1 wah δ eljwab eθθani exenttarye, ey ewmaθen, bac exencejeεe eθfekrem belgde s esfekker y xenyum g elHajeθ tesnemtent. 2 esfekreθ edwi elli yuseδ f iyles n lembiye iqeddiysen d elwSaye n errebbenne elli imenεane. elli xebbernawem imerselewwem essisen. 3 w qebl kul ciy yelzem eθesnem elli δ edyes g ellexer elleyyam leεbaδ etteθfisaxen, emsuqen eccehwθensen. 4 ennen: "yuεeδ s waseδ, mani yelle? midnenne emmuwθen yeqqim kul ciy em nette seg elli θebδe eddunyeθ!" 5 w nihnin θerren g imenensen ellessinenc elli erreb s elkelmeθ yexleq esmaweθ d elqaεεeθ elli erreb esufeγet seg wamen ybeyent s wamen. 6 w s kelimeθ zade yeγreq elεalem eqδim g wamen yehlex, 7 emme esmaweθ d elqaεεeθ g liyyemenne θiyh, eqqiymneθ y elεefyeθ s elkelmeθ n erreb biδhe elwas n elHsab d wehlax n imuHacen. 8 w θelle elHajeθ meyelzemkumc eθeγflem felles, ey ewmaθen, w elli as iyjen γer erreb m elf esne, w elli elf esne m was iyjen. 9 werreb yetwexxerc age nelweεδes, emmax iθettehmen lebHaD, yemenni yeSber fellawem εlexaTer liγic eyehlex Hette iyjen, yemenni etaben elkul.

10 yemenni as n erreb δ edyes emmax i yθaseδ essareq, emmunkesneθ esmaweθ g wesδin s eSSuθ emessaεqeθ yemmunkes kul ciy disneθ s elεafyeθ, usinc eθemHakem elqeεεeθ δ elεmayel elli δiys. 11 w iδekan elHejaθe elkul δ emrekneθ, max δeθkuwnem xenyum? yelzemkum eθeTfem ebriδ n etteqwe d elqδaseθ. 12 etrajem w eθzerbem g waseδ n was n erreb fiyseε? max edyes as diyn, δ elhebneθ esmaweθ, yemmunkes kul ciy disneθ s elεafyeθ. 13 yemenni netraje emmax e yuwεeδ erreb, esmaweθ ettijδiyδin w elqeεεeθ ettejδit eyeεmer δiysen elHeq. 14 egeθ elmejhuδewwem, ey ewmaθen, w xenyum etrajem g was diyn, bac e xenyef erreb g eslem, w eddiwemc elεib w eHebbac elluwm fellawem ezzeθes. 15 w eHsbeθ eSSebr n erreb δ elfurseθ y wemneεewwem, emmax i xenyuwri yewweθne buwlus weδin, f elqδer n elHekmeθ elli yuceyest erreb. 16 w elli yuriθi g eljwebes y xenyum, m elli yuθlay felles g eljwebes eddiyn f elHejaθe. w eseδneθ δiys luwmur uεerneθ yemenni entHerfen ejjuhhal d elli ennefsensen δεaf, emmax i θegen g elxθabeθ imqedsen iddiyn, y wehlax n ennefsensen.

17 emme xenyum ey ewmaθen, tewiyem elwSayeθ seg γenne, emmale erreθ elbelewwem elli ellesinenc elHeq exenttewyenc y webriδ emuHac usinc eθexsrem elHajeθ tebehheyθ elli γerwem seg qebl. 18 tekbarem g enneεmeθ d wessen n seyyedne yesuwε elmesiyH elli ymenεane. y nette elmejδ ture diyme. amiyn!