1 Itɨ gwa kʉlʉnga kɨna, mʉsali nʉwakɨlɨ mʉng'enya nʉmʉdabʉ, wɨhanga mʉtʉʉng'wa palʉng'wɨ nʉkʉtula insao yɨhi yakwe. 2 Matungo ɨhi nʉwanso wɨsʉngwa nɨ aleli ang'wɨ ɨmɨɨli kʉpikɨɨla lɨpike itungo nɨlɨɨkilwe nihe. 3 Papo nʉ sese ga, naɨkʉkɨlɨ kɨang'enya, aɨkɨatʉʉng'wa a ntendo niya mʉʉnkumbigʉlʉ ʉwʉ. 4 Ingɨ matungo naɨapikɨɨla, Itunda wɨkamʉtʉma Ng'waakwe mʉʉnkumbigʉlʉ ʉwʉ. Ng'waakwe nʉwanso wɨkatʉgwa nʉ mʉsʉngʉ waze ʉtongilwe nɨ malagɨɨlyo ang'wa Mʉsa, 5 waakomole antʉ naɨatongilwe nɨ malagɨɨlyo ingɨ ʉsese Ayahudi kʉhume kʉtula kɨana ang'wi Itunda.

6 Kʉnsoko ʉnyenye mɨana akwe, Itunda ʉmʉtʉmile ʉ Ng'wahʉ nʉwa Ng'waakwe mʉnkolo yanyu, Ng'wahʉ nʉwanso yʉyo wɨkʉsasha ʉsese kʉmitange Itunda, "Aba." ndogoelyo akwe ingɨ "Tata witʉ." 7 Kʉlʉlo gwa ʉnyenye shanga mɨatʉʉng'wa hangɨ, maina wɨ ng'wana, kʉnsoko ʉnyenye maina mɨana, Itunda ʉkʉpa maintʉ ɨhi nʉaɨkɨɨye ɨana akwe.

8 Pakalɨ naɨmʉkɨlɨ mʉmʉmanye Itunda, aɨmɨatʉʉng'wa aalʉngʉ nɨshanga Itunda nʉwa tai. 9 Ingɨ itungo ɨlɨ kʉnsoko mamʉmanya Itunda nʉwa tai, Itunda nʉyo wamʉmanya ʉnyenye. Mʉhumile ʉlɨ hangɨ kʉtʉmɨkɨla ntendo niya ʉnkumbigʉlʉ nɨshanga yikondanɨɨe hangɨ ningila anga ngulu? 10 Mʉkɨlɨ mʉkiloeelya lʉhikʉ ne ang'wɨ ng'weli nʉʉpya ang'wɨ matungo ang'wɨ myaka. 11 Mampeza woa, kɨna mʉlɨmo naɨnitʉmile kʉnsoko anyu, aɨnitʉmile nakanda.

12 Anyandʉgʉ ane kʉminena tuli anga ʉnene mʉleke kʉtongwa nɨ malaɨɨlyo, anga ʉnene naɨnɨlɨ. Naɨkine nʉnyenye shanga mɨkantendeela kɨntʉ kɨhi nikɨbɨɨ. 13 Ʉnyenye mʉlɨngile kɨna ndwala naɨndwae wenso aɨʉsankilye ʉnene mpantike lyoma lang'wandyo nɨla kʉmʉtanantɨlya Nkani Nza, 14 palʉng'wɨ nʉkʉtula aɨnʉmʉsakɨɨye magemo kʉ ʉlwae wane, ʉnyenye shanga aɨmʉnsuɨpile ang'wɨ kʉnihita, ingɨ aɨmʉnsɨngɨɨye anga nɨ malaɨka wang'wi Itunda ang'wɨ anga ʉ Kilisito Yesʉ. 15 Ʉlowa naɨmʉkete pang'wandyo wendile pɨɨ? Nihumile kʉlʉnga kɨna, itungo nɨlanso aɨmʉhumile kʉkompola ɨmiho anyu mʉmpee nene. 16 Itɨɨ, itungo ɨlɨ naina nɨmʉlʉgʉ kʉnsoko namʉtambʉɨla ɨtaine?

17 Antʉ nɨanso akete nsʉla akʉmʉlija ʉnyenye, ingɨ masɨgoao shanga maziza, aloilwe amʉɨke kʉlɨ nʉsese mʉagɨle enso. 18 Kʉtai iza kʉtendela antʉ nɨangɨza makani nɨ maziza, tendiʉ mahikʉ ɨhi palʉng'wɨ nʉkʉtula nkolɨ palʉng'wɨ nʉ nyenye ʉdu. 19 Ana ane nɨnʉmʉloilwe, ingɨ kʉsʉkɨɨla hangɨ kʉmʉɨla kʉaalɨka anga mʉsʉngʉ nʉkitungʉɨla, kʉmʉɨla kʉlongoleka kʉaalɨka kʉpikɨɨla mʉtule anga Kilisito, ndoilwe ʉ Kilisito wakaɨle intendo yanyu. 20 Nsʉmbɨɨye nangaluu itʉngo ɨlɨ anga ɨze kɨpalʉng'wɨ, aza kʉziitambʉlya nʉ nyenye kʉʉza nɨzekaɨla ntambʉ. Itungo ɨlɨ nkete woa nʉnyenye!

21 Ntambʉɨli ʉnyenye nɨmʉloilwe kʉtongwa nɨmalagɨɨlyo, itɨ shanga mʉlɨngile ne ɨmalagɨɨlyo nalʉngile? 22 Kʉnsoko yandɨkilwe kɨna, Ibulahimu aʉkete ana abɨɨlɨ, ng'wana ʉng'wɨ kʉ mʉsʉngʉ naɨ mʉtugwa, ng'wana ʉmʉya kʉ mʉsʉngʉ nɨshanga mʉtʉngwa. 23 Ng'wana nʉtugilwe nʉ mʉsʉngʉ naɨ mʉtugwa, aʉtugilwe anga ana antʉ nɨaloilwe. Ingɨ ng'wana nʉwa mʉsʉngʉ nɨ shanga mʉtugwa ʉtugilwe kʉnsoko ilago lang'wi Itunda. 24 Makani aya aile anga mpyani, asʉngʉ nɨanso nɨabɨɨlɨ ingɨ mpyani amalago abɨɨlɨ. Ilago lang'wandyo lɨlɨ naɨlɨɨkilwe palʉgʉlʉ nʉla Sinai, kimɨkɨɨli kakwe ingɨ Hajili nɨana akwe akʉtugɨlwa mʉʉtʉng'wa. 25 Hajili ingɨ kɨmɨkɨɨli ka lʉgʉlʉ nʉla Sinai nʉlʉkolɨ kʉ Alabia, ingɨ mpyani a Yelusalemu ni itungo ɨlɨ, nɨkolɨ mʉʉtʉng'waa nɨana akwe. 26 Ingi Yelusalemu na kigʉlʉ kɨsalɨ ka widesi, nɨ Yelusalemu ɨyɨ ingɨ mpyani ang'wa iya witʉ. 27 Kʉnsoko yandɨkilwe kɨna,

"Lowa, ʉewe nʉ wimʉgʉmba, ʉewe nɨshanga ʉtugile,

itʉnte ʉewe nʉkɨlɨ kʉtuga,

kʉnsoko ana nɨamʉsʉngʉ nʉlekilwe ingɨ ɨdʉ

kʉkɨla ɨana nɨamʉsʉngʉ nʉkete mʉgoha."

28 Itungo ɨlɨ anyandʉgʉ ane, ʉnyenye mɨana ang'wi Itunda kʉpumɨɨla milago lakwe anga naɨyɨlɨ kʉng'wa Isaki. 29 Mahikʉ nanso, ng'wana naɨʉtugilwe kʉʉlowa nʉwa ana antʉ aɨwɨmaja ʉng'wana nʉtugilwe kʉngulu niya Ng'wahʉ Ng'welʉ, yɨlongolekileʉ sambʉnʉyʉ. 30 Mʉwandɨkwa wang'wi Itunda yandɨkilwe ʉlɨ? Yandɨkilwe itɨ, "Mʉzʉnse ʉmʉsʉngʉ nʉ mʉtugwa palʉng'wɨ nʉ ng'waakwe, kʉnsoko ng'wana nʉwa mʉsʉngʉ nʉamʉtugwa shanga ʉkʉsala palʉng'wɨ nʉ ng'wana nʉwa mʉsʉngʉ nɨshanga mʉtʉgwa. 31 Kʉlʉlo gwa anyandʉgʉ ane, ʉsese shanga kɨana amʉsʉngʉ nɨmʉtugwa, ingɨ ʉsese kɨana amʉsʉngʉ nɨshanga mʉtʉgwa.