रोस द्याश दा जो आंदुर्द खुद इन जनम भूमी आद, मात पोहचुसाईन; अदिक अल आंदुर्द श्याणतुसा राज्य आगेदीत. 15 अद सप्पा राज्य दा श्याण ईत्तीत, अदिक बाक तान ताल्ला अदिक राज्यगोळ म्याकुच नेगुतीदील; यतिकी ना मिस्त्रीगोळ इक हींग घटुसाईन कि आंदुर राज्य राज्य मा मात प्रभुता माळ सक्यार. 16 आव बाक इस्त्राएल उन घराना अन भरोसा अन कारण आगतीदील, यतिकी याग आंदुर मात आंदुर दी नोळली कुरूल, आग आंदुर जान्स कोंडार कि ना परमेश्वर यहोवा हुईन."

राजा नबूकदनेस्सर मिस्त्र अक हारूस्यान

17 बाक सत्ताइसवा वर्ष इन पयला तींगुळ इन पयला दिशी इक यहोवा अन ईद वचन नान हाती पोहचुस्त: 18 "हे मंळसा अन सन्तान, बेबीलोन उन राजा नबूकदनेस्सर सोर उन घराना दा तान सेना देल धोळ मयनत माळसुसदुन; हर ऊंद उन ताल्ला टकल आगेत, अदिक ऊंद उन खांदा अन तोगुल छिलसेत; तरी भी आऊक सोर देल न रा ई धोळ मयनत इन मजदुरी येनारा सीक्त अदिक न आऊन सेना अक. 19 ई कारण परमेश्वर यहोवा ईद अनतान: नोळ, ना बेबीलोन उन राजा नबूकदनेस्सर उक मिस्त्र द्याश कोळाईन, अदिक आव आऊन भीळ इक वोतान, अदिक आऊन धन सम्पती इक लुट्सकु तान माळ कोंडान; अत: ईदा मजदुरी आऊन सेना अक सीक्कीत. 20 ना आऊन मयनत इन बदला दा आऊक मिस्त्र द्याश इ कारण कोट्टीन कि आ लॉकुर नान साटी क्याल्सा माळीदुर, परमेश्वर यहोवा अन ईदा वाणी आद.

21 "अदा समय ना इस्त्राएल उन घराना अन ऊंद सींग उगुसाईन, अदिक आंदुर न्याड्या नीन बाय खोलसाईन. आग आंदुर जान्स कोंडार कि ना यहोवा हुईन."