1 Yeesu abeere amala kuderha eyo myaazi, arhenga omu gihugo ch'eGalilaaya. Aja omu gihugo ch'eYudeeya, oku lwindi lunda l'olwinji lw'eYorodaani. 2 Bantu banene bweneene bamukulikira eyo munda, n'abaliiri balwala, abafumya.

3 aBafarisaayo baguma bamuyegeera yi bamugeregeze. Baamubaza ntya: «K'eRhegeko lyeerhu liyemereere omulume kuyegula mukaage ku ngasi chibazo?»

4 Yeesu abashubiza ntya: «Ka murhasaga gusoma okw'aMandiko Matagatiifu maderhere ntya: ‹Oku murhondero, Nnamahanga alemaga omulume n'omukazi?›* 5 Anashuba kuderha ntya: ‹Cho girhumire omulume aleka eshe na nyina, anabeera na mukaage, na bombi banaba mubiri muguma.›* 6 Leero, barhachiba babiri, sy'aliko bamaaba muntu muguma. Cho girhumire, echi Nnamahanga ashwekere, harhabaga chiro n'omuntu wagishwekuula.»

7 Abo Bafarisaayo, baashuba kumubaza ntya: «Charhumaga leero Muusa arhegeka oku omulume aleme aha mukaage amaruba m'okulekana egihe ashondere kumuyegula?» 8 Yeesu abashubiza ntya: «Muusa abayemeereraga oku muleme mwayegula bakenyu, elugulu w'emirhima yenyu mizibu. Aliko gurhenga oku murhondero, birhaliiri ntyo. 9 Leero nyoono mbabwirire oku, nk'omuntu alekeene na mukaage, nka burhali buhushi bonyine burhumire, n'ogushuba gushaba owindi, oyo muntu amenye oku ajirire obuhushi.»

10 Abigirizwa ba Yeesu baaja bamubwira ntya: «Akaba buhushi bonyine bo bwagarhuma omulume alekana na mukaage, gasi ogushaba gurhagwerhe akamaro!» 11 Yeesu abashubiza ntya: «Abantu booshi barhakagala kuyemeera echi chinwa, barhali balaala bonyine Nnamahanga aheere obuhashe. 12 Kwenge hali abantu baguma barhagala gushaba, bulaala baburhwaga eyi bali ntazi, abandi bajirirwe ntazi n'abantu, abandi bachijirire bonyine ntazi elugulu w'ogukolera oBwami bwa Nnamahanga. Leero, ola wakagala kuyemeera eyi myaazi, ayiyemeere!»

13 Abantu baguma baja baleerhera Yeesu abaana, y'abalambulire kw'efune omu kubasalirira. Aliko abigirizwa baage bakalihira abo bantu. 14 Yeesu aja abwira abo bigirizwa baage ntya: «Muleke abaana bayinje emwani, murhalemaga mwababuza, bulaala abantu bali nk'aba baana bo banyina oBwami bw'empingu.»

15 Yeesu agisha abo baana omu kubahira kw'efune. Oku buzinda arhenga ahoola.

16 Enyuma z'ebyo, muntu muguma ayegeera Yeesu, amubaza ntya: «Mwigiriza, menja machi nkwaneene kujira yi mbone akalamo k'esiku n'amango?» 17 Yeesu amushubiza ntya: «Girhumire wambaza elugulu wa menja? Hali muguma yenyine onaba mwinja! Leero, akaba oshondere kuja omu kalamo k'okuli, oleme wakenga amarhegeko ma Nnamahanga.» 18 Oyo muntu ashuba kumubaza ntya: «Marhegeko mahe?»

Yeesu amushubiza ntya: «Orhalemaga wayirha, orhalemaga wahusha, orhalemaga wazimba, orhalemaga wahamiriza obubeeshi, 19 oleme wakenga yisho na nyoko, onaleme wasiima abandi nk'oku ogisiima wenyine.»*

20 Oyo muntu amubwira ntya: «Ama marhegeko mooshi, gurhenga miira, nanjira nk'oku maderhere. Bichi kandi nkwaneene kujira?»

21 Yeesu ashuba kumubwira ntya: «Akaba oshondere kuba muntu okwaneene, ogende, oguze ebintu byaawe byooshi, n' efuranga wabona, ozigabire abakene. Ntyo, waaba wachibikire obuchire empingu. Oku buzinda, ogaluke onkulikire.»

22 Aliko, oyo muntu abeere ayunva ntyo, achigendera ey'agayire bweneene, bulaala aligwerhe obuchire bunene.

23 Yeesu aja abwira abigirizwa baage ntya: «Okuli mbabwirire oku bikomeere omuchire kuja omu Bwami bw'empingu! 24 Mbabwirire kandi oku biyoloheere bweneene engamiya kugera omu hirhule hy'esindani, ahaali h'omuchire kuja omu Bwami bwa Nnamahanga.»

25 Abigirizwa baage babeere bayunva ebyo binwa, basoomerwa bweneene. Baabaza ntya: «Nde leero wagachungulwa?»

26 Yeesu abaloleereza n'okubabwira ntya: «Ogu mwazi gurhakagalika oku bantu, aliko byooshi byakagalika emwa Nnamahanga.»

27 Petero aja amubwira ntya: «Tala! Rhwabo rhwalekere byooshi rhwanagukulikira. Leero bichi nji rhwabona?» 28 Yeesu ababwira ntya: «Okuli mbabwirire oku, omu gulu lihyaahya, nyoono Mwene oMuntu nji nayikala oku ntebe yaani y'obukuuze. Nenyu ekumi na babiri, mwankulikiire, nji mwayikala oku ntebe ekumi n'ebiri z'echami, omu gucha eshinja z'amooko ekumi na mabiri m'eIsraheeli.

29 «Na ngasi muntu walekere enju yaage, beene baabo n'abaali baabo, eshe na nyina, abaana changwa amashwa, elugulu waani, ayankirira kulusha kali egana. N'oku buzinda, nj'ahaabwa akalamo k'esiku n'amango. 30 Aliko bantu banene bali b'oburhanzi nji baaba bazinda, na banene bali b'obuzinda, nji baaba b'oburhanzi.»