1 Mw'ezoola siku, Heroode waliyimire omu gihugo ch'eGalilaaya, ayunva baderha elugulu wa Yeesu. 2 Abwira abashamuka baage ntya: «Oyu muntu ali Yohaana Mubatiiza wafuukire! Cho girhumire agwarha obuhashe b'okujira ebisomereene.»

3 Heroode abaaga ashwekesize Yohaana. Aderha oku bamushweke banamukabule omu munyororo, elugulu wa Herodiya muka Firipo. Oyo Firipo aliiri mwene waabo Heroode. 4 Kwenge Yohaana alibwiriire Heroode ntya: «eRhegeko lyeerhu lirhakuyemereere okw'oshabe oyu Herodiya!» 5 Heroode alishondere kuyirha Yohaana, aliko aliyuubahire abantu, kwenge booshi balirhoolere Yohaana nka muleebi.

6 Olusiku lukulu l'okuyibuka okuburhwa kwa Heroode lwabeere lwahika, mwali wa Herodiya azina embere z'abalaalikwa. Oko kuzina kwage kwasiimisa bweneene Heroode. 7 Echo charhuma amulaganya kugerera endahiro oku amuha ngasi chintu chooshi ahema. 8 Oyo munyere abeere ahema nyina ehano, abwira Heroode ntya: «Ompereeze bonabuno erhwe lya Yohaana Mubatiiza oku mbale.»

9 Mwami ababazwa bweneene, aliko elugulu w'endahiro ajiraga embere z'abalilalikiirwe, arhegeka okw'oyo munyere ahaabwe erhwe lya Yohaana. 10 Ava arhuma muntu muguma aje omu munyororo gucha erhwe lya Yohaana. 11 Baleerha elyo rhwe oku mbale, baliheereza oyo munyere, naye alihekera nyina. 12 Oku buzinda, abigirizwa ba Yohaana bayinja gurhoola omubiri gwage, banaja kuguhamba. Eyi myaazi, baaja kuyibalira Yeesu.

13 Yeesu abeere ayunva ntyo, arhenga ahoola n'echombo, n'okuja yenyine ahantu harhali bantu. Abantu babeere bayunva ntyo, barhenga omu bishagala byaabo, bamukulikira n'amagulu. 14 Yeesu abeere arhenga omu chombo, abona echigusho chinene ch'abantu, abafiira obonjo, anafumya abalwala baliiri omu bo.

15 Lyabeere golo, abigirizwa baage bamuyegeera n'okumubwira ntya: «Hano, rhuli omu mpinga bwanayirire. Cho girhumire oleke aba bantu bagende omu bishagala yi bagule ebiryo.» 16 Aliko Yeesu ababwira ntya: «Aba bantu, barhakwaneene kugenda. Mwabo mwenyine mubahe ebiryo.» 17 Nabo, bamubwira ntya: «Waliha! Rhugwerhe hano migati erhaano na fi ebiri byonyine.» 18 Yeesu ababwira ntya: «Munderhere byo hano.»

19 Yeesu aja arhegeka echigusho ch'abantu bayikale oku byaasi. Arhoola eyo migati erhaano n'ezo fi ebiri, ayerekeza ameesho empingu n'ogukuuza Nnamahanga. Ayichagulanga, anayiha abigirizwa baage. Nabo bayigabira echigusho ch'abantu. 20 Abo bantu booshi balya n'okuyugurha. Abigirizwa babeere bagusha ebyayoorhaga, byayunjuza rhurhanda ekumi na rhubiri. 21 Abantu balyaaga ebyo biryo, baliiri hoofu balume bihumbi birhaano, buzira kuganja abakazi n'abaana.

22 Enyuma z'aho, Yeesu arhegeka abigirizwa baage baje omu chombo, banamurhange eshiiriza y'enyanja. Yeewe, ayoorha aseezera echo chigusho ch'abantu.

23 Abeere amabaseezera, azamuukira yenyine oku musozi gusaliira Nnamahanga. Obudufu bwahika eyi achiri yo yenyine. 24 Mw'ebyo bishanji, echombo chabaaga chahikire omu muhengere. Omulaba gwagihulukira embere. N'ogo mulaba gwarhondera kulwisalwisa echo chombo. 25 Yabeere miseke, Yeesu aja emunda abigirizwa baage baliiri eyi ali alambagira oku nyanja. 26 Abigirizwa babeere bamubona ali alambagira oku nyanja, bayuubaha bweneene, banaderha ntya: «Muzimu oliira!» Banarhondera kuyaama elugulu w'obuuba. 27 Ho n'aho Yeesu ababwira ntya: «Mugihe omurhima! Nyoono onoola! Murhayuubahaga.»

28 Petero amushubiza ntya: «Nnaweerhu! Akaba okuli onali wooyo, onyemeerere nyinje oku nyanja emunda oli.» 29 Yeesu amubwira ntya: «Yinja!» Ho n'aho Petero arhenga omu chombo y'aje emunda Yeesu ali, eyi ali alambagira oku nyanja. 30 Aliko abeere abona omuhusi gukalihire, ayuubaha, anarhondera kuyika. Aliika omulenge omu kuderha ntya: «Nnaweerhu! Onchungule!» 31 Yeesu ava alambuula efune amugwarha. Anamubwira ntya: «Ego muntu w'obwemeezi bugeeke! Charhumaga wayuubaha?»

32 Yeesu na Petero babeere bashonera omu chombo, endeera yaaba. 33 Abaliiri omu chombo, bafukama embere za Yeesu n'okuderha ntya: «Okuli, oli Mwene Nnamahanga!»

34 Yeesu n'abigirizwa baage babeere bayambuka enyanja, bahika omu gihugo ch'eGenezareeti. 35 Abantu b'eyo babeere barhegeerera Yeesu, barhuma omwazi ngasi hooshi mw'echo gihugo. Banamuleerhera abalwala booshi. 36 Bamuyinginga aleke bahume chiro oku mushoojo gw'efulema yaage. Na booshi baguhumaga ko, bafuma.