1 Yeesu ashuba kuderha ntya: «Obwime bw'empingu bushusheene na nyina eshwa ly'emizabiibu wagendaga eseezi kuja gushonda abakozi b'ogukola omu shwa lyaage. 2 Ayunviikana n'abakozi guha ngasi muguma egicheri* ch'edinaari oku muzizi. Oku buzinda abarhuma omu shwa lyaage.

3 «Zabeere zaaba hoofu saa esharhu z'eseezi, ahuluka kandi. Abona abandi bantu omu mbuga barhagwerhe kaasi. 4 Ababwira ntya: ‹Nenyu, muje gukola omu shwa lyaani ly'emizabiibu. Nabakamasya nk'oku bihemere.› 5 Nabo baaja ebwa shwa.

«Zabeere zaaba saa ndarhu z'ezuuba, ashuba guhuluka n'ogurhuma abandi bantu omu shwa lyaage. Zabeere zaaba saa mwenda z'egolo, ashuba kujira ntyo.

6 «Zabeere zaaba hoofu saa kumi na nguma z'egolo, ashuba guhuluka n'ogushuba kubona abandi bantu bali omoola mbuga. Ababaza ntya: ‹Girhumire muyimangire hanoola ezuuba lyooshi buzira gukola?› 7 Nabo bamushubiza ntya: ‹Bulaala ntaaye warhuheere akaasi.› Aj'ababwira ntya: ‹Nenyu muje gukola omu shwa lyaani.›

8 «Lyabeere golo, ola nyina eshwa abwira omwimangizi w'akaasi kaage ntya: ‹Hamagala abakozi, onabahe omukamarho gwabo. Aliko, omu kubakamasya, orhonderere oku bala bakozi bayinjaga buzinda, onayuusize oku bala bayinjaga oburhanzi.› 9 Bala bakozi bajaaga omu shwa hoofu saa kumi na nguma z'egolo, bahika. Ngasi muguma akamarha gicheri chiguma ch'edinaari.

10 «Na Balaala barhonderaga akaasi eseezi, nabo bahika. Bakengeera oku boowe bakamarha chigabi chinene kulusha. Aliko nabo bakamarha ngasi muguma gicheri chiguma ch'edinaari.

11 «Abo bakozi babeere bakamarha cho, balundumira nyina eshwa. 12 Baderha ntya: ‹Aba bakozi bayinjaga buzinda, bakolere akaasi ka saa nguma yonyine. Gurhe wakagala kubakamasya kuguma neerhu, noobo rhwabo rhwaluhire n'ogukola olusiku looshi omu zuuba likalihire!› 13 Aliko nyina eshwa ashubiza muguma wabo ntya: ‹Ego mwira waani, ntagukangire. Ka rhurhaali rhuyunvikeene oku wakolera gicheri chiguma ch'edinaari oku muzizi? 14 Jaaga warhoola omukamarho gwawe, onagende. Byali nsimiisize nyenyine guha omukozi w'obuzinda omukamarho gungana n'ogwawe. 15 Wooyo okengerere oku ntagwerhe obuhashe b'ogukolesa ebikulo byaani nk'oku nshondere? Changwa ogwerhe obongwa bulaala nyoono ndi muntu mwinja?›»

16 Yeesu ashuba kuderha ntya: «Ntya kubiri, abali bazinda nji baaba barhanzi. N'abali barhanzi nji baaba bazinda.»

17 Lusiku luguma, Yeesu aliiri omu njira ezamukire omu gishagala ch'eYerusaleema. Arhoola entumwa zaage ekumi n'ebiri, aziheka eburhambi. Azibwira ntya: 18 «Muyunve! Rhwabano rhwazamuukira omu gishagala ch'eYerusaleema. Na mw'echo gishagala, nyoono Mwene oMuntu nahirwa omu maboko m'abakulu b'abadaahwa n'abigiriza b'eRhegeko. Abo bantu, bampana yi nyirhwe. 19 Banampira omu maboko m'abantu barhali Bayaahudi, nabo banshinyagulira, n'onkushuurha bwenene. N'oku buzinda bambamba oku musalaaba. Aliko oku lusiku lwagasharhu nji nafuuka.»

20 Enyuma w'ebyoola, muka Zebedayo n'abagala bayegeera Yeesu. Oyo mukazi afukama embere zaage omu kumuhema chintu chiguma. 21 Yeesu amubaza ntya: «Bichi oshondere?» Naye amushubiza ntya: «Amango waaba omu Bwami bwawe, orhegeke oku aba baana baani bombi bo bayikalage aha burhambi bwawe. Muguma ekulyo kwawe n'owindi ekulembe kwawe.»

22 Yeesu abashubiza ntya: «Murhamenyere echi muli mwahema. Ka mwakagala kunywa oku ngumbu y'amalibuko nanywa?» Bamushubiza ntya: «Rhwakagala.»

23 Yeesu aj'ababwira ntya: «Okuli, eyo ngumbu y'amalibuko, nji mwanayinywa ko. Aliko okuyikaza omuntu ekulyo kwani changwa ekulembe kwani, ebyo birhandolere. Aba nji bayikala ho, Daarha yenyine nj'ahira ho abantu arheganyize.»

24 Bala bandi bigirizwa ekumi babeere bayunva eyo myaazi, bagaya bwenene elugulu wa bala baana babiri ba Zebedayo.

25 Yeesu aja ahamagala abigirizwa baage booshi haguma, n'okubabwira ntya: «Muyinji oku omu bantu barhali Bayaahudi, abaami baabo banarhambula n'erume. N'abakulu baabo banabalibuza. 26 Aliko, birhalemaga byaba ntyo ahagarhi kenyu. Ahuubwe, oshondere kuba mukulu mu mwabo, abe mukozi wenyu. 27 Kandi, oshondere kuba w'oburhanzi mu mwabo, abe muja wenyu. 28 Kwenge nyoono Mwene oMuntu ntayinjaga mpu baleme bankolera, aliko nayinjire yi ndeme nakolera abandi, n'oguhaana akalamo kaani yi nchungule bantu banene.»

29 Yeesu n'abigirizwa baage, babeere bali barhenga eYeeriko, bantu banene bweneene bamukulikira.

30 Haliiri mpumi ebiri zaliiri ziyikeere eburhambi bw'enjira. Ezoola mpumi zabeere zayunva oku Yeesu yeri wagera, zayaama ntya: «Nnaweerhu, Mwene Daawudi! Orhubeere obonjo!»

31 Echigusho ch'abantu chabeere chayunva ntyo, chazikalihira n'okuzibwira oku zisire. Aliko ezoola mpumi zoowe, zagendekera kuyaama bweneene ntya: «Nnaweerhu, Mwene Daawudi! Orhubeere obonjo!»

32 Yeesu ayimanga, azihamagala n'okuzibaza ntya: «Gichi mushondere mbajirirage?» 33 Nazo zamushubiza ntya: «Nnaweerhu, rhwashonda ameesho meerhu mahumuulwe.» 34 Yeesu azibeera obonjo, azihuma oku meesho, ho n'aho ameesho maazo mabona. Nazo zaja zamukulikira.