1 बाक यीशु ड्वांगा मा कुर्तकु समुद्र अन आप्पाटी होदुन, अदिक तान नगर*९:१ आऊंद खुद इन ऊर; कफरनहूम दा बंदुन. 2 अदिक नोळी, हापाळ लॉकुर ऊंद लकवा अन्द रोगी इक व्हर्स मा मिंग्सकु आऊन हात्‍ती तंदुर. यीशु आंदुर विश्वास नोळकु, आ लकवा अन्द रोगी से अंदुन, "हे पारा, हिम्मत ईट; नीन पाप माफ आदव."

3 इदुर मा हापाळ शास्त्रीगोळ माताळली कुरतुर, "इव रा परमेश्वर उन अपमान माळतान."

4 यीशु आंदुर्द मन इन मातगोळी अरूकु अंदुन, "नीव लॉकुर तान-तान मन दा बुरा विचार येती माळेतीर? 5 आसान येन आद? ईद अनोद, ‘नीन पाप माफ आदव,’ या ईद अनोद कि, ‘येळ नळु अदिक टेट.’ 6 लेकीन इदुरसाटी कि नीव जान्स कोमी कि मंळसा अन्द पार उक पृथ्वी मा पाप माफ माळोद अधिकार आद." इदुरसाटी यीशु लकवा अन्द रोगी से अंदुन, "येळ, तान व्हर्स नेगु, अदिक तान मान्नी होटोग."

7 आग लकवा अन रोगी यदकु तान मान्नी होटोदुन. 8 लॉकुर ईद नोळकु अंजेदुर अदिक परमेश्वर उन बळाई माळली कुरतुर याव मंळसा अक हिंग अधिकार कोटान.

9 अल टु मुंद होगकु यीशु मत्ती हेसुर इन ऊंद मंळसा अक कर ताकोमोद चौकी मा कुर्तकु नोळदुन, अदिक आऊन से अंदुन, "नान हिंद आगेग."

आव यदकु आऊंद हिंद आगेदुन.

10 ✝ ९:१० लूका १५:१,२ * ९:१० मत्ती इन मान्या; या आऊन मतलब यीशु उन मान्या याग यीशु मत्ती इन मान्या ऊमोर साटी कुरतुन रा कर ताकोमावाळेर अदिक पापी बंदकु यीशु अदिक आऊन चेलागोळ सांगुळ ऊमली कुरतुर. 11 ईद नोळकु फरीसीगोळ आऊन चेलागोळ से अंदुर, "नीम गुरु कर ताकोमावाळेर अदिक पापीगोळ्द सांगुळ येती तिनतान?"

12 ईद केळकु यीशु आंदुर से अंदुन, वैद्य भला चंगागोळ साटी ईला लेकीन बिमारगोळ साटी जरूरी आन. 13 ✝९:१३ मत्ती १२:७"इदुरसाटी नीव होगकु इदुर्द अर्थ कल्त कोमी: ‘ना बलिदान ईला लेकीन दया चाहासतीन.’ यतिकी ना न्यायी लॉकुरी ईला, लेकीन पापीगोळी कारूली बंदीन."

14 आग बपतिस्मा कोळावाळा यूहन्ना अन्द चेलागोळ आऊन हात्‍ती बंदकु अंदुर, "येन कारण आद कि नाव अदिक फरीसी ईट उपास ईटतेव, पर नीन चेलागोळ उपास ईटालुर?"

15 यीशु आंदुर से अंदुन, "येन वराती, यागासताका मंळगार आंदुर सांगुळ आन, शोक माळ सकतार? पर अव दिन बंदव याग मंळगार आंदुर से ब्यार्र माळकु आदान, आ समय आंदुर उपास माळ्यार."

16 "क्वारा कपळा अन्द थिगर हाळोद कपळा मा याऊ हचालुन, यतिकी अद थिगर आ कपळा से येनारा मात्‍त जेडु कोमतद, अदिक बाक अद यक्कुल हर्दोगतद. 17 अदिक लॉकुर व्हाशोद अंगुर इन रास्सा हाळोद तोगुल इन चिला दा तुमालुर, यतिकी हिंग माळदुर देल तोगुल इन चिला हर्दोगताव अदिक अंगुर इन रास्सा चेल्लेगतद अदिक तोगुल इन चिला नाश आगेगताव; लेकीन व्हाशोद अंगुर इन रास्सा व्हाशोद तोगुल इन चिला दा तुमतार अदिक अव येढ्ढु उळ्दकु ईरताव."

18 यीशु आंदुर से इव मातगोळ अनतेला अच ईरोन, कि नोळी यहूदी सभागृह अन ऊंद सरदार बंदकु आऊक प्रणाम माळदुन अदिक अंदुन, "नान पोर ईगल्या सोतार, लेकीन नळुकु तान कय आकिन मा ईट, रा आक जित्‍ता आगेदार."

19 यीशु यदकु तान चेलागोळ सांगुळ आऊन सांगुळ होटोदुन.

20 अदिक नोळी, ऊंद आर्त ईरोर आक इक हन्नेळ वर्ष टु खुन होगोद रोग ईरोद, हिंदु टु बंदकु आऊन कपळा अन्द किनारा अक मुटदुर. 21 यतिकी आक तान मन दा अनतोगोर, "अगर ना आऊन कपळा का मुट बुळाईन रा चंगा आगेगाईन."

22 यीशु तिर्गकु आकी नोळदुन अदिक अंदुन, "पोरी धीरज ईट; नीन विश्वास नीनी वळ्लीद माळ्याद. इदुरसाटी आक आर्त आटोटीका चंगा आगेदुर."

23 याग यीशु आ सरदार उन मान्या पोहचुसदुन अदिक कोळ्ल ऊयावाळेर इक अदिक भीळ इक सोरसराबा मचुस्त नोळदुन, 24 आग आव लॉकुर से अंदुन, "सरकुसेगी, पोर सायली आर, लेकीन मिंगेत्यार." इदुर मा आंदुर आऊन मज्याक हार्सली कुरतुर. 25 लेकीन याग भीळ इक व्हार्या तेगुकु आत, रा आव बुळ्क होगकु पोर इन कय हुळदुन, अदिक पोर यदकु कुर्तोदुर. 26 अदिक ई मात इन चर्चा द्याश इन सप्पा प्रदेश दा फैलुसेत.

27 याग यीशु अल टु मुंद वाळुसदुन, रा येढ्ढ कुढ्ढ मंळसागोळ आऊन हिंद ईद कारूतेला नळदुर, "हे दाऊद उन औलाद, नाम मा दया माळ!"

28 याग आव मान्या बुळ्क पोहचुसदुन, रा आ कुढ्ढगोळ आऊन हात्‍ती बंदुर, अदिक यीशु आंदुर से अंदुन, "येन नीमी विश्वास आद कि ना चंगा माळ सकतीन?" आंदुर आऊन से अंदुर, "हव, प्रभु!" 29 आग आव आंदुर्द कण्णगोळी कय हचकु अंदुन, नीम विश्वास इन अनुसार नीम साटी हांगा आगुल "ह्यांग नीव चाहासतीर." 30 अदिक आंदुर्द कण्णगोळ देल कांळ्सली हत्त. यीशु आंदरी चेतावनी कोटकु अंदुन, "सावधान, ईदुर बारा दा यारीकु मालूम ईला नळु पायजे."

31 लेकीन आंदुर अल टु होटकु पुरा द्याश दा आ समाचार इक फैलुस बुटुर.

32 याग आंदुर व्हार्या होगोर, रा नोळी, लॉकुर ऊंद मुक्‍का अक यारदा दुष्टआत्मा ईरोद, आऊन हात्‍ती तंदुर; 33 अदिक याग दुष्टआत्मा तेग्द बुट्टुन, रा मुक्‍का मंळसा माताळली हत्‍तेदुन. इदुर मा भीळ अचम्भा माळकु अंत, "इस्त्राएल दा हिंग यागलु नोळकु आगीदील."

34 ✝ ९:३४ मत्ती १०:२५; १२:२४; मरकुस ३:२२; लूका ११:१५ लेकीन फरीसीगोळ अंदुर, "इव रा दुष्टआत्मागोळ्द सरदार उन मदत देल दुष्टआत्मागोळी तेगुतान."

35 ✝ ९:३५ मत्ती ४:२३; मरकुस १:३९; लूका ४:४४ यीशु सप्पा नगरगोळ अदिक ऊरगोळ दा वयाळतोगोन, अदिक राज्य अन्द खुशखबरी प्रचार माळतोगोन, अदिक हर प्रकार इन बिमारी अदिक कमजोरी इक दुर माळतेला ईत्‍तुन. 36 ✝९:३६ मरकुस ६:३४याग आव भीळ इक नोळदुन रा आऊक लॉकुर मा दया बत्‍त, यतिकी आंदुर आ म्यांडागोळ घाई ईरोर यार्द याऊ रखवाला ईला ईरोन, आंदुर व्याकुल अदिक भटकुसकु ईरोर. 37 ✝९:३७ लूका १०:२आग आव तान चेलागोळ से अंदुन, "हण्ण केई रा हापाळ आव पर क्याल्सा माळावाळेर मजदुर गोर्त आर. 38 इदुरसाटी फसल इन स्वामी से विनती माळी कि आव केई इन फसल कडोर साटी मजदूर कळु बुळुल."