1 Mw'ezoola siku, Yohaana Mubatiiza ahulukira omu mpinga y' eYudeeya. Aliiri ayaamagaza ntya: 2 «Muleke ebyaaha byenyu, kwenge obwime bw'empingu buli hoofu!» 3 Yohaana y'olaala omuleebi Isaya aderhaga elugulu waage ntya:

«Muntu muguma oli omu mpinga y'ayaamagaza ntya:

‹Murheganyize Nnaweerhu enjira,

mumujirire enjira zilambuukire!›»*

4 Yohaana aliiri ayambala efulema ya kwizwaga n'amooya m'engamiya. Analiiri ayambala omukaba gw'oluhu omu mankinya. Agendaga alya emiguuku n'obuuki. 5 Abantu bagendaga baaja emunda ali gurhengera omu gishagala ch'eYerusaleema, omu gihugo ch'eYudeeya chooshi n'enyunda zooshi z'olwinji lw'eYorodaani. 6 Abo bantu baliiri bayemera ebyaaha byaabo embere z'abantu. Na Yohaana aliiriababatiiza omu Yorodaani.

7 Yohaana abeere abona aBafarisaayo banene n'aBasadukaayo bayinja emunda ali yi babatiizwe, ababwira ntya: «Mwe buuko bw'enjoka, nde wababwirire oku mwakagala gushaga obuhane bwa Nnamahanga bwayinjire? 8 Leero muleme mwayeerekana kugerera ebijiro oku mwalekere ebyaaha byenyu. 9 Murhachibwiraga mpu: ‹Abrahaamu ye shookuluza weerhu.› Kwenge mbabwirire oku Nnamahanga agahindamula ama mabaale maabe baana b'Abrahaamu! 10 Embasha ekola eri hoofu guchiira emirhi oku mizi. Ngasi murhi gurhayaana amalehe menja, gwachiibwa n'ogukabulwa omu muliro.

11 «Nyoono, ndi nababatiiza omu menji, omu kuyerekana oku mwalekere ebyaaha byenyu. Aliko hali owayinjire enyuma zaani, yeewe agwerhe obuhashe kundusha. Ntakwaneene chiro kumuhogola ebiraato. Yeewe ye nji wababatiiza omu Muuka-Mutagatiifu n'omu muliro. 12 Afarhire omu fune zaage engooko y'akuula ebisasara omu ngano. Nj'arhoola engano n'okuzihira omu nguli yaage. Sy'aliko nj'achumika ebisasara omu muliro gurhazima chiro n'ehityu.»

13 Mwamo mango, Yeesu arhengera eGalilaaya ahika oku lwinji lw'eYorodaani, ayegeera Yohaana mpu y'abatiizwe naye. 14 Aliko Yohaana ashonda kulahira anamubwira ntya: «Nyoono nye ndagiirire kubatiizwa naawe. Leero gurhe, wooyo we wajire wayinja emunda ndi?» 15 Yeesu amushubiza ntya: «Lekaga bibe ntyo bunoola. Kwenge ntya kubihemere rhujire ebikwaneene byooshi.» Yohaana aja ayemeera.

16 Yeesu abeere amabatiizwa, arhenga omu menji. Ho n'aho, empingu zagichinguula, abona Muuka gwa Nnamahanga nka guuku n'okumugwirira ko. 17 Omulenge gwarhengera empingu, n'okuderha ntya: «Oyuula ye Mugala waani muzigirwa, nsimiisizwe naye bweneene.»