1 Ʉnyenye antʉ akʉ Galatia nɨmɨapʉngʉ. Itɨɨ mʉlogilwe nʉ nyenyu? Mpola yang’wa Yesʉ Kilisito niya kʉkong’wa mʉmʉsalaba yiganʉɨwe kɨhenga pang’wanyu. 2 Ndoilwe kʉlɨnga kɨntʉ kɨng’wɨ kʉpuma kʉng’wanyu. Itɨɨ, Ng’wahʉ Ng’welʉ aɨmʉligilye kʉnsoko akʉamba malagɨɨlyo ang’wa Musa, ang’wɨ kʉnsoko akija nʉ kʉihʉɨɨla Nkani Nza? 3 Itɨɨ, ʉnyenye mɨapʉngʉne. Aɨmandilye likalo lanyu nʉlʉpya kʉ ngulu niya Ng’wahʉ Ng’welʉ, itungo ɨlɨ mʉloilwe kʉmaɨɨlya kʉngulu yanyune? 4 Itɨɨ, lwago lɨhi naɨmagile latula anakanda ne? Kʉlʉ kʉʉlʉ shanga ihumɨkile. 5 Itunda wɨmʉpeza Ng’wahʉ Ng’welʉ wakwe nʉkʉtenda mɨʉkʉɨlwa mʉng’wanyu kʉnsoko mʉtyatile malagɨɨlyo ang’wa Mʉsa ne? Ang’wɨ kʉnsoko akija nʉ kʉhʉɨɨla Nkani Nza ne?

6 Wandɨkwa wang’wi Itunda wandɨkilwe, "Ibulahimu naɨʉmʉhʉɨɨe Itunda, nʉ kʉʉhʉɨɨla kʉng’wakwe Itunda wɨkamʉgomba." 7 Itɨ gwa, lɨngi kɨna antʉ nɨamʉhʉɨɨe Itunda wawo ana ang’wa Ibulahimu. 8 Wandɨkwa wang’wi Itunda wandɨkilwe kɨna, kʉpuma ɨkalɨ Itunda aɨʉapee ʉhumi antʉ nɨshanga Ayahudi agombeke kʉng’wakwe kʉkɨɨla ʉhʉɨɨlɨ, kʉlʉlo Itunda aɨwandilye hanza kʉmʉɨla ʉ Ibulahimu Nkani Nza wazelʉnga, "Kʉkɨɨla ʉewe antʉ nɨshanga Ayahudi akʉkembetwa." 9 Kʉlʉlo, antʉ ɨhi nɨahʉɨɨe ɨkembetwa palʉng’wɨ nʉ Ibulahimu naɨʉhʉɨɨe.

10 Ingɨ antʉ ɨhi nɨasanilye kʉgunwa kʉkɨɨla kʉtenda makani natakɨwe mʉ malagɨɨlyo ang’wa Musa, antʉ nɨanso azʉmilwe ni Itunda. Kʉnsoko Wandɨkwa wang’wi Itunda wandɨkile kɨna, "Mʉntʉ wɨhi nɨshanga ʉkʉtyata nʉkʉtenda makani ɨhi naandɨkilwe mʉmalagɨɨlyo ang’wa Musa, nʉwanso ʉzumilwe." 11 Itɨ ingi kɨhenga kɨna kʉtyata malagɨɨlyo shanga ihumile kʉmʉsasha mʉntʉ wagombeke kʉng’wi Itunda, kʉnsoko yandɨkilwe itɨ, "Mʉntʉ nʉkʉmʉhʉɨɨla ʉkishiɨ kʉ ʉhʉɨɨli." 12 Ingɨ malagɨɨlyo ang’wa Mʉsa shanga asanilye anga ʉhʉɨɨli, ingɨ Mʉwandɨkwa yandɨkilwe itɨ, "Mʉntʉ wɨhi nʉkʉsania makani natakɨwe mʉ malagɨɨlyo ang’wa Musa ʉkishiɨ kʉtyata malagɨɨlyo nanso."

13 Ingɨ ʉ Kilisito aɨʉkʉkomoe kʉhege mʉkɨzʉmo ka malagɨɨlyo naɨʉhoile kɨzʉmo nɨkanso kʉnsoko itʉ, kʉnsoko wandɨkwa wandɨkilwe kɨna, "Mʉntʉ wɨhi nʉkʉkong’wa mʉ mʉsalaba ʉzʉmilwe." 14 Aɨʉkʉkomoe ingɨ ʉkembetwa naɨʉpewe ʉ Ibilahimu ʉkʉpikɨɨle antʉ ɨhi mihɨɨ kʉkɨɨla Yesʉ Kilisito, kʉhume kʉmʉsɨngɨɨlya Ng’wahʉ Ng’welʉ, ʉyʉ ni Itunda naɨʉtambʉe ʉkʉʉpa.

15 Anyandʉgʉ ane, ndoilwe nʉmʉpe mpyani kʉkɨɨla mʉlikalo nʉla mahikʉ ɨhi, sɨgi ilago nila antʉ abɨɨlɨ, anga ilage kʉtilɨ mʉntʉ nʉhumile kʉkaɨla ang’wɨ kongeelya kɨntʉ kɨhi. 16 Itɨ gwa, ilago Itunda naɨʉmʉlagile ʉ Ibulahimu, ng’wenso palʉng’wɨ nʉ ng’waakwe. Shanga yandɨkilwe ne kɨna "nɨana akwe," kɨna ɨdʉ, ingɨ yandɨkilwe, "Nʉ ng’waakwe," ingɨ ʉng’wɨ ʉdu, nʉyo ingɨ ʉ Kilisito. 17 Ndoilwe kʉlʉnga itɨ, Itunda aɨʉɨkile ilago lakwe myaka magana annɨ nɨ makʉmi ataatʉ nakɨile nʉkʉkamɨnkɨɨlya ɨze akɨlɨ malagɨɨlyo ang’wa Musa, kʉlʉlo malagɨɨlyo nanso shanga ahumile kʉheja ilago nɨlanso ang’wɨ kʉkaɨla. 18 Anga ɨze kɨpegwa kang’wi Itunda kɨpata kʉtyata malagɨɨlyo, shanga ihumile kʉsania hangɨ ilago lang’wi Itunda, kɨmbʉki kɨna Itunda aɨʉmʉkembetile ʉ Ibulahimu kʉnsoko ilago.

19 Kʉnɨkɨ gwa ɨmalagɨɨlyo ɨkaɨkwa? Malagɨɨlyo aɨaɨkilwe kʉnsoko akʉlagɨɨla magazo a antʉ kʉpikɨɨla nʉʉzɨɨe Ng’wana wang’wa Ibulahimu naʉtewe milago nɨlanso Itunda naɨʉlɨɨye kɨna ʉzile. Itunda aɨʉmʉpee malagɨɨlyo Mʉsa kʉkɨɨla malaɨka, Musa nʉyo wɨkaapa ɨantʉ. 20 Ingɨ kʉlʉ kʉʉlʉ mʉntʉ wakɨgwa anga ɨze ʉlʉkani la mʉntʉ ʉng’wɨ du, ingɨ Itunda ʉng’wɨ ng’wenso aɨʉɨkile ilago nʉ Ibulahimu shanga aɨʉlagɨɨye anga mʉntʉ.

21 Itɨɨ, kʉlʉnge malagɨɨlyo ahutanilene nɨ malago ang’wi Itunda? Anga ɨze malagɨɨlyo napumigwe aɨazehuma kʉapa antʉ ʉpanga, itɨ gwa aɨkʉzegombwa pang’wi Itunda kʉkɨɨla kʉtyata malagɨɨlyo. 22 Ingɨ wandɨkwa wang’wi Itunda wandɨkile kɨna, mʉlandʉ ʉkete ngulu mʉ intʉ yɨhi, kʉlʉlo antʉ ɨhi nɨamʉhʉɨɨe ʉ Kilisito akʉsɨngɨɨlya kɨntʉ ɨko naɨʉtambʉe Itunda.

23 Antʉ naɨakɨlɨ kʉmʉhʉɨɨla ʉ Kilisito, aɨkʉkolɨ mʉkɨtungo ka malagɨɨlyo, aɨza kʉlindɨɨe ʉkʉnʉkʉlwe ʉhʉɨɨli nʉwanso. 24 Kʉlʉlo, malagɨɨlyo aɨmʉleli witʉ kʉpikɨɨla naɨwaza ʉ Kilisito, kʉhume kʉgombeka kʉng’wi Itunda, kʉkɨɨla kʉmʉhʉɨɨla ʉ Kilisito. 25 Ingɨ itungo ɨlɨ kʉnsoko ʉhʉɨɨli waza, kʉlʉlo ʉsese kɨkʉtilɨ kʉ mʉleli.

26 Kʉkɨɨla ʉhʉɨɨli wanyu, ʉnyenye mɨhi maina mɨana ang’wi Itunda kʉnsoko akʉkamɨnkana nʉ Kilisito Yesʉ. 27 Ʉnyenye mɨhi nɨmʉbadisigwe makamɨnkana nʉ Kilisito, kʉlʉlo mimpyanile nʉ Kilisito. 28 Kʉlʉlo, shanga kʉikoma hangɨ kɨna ʉyʉ Mʉyahudi ang’wɨ Mʉyunani, mʉtʉʉng’wa ang’wɨ shanga mʉtʉʉng’wa, mitʉnja ang’wɨ mʉsʉngʉ, kʉnsoko ʉnyenye mɨhi maina kɨntʉ kɨng’wi kʉkɨɨla kʉkamɨnkana nʉ Kilisito Yesʉ. 29 Ʉnyenye mɨantʉ ang’wa Kilisito, kʉlʉlo maina miele lang’wa Ibulahimu, hangɨ mʉkʉpegwa maintʉ Itunda naɨʉmʉtambʉɨe ʉ Ibulahimu kɨna ʉkʉmʉpa.