ያህይ ለዕዮ መናመተ 18

ባብሎን ከተም ኡብተኔሃ

1 ህከኒች ኤተሮን ሎሩ ሹምነቱ ዮስ መላይኬቹ ሰሜች ድረን ለዕዮም፤ ህከን መላይከ ኬዕምኚች ኬዕዮሀኒን ኡለት አበ ኑር እክ ለልቶኡ። 2 ሎረ ላጋን «ሎረት ባብሎንቹት ኡቦኡ! ኡቦኡ! እሴን ሩሃንዩ ሄአኖ ቤቹ እኮኡ፤ ሂሉ አያኑ ጉዕሙንኩ ገለኖቤቹ እኮኡ፤ ኮፍይታለከ ግቤመሰ ጪኡትለከ ግዙ ጉዕሙንኩ ገለኖቤቹ እኮኡ።✝18፥2 ኢሳ. 13፥21፤ 21፥9፤ ኤር. 50፥39፤ 51፥8፤ መና. 14፥8። 3 መሰንትስ ዝነተ አእሴ ዎይን ጠጀ ኡመቲሃ ጉዕሚንከ አግሶኡ፤ ህትን ኣዱንያ አል ዎመት እሴን ሜጡበ ዝነተ አቶኡ፤ ህትን ኣዱንያ አል ነጋድት እሴ ልግቤ ናጠቀንሺን ኬዕዮሀኒን ቀባጣመተ እኮኡ» ይ ያሮ።✝18፥3 ኢሳ. 23፥17፤ ኤር. 51፥7።

4 ዎልት ላገንት ሰሜች

«ኢ ኡመቱ! እሴ ጩቢን በርገንቶኖቼ፤

እሴ አሌን አሜታ በላተ ቤቀማኑተ እኬንበገ፤

እሴ ኣዚች ፉሌ!✝18፥4 ኢሳ. 48፥20፤ ኤር. 50፥8፤ 51፥6፤ 45።

5 ጩብሴ በትኝት ሰማሃ ኢልቶቤቺሃ

መገኑ ብድልሴ ቃጎኡ።✝18፥5 ክል. 18፥20-21፤ ኤር. 51፥9።

6 እሴ ኣስቶ ጌሰ ኣስዬሴ፤

አቶ ሆጎተሴ ለሙ አፎ በርግቴን ባቼሴ፤

እሴ አደደ አጌኖሃ ልቀለቆ ጠበቴን

ለሙ አፎ ጠረኘ አቴን ልቀለቄ።✝18፥6 መዝ. 137፥8፤ ኤር. 50፥29።

7 እሴ ገይሴ ኬዕምኝለከ ናጀተ ኣስቶ ጌሰ

ኦርሸተለከ ሻዘነተ ኣስዬሴ፤

እሴን ቀልቤንከሴ

‹አን ዎመተ እክ አፉዕልዮም፤

ህዬሸተበአ፤

ሻዘነት ሆሮ ኢልታኤበአ› ይተን ቦንታኢት።

8 ህካን እኮቤቺሃ በለት ጉዕሙንኩ መቶ በሬን ኢልታሴ፤

ሬሁት፥ ሻዘነትለከ ጎሩ ኢለኖሴ፤

ጊራን ቡባአ፤

እሴ አሌን ፈረደኖሁ

ቀርቹ መገኑ ጠረኘሃን» የን ሞጮጬም።

9 እሴን ሜጡበ ዝነተ አቶእሩለከ ናጃን ሄኦ ኡለ ዎመት እሴ ቡበን ፉልታ ዉሊልተ ለኣ ወክት እሴተኔሃ ያርተን ኦኣአ። 10 እሰን ኦርሸሴ ዋጅት ቄዕራሻን ኡርት «አት ሎረ ከተንቾ! አት ጠረኘ ከተንቾ ባብሎነ! ፍርዱክ መቶ ሳኣት ጌሳን አሜቾቤቺሃ ኬሳሃ ቆሀኖሄ! ቆሀኖሄ!» ይታአ።✝18፥9-10 ሕዝ. 26፥16-17።

11 ሆጎቡሰ ከኒች ኤተሮን ህዕረኖሁ ዮበእቤቺሃ ኡለ አል ነጋድንት እሴተኔሃ ኦኣሴ፤ ሻዛሴ።✝18፥11 ሕዝ. 27፥31-36። 12 መርከባንከሰ ሆጎበሞ ዎርቀ፥ ብረ፥ ኬዕምኙ ዮስ ክኑ፥ ዕንቁ፥ ጡመ ኦድኑተ፥ ሰሜ ደኑለከ ብሸ ሊቀለቀሞ ኦድኑተ፥ ሃር ኦድኑተ፥ ብሸተ ኦድኑተለከ ጡሙ ፎገሉ ዮስ ሀቀ ጉዕመንከ፥ ዘኔ እንኩተ፥ አበ ጤአተ እኮ ሀቀሃ፥ ነሐሰ፥ ብረቲንለከ እብነ በረድ ክኒን መክሴመ ኦዳታ ጉዕመንከ፥ 13 ቀረፋተ፥ አንጀነተ፥ ከርብተ ዬኖ ጡሙገ አንጀኖርቹ፥ ህጣነ፥ ወይን ጠጀ፥ ወርች ዘይተ፥ ስልቀሞ ቀመ፥ አለሱ፥ ለሉ፥ ሆለተ፥ ፋርሱተ፥ ኬዕምኝ ጋርተ፥ ሮሰተለከ ዎሎሃ መነ እቅ።✝18፥12-13 ሕዝ. 27፥12፤ 13፤ 22። 14 እሰን «አት ሄዕላቶንት ጡሙርቹ ጉዕመንኩ ኪች ቄዕር መሮኡ፤ ቀባጡክለከ ሹልሙክ ጉዕሙንኩ በዕዮኡ፤ ከኒች ኤተሮን ህከረ ጉዕመንከ ሆሮ ደጋንትሰበአ» ይታሴ። 15 ህካን ጉዕመንከ ህዕርተን ቀባጣመተ እኮ ነጋድት ኦርሸሴ ዋጅት ቄዕራሻን ኡርታአ፤ ኦአንለከ ሻዘን✝18፥15 ሕዝ. 27፥31፤ 36። 16 «ጡመ ኦድኑተለከ ሰመ አጉደኖ ብሸ ኦድኑተ ኦደኣእት፥ ዎርቂንለከ ጤአተ እኮ ኪን ዕንቁንን በለቃ እቅት ሎረ ከተንቾተ ኣዬ! ኣዬ! 17 ኬንኩ ቀባጡት መቶ ሳኣት ጌሳን በዕዮ» ይታአ።

መርከብ ሀላፌቹ ጉዕሙንኩ፥ መርከቢን ሃንታ መኑ ጉዕሙንኩ፥ መርከብ አሌን አታ መኑ ጉዕሙንኩለከ ባር አሌን ነገዳ መኑ ጉዕሙንኩ ቄዕራሻን ኡርታአ፤✝18፥17 ኢሳ. 23፥14፤ ሕዝ. 27፥26-30። 18 እሴ ቡበን ፉልታ ዉሊልተ ለኦ ወክት «ተ ሎረ ከተንቹተ አጉደኖ ዎሉ ከተሙ ሄዕዮንዶ?» ይተን ያርቶኡ።✝18፥18 ሕዝ. 27፥32። 19 ህትን ቡዕልሰ አሌን ትበ አቶኡ፤ ኦአንለከ ሻዘን «ባር አሌን መርከቡ ዮሰሩ ጉዕሙንኩ እሴ ቀባጦን ቀባጣመተ እኮእሩ ህት ሎረ ከተንቹት መቶ ሳኣት ጌሳን በኦቤቺሃ ኣዬ! ኣዬ!» ይተን ያርታአ።✝18፥19 ሕዝ. 27፥30-34።

20 ሰሞሁ! እሴን ተሽ ዩንክ፤ መገኑ ክዕኔተኔሃ እሴ አሌን ፈረጆቤቺሃ አዕኑ ጠሊላኑት፥ አሳበትለከ ነብያኑት ተሽ ዩንክዕኔ!✝18፥20 ዘዳ. 32፥43፤ ኤር. 51፥48።

21 ከኒች ኤተሮን መቱ ጠረኙ መላይኬቹ ሎረ ርትም ክን ጌሰ መቱ ክኑ ኬሽ «ሎረት ባብሎን ከተንቹት ህት ዎልቃን ሀንበለንት ኡባአ፤ እሴን ከኒች ኤተሮን ሆሮ ደገንታበአ።✝18፥21 ኤር. 51፥63-64፤ ሕዝ. 26፥21። 22 ክራረ ዎቀርታሀኑኡለከ ሙዚቀኛኖ ላገቲ፥ ሁሉሌተ ቡሳሀኑኡለከ ጡሩምበ ቡሳ ላገት ከኒች ኤተሮን ኪን ሞጮጨመኖበአ፤ እኮስርቹ መክሰኖ ሀይመት ዮስ መንቹ ከኒች ኤተሮን ኪን ደገመኖበአ፤ ህትን ርትም ላገቲ ከኒች ኤተሮን ኪቤቾን ሞጮጨንታበአ።✝18፥22 ሕዝ. 26፥13፤ ኢሳ. 24፥8። 23 ኩራዙክ ከኒች ኤተሮን ኪቤቾን ለሊሰኖበአ፤ እዜቾለከ እዜች ላገት ከኒች ኤተሮን ኪን ሞጮጨመኖበአ፤ ነጋድክ ኣዱንያ አል ሎርሎራኑ መኑ ሄኦኡ፤ ሲርንከክ ኡመት ጉዕመንከ ሉሲሶንት» የን ባር አሌን ቶሬእ።✝18፥22-23 ኤር. 7፥34፤ 25፥10። 24 «ህትን ራጋኑት፥ ነብያኑት ኣዱንያ አሌን ሼመ መን ቄጉ ጉዕመንከ እሴ ኣዜን ደገሞኡ።» ዬእ።✝18፥24 ኤር. 51፥49።