1 Yeesu abeere amala kuderha eyo myaazi yooshi, abwira abigirizwa baage ntya: 2 «Muyinji oku hayoorha siku ebiri embere olusiku lukulu lw'ePaasaka luhike. Munayinji oku nyoono Mwene oMuntu nalenganywa yi mbambwe oku musalaaba.»

3 Abakulu b'abadaahwa n'abashamuka b'aBayaahudi babuganana emw'omudaahwa mukulu, oyirikwa Kayaafa. 4 Bajirira Yeesu akaligi k'oku mufarha omu bwibisho yi bamuyirhe. 5 Aliko baderha ntya: «Rhurhamufarhaga omu olusiku lukulu lw'ePasaka, y'olwamo lurhaba omu lubaga.»

6 Yeesu abeere ali omu gishagala ch'eBetaniiya, aja omu nju y'omuntu muguma oyirikwa Simooni. Oyo Simooni aliiri mubenzibenzi. 7 Babeere bali balya, mukazi muguma ayegeera hoofu na Yeesu. Oyo mukazi aligwerhe omukebo* guyunjwire amarashi m'agachiiro kanene. Anasheeshera oku rhwe lya Yeesu. 8 Abigirizwa ba Yeesu babeere babona ntyo, bagaya bweneene. Baderha ntya: «Girhumire oyu mukazi aheza ama marashi busha? 9 Ama marashi mankaguzizwe oku gichiiro chinene bweneene, n'efuranga mankagulirwe mo, zagarhabeere abakene!»

10 Aliko Yeesu amenya oko kugaya kwabo. Oko kw'arhuma ababaza ntya: «Girhumire mwalunza oyu mukazi ntya? Ka girhali chijiro chinja echi ankolere? 11 Abakene baaba haguma nenyu esiku zooshi, sy'aliko nyoono ntaaba haguma nenyu esiku zooshi. 12 Oyu mukazi anshigire amarashi omu gurheganya oguhambwa kwani. 13 Okuli mbabwirire oku omu gulu lyooshi, ngasi hantu oMwazi Mwinja nji gwaba guli gwabalwa, nji balema baderha elugulu w'echijiro oyu mukazi ajirire. Elugulu w'oko, oyu mukazi alema ayibukwa.»

14 Enyuma z'ebyo, muguma omu ntumwa ekumi n'ebiri za Yeesu, oyirikwa Yuuda Isikariyooti, aja emw'abakulu b'abadaahwa. 15 Ababaza ntya: «Bichi mwampa akonva mbahere Yeesu?» Bamuha bicheri makumi masharhu by'efuranga*. 16 Gurhengera amo mango, Yuuda arhondera gushonda obulyo abaheereza mo Yeesu.

17 Olusiku lurhanzi lw'esiku y'edinye y'emigati nzira chachu, abigirizwa ba Yeesu bamuhikira n'okumubaza ntya: «Ngahe oshondere rhugurheganyizage ebiryo by'ePaasaka?» 18 Yeesu abashubiza ntya: «Muje omu gishagala, emw'omuntu muguma. Oyo muntu, mumubwire ntya: ‹oMwigiriza aderhere oku egihe aliiri alinga chiri hoofu. Leero, omu mwawe mwalira ePaasaka haguma na bigirizwa baage.›» 19 Abo bigirizwa bajira nk'oku Yeesu abarhegekaga, barheganya ebiryo by'ePaasaka.

20 Lyabeere golo, Yeesu ayikala kulya ebiryo haguma n'entumwa zaage ekumi n'ebiri. 21 Babeere bali balya, Yeesu aderha ntya: «Okuli, mbabwirire oku muguma mu mwabo andenganya.» 22 Ogo mwazi gwagayisa bweneene abigirizwa. Elugulu w'oko, ngasi muguma arhondera kumubaza ntya: «Nnaweerhu! Ka nyoono?» 23 Yeesu abashubiza ntya: «Ola warhobeza chaligumiza naani omu mbale, ye wandenganya. 24 Nyoono Mwene oMuntu naafa gukulikirana nk'oku biyandikirwe elugulu waani omu Mandiko Matagatiifu. Aliko, buhanya oku muntu wandenganya! Oyo muntu, kwakabeere kwinja oku yeewe gurhaburhwa!»*

25 Yuuda wamulenganya, naye abaza ntya: «Mwigiriza! Ka nyoono?» Yeesu amushubiza ntya: «Wooyo wenyine waderhere!»

26 Babeere bachiri baalya, Yeesu arhoola omugati, akuuza Nnamahanga. Aguchagulanga, aguha abigirizwa baage. Aja ababwira ntya: «Murhoole ogu mugati mugulye, kwenge guno guli mubiri gwaani.» 27 Enyuma z'ebyo, arhoola engumbu, akuuza Nnamahanga. Ayiha bo n'okubabwira ntya: «Munywe ko mweshi, 28 kwenge eyila, eri shagama yaani, eyerekeene egihango Nnamahanga ajirire n'olubaga lwage. Eyo shagama yasheshekala omu guchungula bantu banene, yi bababalirwe ebyaaha byaabo. 29 Mbabwirire oku gurhengera zeene, ntagachinywa divaayi guhika olusiku nji nanywa empyaahya haguma nenyu omu Bwami bwa Daarha.»

30 Babeere bamala kuyimpa enyimpo, bazamuukira oku musozi gw'eMizeyituuni.

31 Yeesu aja abwira abigirizwa baage ntya: «Mu buno budufu, mweshi mwandeka. Kwenge biyandikirwe omu Mandiko Matagatiifu ntya:

‹Nayirha omungere w'entaama,

n'obuso bw'ezo ntaama nji bwashandaazwa.›*

32 «Aliko, amango nji nafuuka, nji nabarhanga eGalilaaya.»

33 Petero amubwira ntya: «Chiro akaba abandi booshi bagakuleka, nyoono ntagakuleka chiro n'ehityu!»

34 Yeesu amubwira ntya: «Okuli nkubwirire oku mw'obu budufu bwa zeene, embere oluhazi lubike, waaba eyi wamampakana gasharhu.»

35 Petero amubwira ntya: «Akaba bimpemere gufiira haguma naawe, nyemereere. Aliko ogukulahira, ntakagala chiro n'ehityu!» Abandi bigirizwa nabo booshi baderha ntyo.

36 Enyuma z'ebyo, Yeesu n'abigirizwa baage baja hantu haguma hayirikwa Getesemaani. Babeere bahika ahoola, Yeesu ababwira ntya: «Murhange muyikale hano, oku ndi naaja halira gusaliira.» 37 Yeesu agenda haguma na Petero na bagala babiri ba Zebedayo. Arhondera kuyunva amaganya n'okubabala bweneene omu murhima. 38 Ava ababwira ntya: «Mbabezwe bweneene omu murhima hoofu n'ogufa! Mubeere hano, munatarame haguma naani.»

39 Yeesu aja ashegera ahambere hityu, ayinama guhisa amalanga oku daho. Arhondera gusaliira omu kuderha ntya: «Daarha! Akaba byankagalika, eyi ngumbu y'amalibuko oyigeze hale naani! Aliko nachiro ntyo, birhabaaga nk'oku nyoono nshondere, sy'aliko obulonza bwawe bo bujirikanage.»

40 Enyuma, Yeesu agaluka halaala alekaga bala bigirizwa basharhu. Ababugaana bajire ero. Aja abwira Petero ntya: «Murhagalire gutarama haguma naani chiro saa nguma? 41 Mutarame munasalire yi murhajaaga omu bigeregezo, bulaala omurhima gukomeere, sy'aliko omubiri guli muzamba.»

42 Yeesu ashuba kubaleka kandi, agenda gusaliira obwakabiri, aderha ntya: «Daarha wee! Akaba eyi ngumbu y'amalibuko erhakagala kugera hale naani buzira nyoono kuyinywa ko, obulonza bwawe buje bwajirika!»

43 Abeere agaluka emunda abigirizwa baage baliiri, ababugaana kandi bajire ero, kwenge ameesho maabo maliiri malemereerwe n'ero. 44 Yeesu ashuba kubaleka anaja gusaliira Nnamahanga obwagasharhu. Asaliira kula ko na kula.

45 Oku buzinda, agaluka emunda abigirizwa baage bali. Ababwira ntya: «Muchilyamire munali mwahumuuka? Mulole! Egihe chahikire, bunoola nyoono Mwene oMuntu nahirwa omu maboko m'abanyabyaaha. 46 Muyimange, rhugende! Tala, ola wandenganya yoono akola ali hoofu!»

47 Yeesu abeere achiri aderha, ho n'aho Yuuda, muguma w'omu ntumwa zaage ekumi n'ebiri ahika. Oyo Yuuda aliiri haguma n'echigusho chinene ch'abantu baligwerhe engoorho n'enkoni. Abo bantu baliiri barhumirwe n'abakulu b'abadaahwa, n'abashamuka b'aBayaahudi. 48 Yuuda, ola wahanaga Yeesu, aliiri abayerekere echimenyeso akolesa. N'echo chimenyeso chaliderheere ntya: «Ola nahoobera, eyi yooyo, mumufarhe!»

49 Ho n'aho, Yuuda ayegeera Yeesu. Amubwira ntya: «Mahyo, Mwigiriza!» Oku buzinda amuhoobera. 50 Aliko Yeesu amubwira ntya: «Ego mwira waani! Echakuleerhere, ochijire.» Abo bantu baja bafarha Yeesu, banamushweka.

51 Muntu muguma omu baliiri haguma na Yeesu, ashoshoola engoorho yaage. Ava ayibanda omuja w'omudaahwa mukulu, amushinjibula ogurhwi. 52 Aliko Yeesu amubwira ntya: «Galula engoorho yaawe omu luuba lwayo. Kwenge booshi banalwa omu gukoleesa engoorho, nabo nji bayirhwa n'engoorho. 53 Wooyo, orhenji oku nakagala guhema Daarha okw'antabaale, ho n'aho anantumira abamalahika banene kulusha bigusho ekumi na bibiri?* 54 Aliko nk'antumiire bo, leero gurhe aMandiko Matagatiifu makayeenera? Amo Maandiko maderhere oku eyi myaazi yooshi, ekwaneene kuba ntya!»

55 Yeesu aja abaza abo bantu ntya: «Girhumire mwayinja nkufarha n'engoorho n'enkoni, nka kulaala abantu baaja gufarha egishumuusi? Oku ngasi lusiku naliiri nayikala omu Nju ya Nnamahanga eyi ndi nayigiriza abantu, aliko murhanfarhaga. 56 Ebi byooshi byajirikeene, y'ebinwa byooshi biyeenere ebi abaleebi baderhaga omu Mandiko Matagatiifu.»

Oku buzinda, abigirizwa baage booshi bamuleka, balibirha.

57 Abo bantu bafarhaga Yeesu, bamuheeka emw'oMudaahwa Mukulu oyirikwa Kayaafa. Eyoola y'abigiriza b'amarhegeko n'abashamuka b'aBayaahudi balichigushire.Yeesu aburana embere za Kayaafa 58 Aliko Petero aliiri akulikira Yeesu omu bwibisho guhika aja omu chibuga ch'enju y'oMudaahwa Mukulu. Ayikala embuga haguma n'abalanzi y'abone oku byaaba.

59 Abo bakulu b'abadaahwa n'abashamuka booshi b'akabuga gakulu k'aBayaahudi, bashonda obuhamiiriza bw'obubeeshi elugulu wa Yeesu yi bamuyirhe. 60 Bantu banene bayinja guhamiiriza ebinwa by'obubeeshi elugulu waage. Chiro akaba ntyo, babula echinwa bakagala kuyimangira ko yi bamuyirhe.

Oku buzinda, bantu babiri bahika 61 n'okuderha ntya: «Oyu muntu aderhere ntya: ‹Nangashanda eNju ya Nnamahanga n'ogushuba kuyiyumbaka omu siku esharhu.›»

62 oMudaahwa Mukulu aja ayimanga n'okubaza Yeesu ntya: «Nta chinwa n'echiguma washubize kw'ebi binwa byooshi aba bantu bagusidakire ko?» 63 Aliko Yeesu agisirira. Oyo Mudaahwa Mukulu ashuba kumubwira ntya: «Nguhemere oku ziino lya Nnamahanga ozeene, olahire akaba arhali wooyo we Kirisitu, Mugala wa Nnamahanga!» 64 Yeesu amushubiza ntya: «Wooyo wenyine wamaderha ko! Leero mbabwirire oku gurhengera buno, mwabona gurhe nyoono Mwene oMuntu nyikeere ekulyo kwa Nnamahanga w'obuhashe. Na ntyo, mwabona gurhe nyinjire gurhenga empingu omu bichu.»

65 Oyo mukulu w'abadaahwa, abeere ayunva ntyo, achiberera kw'emyambalo. Aderha ntya: «Oyu muntu adukangire Nnamahanga! Buhamiiriza buchi rhwagishonda? Mulole! Ka murhayunvirhe mwenyine oku amadukanga Nnamahanga? 66 Gurhe si mubwene?» Nabo, bamushubiza ntya: «Akwaneene afe!»

67 Baguma omu bo, bamuchiira omu malanga n'okumushuurha ebifundo. N'abandi bamushuurha ebigalo, 68 n'okumubwira ntya: «Wooyo Kirisitu, leeba nde wagushurhire!»

69 Mw'ebyo bishanji, Petero aliiri ayikeere embuga. Mukozi muguma w'omukazi amuyegeera, anamubwira ntya: «Naawe, waliiri haguma na Yeesu w'eGalilaaya.» 70 Aliko Petero ahakana embere z'abantu booshi baliiri ahoola, aderha ntya: «Ebyo washonda kuderha, ntabimenyere!»

71 Enyuma z'ebyo, Petero arhenga ahoola, aja ebwa mulyango g'olugo. Owindi mukozi muguma w'omukazi naye amubona, abwira abantu baliiri ahoola ntya: «Oyu muntu, aliiri haguma na Yeesu w'eNazareeti.» 72 Aliko Petero ashuba kulahira ntya: «Mpakanire okw'oyo muntu ntamuyinji!»

73 Enyuma z'ebishanji bigeeke, abantu baliiri baliyimangire aho, bayegeera Petero n'okumubwira ntya: «Okuli, oli muguma waabo, kwenge oluderho lwawe luchiyerekeene bwinja!» 74 Petero ava arhondera kuderha ntya: «Akaba nderhere obubeeshi, nvumwe! Nahakanire okw'oyo muntu, nyoono ntamuyinji!» Ho n'aho oluhazi lwabika.

75 Petero ava ayibuka ebinwa Yeesu amubwiraga ntya: «Embere oluhazi lubike, waaba eyi wamampakana gasharhu okw'orhanyinji.» Aja ahuluka n'ogurhondera kulaka n'amaganya manene.