വെളിപ്പാട് 19

സ്വർഗ്ഗത്തിൽ മഹാഘോഷം

1 ഈ സംഭവങ്ങൾക്ക് ശേഷം സ്വർഗ്ഗത്തിൽ വലിയൊരു പുരുഷാരത്തിന്‍റെ മഹാഘോഷം ഞാൻ കേട്ടു:

"ഹല്ലെലൂയ്യാ!*19:1 ഹല്ലെലൂയ്യാ-ദൈവത്തിനു സ്തുതി

രക്ഷയും മഹത്വവും ബഹുമാനവും ശക്തിയും നമ്മുടെ ദൈവത്തിനുള്ളത്.

2 തന്‍റെ വേശ്യാവൃത്തികൊണ്ട് ഭൂമിയെ വഷളാക്കിയ മഹാവേശ്യയെ

അവൻ ന്യായം വിധിച്ചതുകൊണ്ട്

അവന്‍റെ ന്യായവിധികൾ സത്യവും നീതിയുമുള്ളവ.

അവൾ ചൊരിഞ്ഞ അവന്‍റെ ദാസന്മാരുടെ രക്തത്തിന്

അവൻ പ്രതികാരം ചെയ്തു."

3 അവർ രണ്ടാം പ്രാവശ്യം, ഹല്ലെലൂയ്യാ! എന്നു പാടി. അവളിൽ നിന്നും പുക എന്നെന്നേക്കും പൊങ്ങിക്കൊണ്ടിരുന്നു.