1 Chinoola cho gisisi Yeesu Kirisitu, aburhwaga mo: aliiri w'omu mulala gwa mwami Daawudi. Na Daawudi aliiri w'omu mulala gw'Abrahaamu.

2 Abrahaamu aburha Isaka.

Na Isaka aburha Yakobo.

Na Yakobo aburha Yuuda na beene baabo.

3 Na Yuuda aburha Pereesi na Zeera ku mukaage Tamaari.

Na Pereesi aburha Hesirooni.

Na Hesirooni aburha Aramu.

4 Na Aramu aburha Aminadaabu.

Na Aminadaabu aburha Nasoni.

Na Nasoni aburha Salumooni.

5 Na Salumooni aburha Bowazi ku mukaage Rahabu.

Na Bowazi aburha Obedi ku mukaage Ruuta.

Na Obedi aburha Yeese.

6 Na Yeese aburha mwami Daawudi.

Na Daawudi aburha Salomoono ku muka Uriya.

7 Na Salomoono aburha Robowamu.

Na Robowamu aburha Abiya.

Na Abiya aburha Asafu*.

8 Na Asafu aburha Yosafaati.

Na Yosafaati aburha Yoramu.

Na Yoramu aburha Uziya.

9 Na Uziya aburha Yotamu.

Na Yotamu aburha Ahaazi.

Na Ahaazi aburha Ezekiya.

10 Na Ezekiya aburha Manase.

Na Manase aburha Amoosi*.

Na Amoosi aburha Yoziyasi.

11 Na Yoziyasi aburha Yekoniya, na beene baabo omu mango aBaisraheeli baheekwaga omu gihugo ch'eBabilooni.

12 Enyuma y'okoola guheekwa eyoola munda, Yekoniya aburha Shalitiyeeri.

Na Shalitiyeeri aburha Zorobabeeli.

13 Na Zorobabeeli aburha Abiyuudi.

Na Abiyuudi aburha Eliyakiimu.

Na Eliyakiimu aburha Azoori.

14 Na Azoori aburha Sadooki.

Na Sadooki aburha Akiimu.

Na Akiimu aburha Elihuudi.

15 Na Elihuudi aburha Eliyezeeri.

Na Eliyezeeri aburha Mataani.

Na Mataani aburha Yakobo.

16 Na Yakobo aburha Yozefu. Oyo Yozefu ye waliiri eba wa Mariya.

Na Mariya ye waburhaga Yeesu olaala bayirika Kirisitu.

17 Ntya, gurhengera oku Abrahaamu guhika ku Daawudi hali bisisi ekumi na bine. Na gurhengera oku Daawudi guhika amango aBaisraheeli baheekagwa eBabilooni, hali bindi bisisi ekumi na bine. Kandi gurhengera oguheekwa eBabilooni guhika ku Kirisitu, hali bindi bisisi ekumi na bine.

18 Okuburhwa kwa Yeesu kw'aliiri ntya: Mariya, nyina wa Yeesu, alishambaazizwe na Yozefu. Aliko embere z'obuhya, abonekana okw'ali bukule. Obo bukule abuheekaga kugerera obuhashe bwa Muuka-Mutagatiifu. 19 Yozefu mushambaaza waage, aliiri muntu okwaneene embere za Nnamahanga, arhalishondere kumukoza eshoni embere z'abantu. Echo charhuma ahiga kumuleka omu bwibisho.

20 Yozefu abeere ali akengera kw'ogoola muhigo, malahika wa Nnaweerhu amubonekera omu biloorho anamubwira ntya: «Yozefu, mugala wa Daawudi, orhayuubahaga gufulusa mukaawe Mariya, kwenge abeere bukule oku buhashe bwa Muuka-Mutagatiifu. 21 Aburha omwana w'obuzaana, nji wamuyirika Yeesu, kwenge yeewe ye wachungula abantu baage gurhenga omu byaaha byaabo.»

22 Ebyoola byooshi byabaaga, y'ebinwa bijirike ebi Nnaweerhu aderhaga ntya kugerera omuleebi:

23 «Omunyere orhashubiraga kumenya omulume nj'aba bukule; nj'aburha omwana w'obuzaana.

Nji bamuyirika Manuweeri», kw'okuderha ntya: «Nnamahanga ali haguma neerhu.»

24 Yozefu abeere asisimuka, ajira ebi malahika wa Nnaweerhu amurhegekaga, afulusa mukaage. 25 Aliko arhalyaamaga na Mariya guhika amango aburhaga omwana w'obuzaana. N'oyo mwana, Yozefu amuyirika Yeesu.