1 Mw'ebyoola bishanji, abigirizwa ba Yeesu bamuhikira n'okumubaza ntya: «Nde oli mukulu kulusha abaabo omu Bwami bw'empingu?»

2 Yeesu ahamagala omwana mudoorho, amuhira ahagarhi kaabo. 3 Aderha ntya: «Okuli, mbabwirire oku akaba murhahindamwire oboorhere bwenyu n'okuba nk'abaana badoorho, murhakaja omu Bwami bw'empingu. 4 Leero, ngasi yeeshi ogirhonda nk'oyu mwana mudoorho, oyo ye nji waaba mukulu omu Bwami bw'empingu. 5 N'olaala oyankirire omwana mudoorho nk'oyuula oku ziino lyaani, eyi nyoono nyayankirire.»

6 «Mwaba baana badoorho banyemereere, nk'omuntu mulebe abeere mpanvu yogurhuma muguma omu bo ajira echaaha, kwakabeere kwinja kw'oyo muntu gushwekerwa olushyo omu gosi, anakabulwe omu nyanja. 7 Buhanya oku gulu, elugulu w'ebintu biyunjwire mo by'okuyoohya abantu bajire ebyaaha! Ebyo bintu bikwaneene kuba ho, aliko buhanya oku muntu bihulukire ko!

8 «Nk'efune yaawe changwa okugulu kwawe byagarhuma wajira echaaha, obiche onabikabule hale naawe. Kwenge kuli kwinja oku wooyo, oje ahantu h'akalamo k'okuli, ey'ogwerhe kuboko kuguma changwa kugulu kuguma. Kuli kwinja ahali h'okuba n'amaboko mombi changwa amagulu mombi, n'ogukabulwa omu muliro gw'esiku n'amango. 9 Kandi, nk'eliisho lyaawe lirhumire wajira echaaha, oliyoomole onalikabule hale naawe. Kwenge kuli kwinja oku wooyo, oje ahantu h'akalamo k'okuli, ey'ogwerhe liisho liguma, ahali h'okugwarha ameesho mombi, onakabulwe omu muliro gw'esiku n'amango.»

10 «Muchilange! Murhalemaga mwabonerera chiro n'omuguma mw'aba baana badoorho, kwenge mbabwirire oku bamalahika baabo barhuula bali esiku zooshi embere za Daarha oli omu mpingu. 11 [Kwenge nyoono Mwene oMuntu nayinjaga kunoola gulu yi nchungule balaala baliiri baherere.]

12 «Bichi mukengereere? Nk'omuntu agwerhe ntaama zaage egana, na nguma omu zo egahera, k'arhaleka zila zindi makumi gali mwenda na mwenda oku musozi y'aje gushonda ela yaherere? 13 Okuli mbabwirire, nk'ayibwene, ayimogera bwenene kulusha zila zindi makumi gali mwenda na mwenda zirhaliherere. 14 Ko n'oko, Yisho oli empingu, naye arhashonda chiro n'omuguma mw'aba baana badoorho ahere.»

15 «Nka mwene wenyu akujirire kubi, oje emunda ali kumuyeereka obubi bwage eyi muli mwembi mwenyine. Na nk'akuyunviirhe, mwanashuba kuba omu buguma. 16 Aliko nk'alahire gukuyunva, orhoole muntu muguma changwa babiri, onaje kumulola haguma nabo, yi ngasi chinwa chimenyikane bwinja oku buhamiiriza bwa bantu babiri changwa basharhu.* 17 Nk'alahire kuyunva abo bantu nabo, omenyese echigusho ch'abemeezi ogo mwazi. Na nk'alahire kubayunva nabo, omurhoole nka muntu orhenji Nnamahanga changwa nk'omufurhiisa w'amakooli.

18 «Okuli, mbabwirire oku byooshi mwalema mwashweka muno gulu, byalema byashwekwa n'omu mpingu, na byooshi mwalema mwashwekuula muno gulu, byalema byashwekuulwa n'omu mpingu.

19 «Okuli, nshubire kubabwira oku muno gulu, nka bantu babiri mu mwabo bayunvikeene omu guhema chintu chilebe, Daarha oli omu mpingu abaha cho. 20 Kwenge ahantu bantu babiri changwa basharhu bachigushire oku ziino lyaani, naani ndi ahagarhi kaabo.»

21 Enyuma z'ebyo, Petero ayegeera Yeesu n'okumubaza ntya: «Nnaweerhu, nka mwene weerhu ali anjirira amabi, kanga nkwaneene kumubabalira? Ka guhika ku kali mushanvu?» 22 Yeesu amushubiza ntya: «Nangwa! Ntakubwirire ok'omubabalire kali mushanvu konyine, sy'aliko guhika kali makumi gali mushanvu kali mushanvu.

23 «Cho girhumire, oBwami bw'empingu bushushanyizwe n'omwami muguma walishondere kumenya oluganjo lw'eminda abakozi baage balikwaneene kumujuha. 24 Abeere arhondera kujira olo luganjo, bamulerhera mukozi muguma waligwerhe omwinda gwage munene gw'etalanta* bihumbi ekumi. 25 Okubona okw'oyo mukozi arhaligwerhe obuhashe bw'okujuha ogo mwinda, nnahamwabo aja arhegeka oku bamuguze, baguze na mukaage, n'abaana baage n'ebintu byooshi aligwerhe, y'ajuhe ogo mwinda. 26 Oyo mukozi afukama embere za nnahamwabo n'okumuyinginga ntya: ‹Waliha, nguhemere orhange olinge, nakujuha omwinda gwawe gooshi.› 27 Oyo nnahamwabo abeera oyo mukozi obonjo, amubabalira ogo omwinda, ava amuleka agende.

28 «Oyo mukozi abeere agenda, abugaana owabo mukozi muguma waligwerhe omwinda gwage gwa bicheri egana by'efuranga. Amufarhira omu gosi n'okumuniguuza. Amubwira ntya: ‹Juha omwinda gwani juba!› 29 Oyo waabo mukozi afukama embere zaage, n'okumuyinginga ntya: ‹Maani, nguhemere orhange olinge! Nakujuha omwinda gwawe!› 30 Aliko alahira, anaja kumuhiriisa omu munyororo guhika amango nj'ajuha omwinda gwage.

31 «Abaabo bakozi babeere babona amujirire ntyo, bagaya bweneene. Baaja kubalira ola nnahamwabo byooshi byabeere. 32 Nnahamwabo aja ahamagaza oyo mukozi, amubwira ntya: ‹Wooyo oli mukozi mubi! Nyoono nalikubabaliire omwinda gwawe gooshi, bulaala walimpemere obonjo! 33 Leero wooyo, bulaala gurhe orhababalire owenyu mukozi nka kulaala naani nakubabaliraga?› 34 Oyo nnahamwabo agwarha oburhe bunene. Ava aderha oku oyo mukozi akabulwe omu munyororo y'ahanwe, guhika amango ajuha omwinda gwage gooshi.»

35 Oku buzinda, Yeesu aderha ntya: «Nenyu, ntyo ko n'oko Daarha oli empingu nj'abajirira, akaba ngasi muguma wenyu arhalema ababalira abaabo n'omurhima gwage gooshi.»