मत्तय 17

परमेश्वराच्या भवनाचा कर

24 येशू आणि त्याचे शिष्य कफर्णहूमास आले तेव्हा परमेश्वराच्या भवनाचा कर वसूल करणारे आले, ते पेत्राकडे येऊन म्हणाले, "तुमचे गुरू कर देत नाहीत काय?" 25 त्याने म्हटले, "होय देतो." मग तो घरात आल्याबरोबर तो बोलण्या अगोदर येशू म्हणाला, "शिमोना, तुला काय वाटते? पृथ्वीवरील राजे जकात किंवा कर कोणाकडून घेतात, आपल्या मुलांकडून की परक्याकडून?" 26 जेव्हा तो म्हणाला, "परक्याकडून." तेव्हा येशूने त्यास म्हटले, "तर मग मुले मोकळी आहेत. 27 तरी आपण त्यांना अडखळण आणू नये, म्हणून सरोवराकडे जाऊन पाण्यात गळ टाक आणि पहिल्याने वर येईल तो मासा धरून त्याचे तोंड उघड म्हणजे तुला चांदीचे एक नाणे सापडेल. ते घेऊन माझ्याबद्दल व तुझ्याबद्दल त्यांना दे."