1 Enyuma z'aho, Muuka-Mutagatiifu aheeka Yeesu omu mpinga yi Shetaani amugeregeze. 2 Ayuusize guchibuza kulya siku makumi mane ezuuba n'obudufu, ayunva enzara. 3 Shetaani ayinja anamubwira ntya: «Akaba onali Mugala wa Nnamahanga, rhegeka amala mabaale mahinduke migati.» 4 Yeesu amushubiza ntya: «Biyandikirwe omu Mandiko Matagatiifu ntya: ‹Omuntu arhakalama n'omugati gonyine. Aliko alama na ngasi Chinwa girhenga omu buunu bwa Nnamahanga.›*»

5 Shetaani amuheeka omu gishagala gitagatiifu ch'eYerusaleema. Amuyimanza elugulu w'eNju ya Nnamahanga, 6 anamubwira ntya: «Akaba onali Mugala wa Nnamahanga, gikabula ahashi, kwenge biyaandikirwe ntya:

‹Nnamahanga nj'arhegeka bamalahika baage,

nji bakuyankirira omu fune zaabo,

y'okugulu kwawe gurhasirhalaga oku baale.›»*

7 Yeesu amushubiza ntya: «Biyandikirwe omu Mandiko Matagatiifu ntya: ‹Orhalemaga wageregeza Nnaweerhu, Nnamahanga wawe.›*»

8 Shetaani ashuba kumuheeka oku musozi guleheere bweneene, amuyeereka amaami mooshi m'egulu n'obuchire bw'amo maami. 9 Amubwira ntya: «Biliira byooshi naguha byo ogafukama embere zaani omu kumparamya.» 10 Yeesu amushubiza ntya: «Rhenga hano, Shetaani! Kwenge biyandikirwe ntya: ‹Oleme waharamya Nnaweerhu Nnamahanga waawe, onamukolere yenyine.›*»

11 Oku buzinda, Shetaani aja aleka Yeesu, na bamalahika bayinja kumukolera.

12 Yeesu abeere ayunva oku Yohaana bamuhirire omu munyororo, aja eGalilaaya. 13 Arhenga omu gishagala ch'eNazareeti, aja kulama omu ch'eGaperinaumu eburhambi bw'enyanja y'eGalilaaya, omu gihugo ch'eZabuluni n'eche Nafutaali. 14 Ajiraga ntyo y'echinwa chijirike ech'omuleebi Isaya aderhaga ntya:

15 «Gihugo cha Zabuluni, n'eche Nafutaali,

gukulikira enjira y'ebwa nyanja, oku lunda lw'olwinji lw'eYorodaani,

omu gihugo ch'eGalilaaya. Eyo munda y'abarhali Bayaahudi balamire.

16 Olubaga lwalilamire omu mwizimya,

lwabwene obumoleke bunene,

n'abalilamire omu gihugo ch'omwizimya munene g'olufu,

nabo obumoleke bwabayinjire!»*

17 Gurhengera echoola gihe, Yeesu arhondera kuyigiriza ntya: «Muleke ebyaaha byenyu, kwenge obwime bw'empingu bwayegereere.»

18 Yeesu abeere ali alambagira eburhambi bw'enyanja y'eGalilaaya, abona abashaana babiri ba nda nguma, Simooni bashembulaga Petero na mwene waabo Ndereya. Baliiri barhoza omulaga gwabo omu nyanja. 19 Yeesu ababwira ntya: «Munkulikire, nabajira bashaana b'abantu.» 20 Ho n'aho Baaleka emilaga yaabo, bamukulikira.

21 Yeesu agerere embere bweneene, abona bandi bashyaana babiri ba nda nguma: Yakobo na mwene waabo Yohaana. Babaaga bali omu bwarho haguma n'eshe wabo Zebedayo, eyi bali bakwiza emilaga yaabo. Abo nabo, Yeesu abahamagala. 22 Ho n'aho Baaleka obwarho n'eshe wabo, bakulikira Yeesu.

23 Yeesu aliiri agera omu gihugo chooshi ch'eGalilaaya. Aliiri ayigiriza abantu omu masinagoogi maabo n'okubayigiriza oMwazi Mwinja gw'obwime bw'empingu. Analiiri afumya abantu bali balwere ngasi ndwala na ngasi bulema.

24 Erenge lyaage lyayandaala omu gihugo ch'eSuriya chooshi. Balimulerheere abantu booshi baliiri balibuka na ngasi ndwala n'abalizimuhirwe, abalilwere egichuli n'abalihunzize. Aboola booshi, Yeesu aliiri abafumya. 25 Abantu banene baliiri bamukulikira gurhengera omu gihugo ch'eGalilaaya, n'eche Dekapoli, n'omu gishagala ch'eYerusaleema, n'omu gihugo ch'eYudeeya, n'oku shiriza y'olwinji lw'eYorodaani.