Atos 3

Petero na Yohaana baafumya echirema

1 Lusiku luguma, Petero na Yohaana baliiri bazamuukira omu Nju ya Nnamahanga aha saa mwenda z’ezuuba, cho chaliiri gihe ch’ogusaliira. 2 Mw’ebyo bishanji, abantu baliiri baheeka omulume waburhwaga eyi chirema. Abo bantu bagendaga bamuhira ngasi lusiku hoofu n’omulyango gw’eNju ya Nnamahanga guyirikwa «Mulyango Gukwiriire» y’ahemuuze oburhabaale oku baliiri baaja mo. 3 Abwene Petero na Yohaana bakola baaja omu Nju ya Nnamahanga, arhondera kubahema oburhabaale. 4 Petero na Yohaana bamuloleereza, naye Petero amubwira ntya: «Orhulole!» 5 Naye abalola, kwenge alilangaliire oku hali echi bamuha. 6 Aliko Petero amubwira ntya: «Ntagwerhe furanga changwa oro, aliko echi ngwerhe, nguheere cho: omu ziino lya Yeesu Kirisitu w’eNazareeti, yimanga onalambagire!» 7 Amufarhira oku kuboko kw’ekulyo, amuyimanza. Ho n’aho, ebishando byaage n’orhuzirabulongo rhwage byakomera. 8 Ayuumuka oku liguma, ayimanga n’ogurhondera kulambagira. Aja haguma nabo omu Nju ya Nnamahanga eyi ali alambagira, abalalabalala n’ogukuuza Nnamahanga. 9 Abantu booshi bamubona ali alambagira n’ogukuuza Nnamahanga. 10 Bamurhegeera oku y’olaala wagendaga ayikala halaala «Mulyango Gukwiriire» gw’eNju ya Nnamahanga guhema oburhabaale. Basoomerwa banahwerwa n’ebyamubereere.