ଜୋଣ୍ଡଡ଼ାନ୍, ଜୁଣ୍ଡଡ଼ିନ୍
1 ଆମ୍ୱେଞ୍ଜି ଏଡାରିତନ୍ ଗାମ୍ଲେ ଞେନ୍ ଅମ୍ଡଙ୍ତାୟ୍, ଆରି ଆମ୍ୱେଞ୍ଜି ଏଙ୍ଗାଲେ ଏଡାରିତନ୍, ଏର୍ଜିଉଦିମରଞ୍ଜି ନିୟ୍ ଏତ୍ତେଲେ ଅଃଡ୍ଡାରିନେଜି; ଆମ୍ୱେଞ୍ଜି ଆପେୟ୍ବେନ୍ ଆ ଡୁକ୍ରି ବୟନ୍ ନିୟ୍ ଏଡାରିତନ୍ । 2 ଡେଲୋଜନଙ୍ଡେନ୍ ଏଙ୍ଗାଲେ ଆରି ଆମ୍ୱେଞ୍ଜି ଏଗର୍ବତନ୍ ? ଆମ୍ୱେଞ୍ଜି ଗରୟ୍ଡାତବେନ୍ ବନ୍, ଆରି ଅଙ୍ଗା ମନ୍ରା କେନ୍ ଆ କାବ୍ବାଡ଼ା ଲୁମେନ୍, ଆନିନ୍ ଅମଙ୍ବେନ୍ ସିଲଡ୍ ଅମ୍ଡୁଙ୍ବା । 3 ଞେନ୍ ଡଅଙନ୍ ବାତ୍ତେ ତେତ୍ତେ ଅଃଡ୍ଡକୋଲିଁୟ୍ ଜନଙ୍ଡେନ୍, ପୁରାଡ଼ାଲୋଙନ୍ ଞେନ୍ ତେତ୍ତେ ଡକୋଡାଲନ୍, ଅଙ୍ଗା ମନ୍ରା କେନ୍ ଆ କାବ୍ବାଡ଼ା ଲୁମେନ୍, ଞେନ୍ ଆନିନ୍ଆଡଙ୍ ବିସାରଲାୟ୍ନି । 4 ଆମ୍ୱେଞ୍ଜି ପ୍ରବୁ ଜିସୁନ୍ ଆଞୁମ୍ଲୋଙ୍ ଏର୍ରୁକ୍କୁଲନ୍ ଆଡିଡ୍, ଞେନ୍ ନିୟ୍ ତେତ୍ତେ ପ୍ରବୁ ଜିସୁନ୍ ଆ ବୋର୍ସା ଅମ୍ମେଲେ ପୁରାଡ଼ାନ୍ ବାତ୍ତେ ଆମ୍ୱେଞ୍ଜି ସରିନ୍ ଡକୋଲନାୟ୍ । 5 ଏନ୍ନେଗନ୍ ଆ କାବ୍ବାଡ଼ା ଆର୍ଲୁମ୍ତେନ୍ ଆ ମନ୍ରା ଡଅଙ୍ ଅନବ୍ସେଡନ୍ ଆସନ୍ ଆନିନ୍ଆଡଙ୍ ସନୁମନ୍ ଆସିଲୋଙ୍ ସୋରୋପ୍ପାୟ୍ବା, ଏତ୍ତେଲ୍ଡେନ୍ ପ୍ରବୁ ଆଜିର୍ତାଞନ୍ ଆ ଡିନ୍ନା ଆ ପୁରାଡ଼ାନ୍ ଅମେଙ୍ତେ ।
6 ୫:୬ ଗାଲାତି ୫:୯ ଆମ୍ୱେଞ୍ଜି ଏନ୍ନେଲେ ଏଗର୍ବଡଙ୍ନେ, ତିଆତେ ମନଙ୍ ତଡ୍; ଅସୋୟ୍ କମିରନ୍ ନିୟ୍ ସମ୍ପରା ମଇଦାଲୋଙନ୍ କମିରନ୍ ତୁମ୍ ଅମ୍ମେତେ ଗାମ୍ଲେ ଆମ୍ୱେଞ୍ଜି ଜନାଜି ତଡ୍ ପଙ୍ ? 7 ଅମଙ୍ବେନ୍ ସିଲଡ୍ କମିରନ୍ ଅନ୍ତମ୍ ଆ ଇର୍ସେ ସବ୍ଙାୟ୍ଡାଲେ ମବ୍ଡ଼ିର୍ନାବା, ଏତ୍ତେଲ୍ଡେନ୍ ଆମ୍ୱେଞ୍ଜି କମିରନ୍ ଏର୍ମନାୟନ୍ ଆ ମଇଦା ଅନ୍ତମ୍ ଡେତବେନ୍, ଇନିଆସନ୍ଗାମେଣ୍ଡେନ୍ ଇନ୍ଲେନ୍ ଆସନ୍ ଅନେଲାୟ୍ପୁରନ୍ ଆ ମେଣ୍ଡାଅନ୍ କ୍ରିସ୍ଟନ୍ ନିୟ୍ ଅନମଙନ୍ ଅନ୍ତମ୍ ତିୟ୍ଡମ୍ଲନ୍ । 8 ତିଆସନ୍ ଜିରାୟ୍ବା, ଇନ୍ଲେନ୍ ପାପୁର୍ କମିରନ୍ ଅନ୍ତମ୍ ପେଲ୍ଲାଲେଞ୍ଜି ଡ ପରାନ୍ସାତ୍ତିନ୍ ଆ କାବ୍ବାଡ଼ାଜି ଅମ୍ରେଙ୍ଡାଲେ, କମିରନ୍ ଏର୍ମନାୟନ୍ ଆ ରୁଟି ଅନ୍ତମ୍ ଆଜାଡ଼ିନ୍ ଡ ମଡ଼ିରନ୍ ବାତ୍ତେ ପୁର୍ପୁରନ୍ ଲୁମ୍ବା ।
9 ଜୋଣ୍ତଡ଼ାମରଞ୍ଜି ବୟନ୍ ଏମାୟ୍ଡଙ୍ନେ ଗାମ୍ଲେ, ଞେନ୍ ଆମ୍ମୁଙ୍ ଆ ସିଟିଲୋଙ୍ ଇଡ୍ଲେ ଆପ୍ପାୟ୍ଲାୟ୍ । 10 କେନ୍ ପୁର୍ତିଲୋଙନ୍ ଜୋଣ୍ଡଡ଼ାମରଞ୍ଜି, କୁସ୍ସାମରଞ୍ଜି, ବୁର୍ଡମରଞ୍ଜି ଡ କୋଙ୍ଡାଜନ୍ ଆପୁର୍ତେଞ୍ଜି ଆ ମନ୍ରାଜି ବୟନ୍ ଏମାୟ୍ଡଙ୍ନେ ଗାମ୍ଲେ ଅଃବ୍ବର୍ବେନ୍; ଏତ୍ତେଲ୍ଡେନ୍ ଆମ୍ୱେଞ୍ଜି ପୁର୍ତିନ୍ ସିଲଡ୍ ଡୁଙ୍ଲନ୍ ଜନିରନ୍ ଡେତେ । 11 ଅନ୍ନିଙ୍ ଆ ମନ୍ରା ସର୍ସି ଡର୍ନେମର୍ ଗାମ୍ଲେ ଅଡ଼୍କୋ ମନ୍ରାନ୍ ଜନାଏଞ୍ଜି, ବନ୍ଡ ଆନିନ୍ ଜୋଣ୍ତଡ଼ାତନ୍, କୁସ୍ସାତନ୍, କୋଙ୍ଡାଜନ୍ ପୁର୍ତେ, ମନ୍ରାନ୍ ନିଣ୍ଡୟ୍ତେ, ଗାସାଲ୍ତନ୍, ଆଡ଼ସାତନ୍, ରାଉତନ୍, ଏତ୍ତେଗନ୍ ଆ ମନ୍ରାଜି ସରିନ୍ ଏମାୟ୍ଡଙ୍ନେ, ଆରି ଆନିଞ୍ଜି ସରିନ୍ ମାୟ୍ଲନ୍ ଏଗାଗାଡଙ୍ନେ, ଗାମ୍ଲେ ଇଡ୍ଲେ ଅମଙ୍ବେନ୍ ଆପ୍ପାୟ୍ଲାୟ୍ ।
12 ଇନିଆସନ୍ଗାମେଣ୍ଡେନ୍ ଜାଙ୍ଲନ୍ ଆ ମନ୍ରାଜିଆଡଙ୍ ଇନିବା ଞେନ୍ ବିସାରଆଜି ? ଅମ୍ମନ୍ ଆଡ୍ରକୋତଞ୍ଜି ଆ ମନ୍ରାଜିଆଡଙ୍ ଆମ୍ୱେନ୍ ଏଃବ୍ବିସାରଏଜି ପଙ୍ ? 13 ବନ୍ଡ ଆନାଜି ଜାଙ୍ଲନ୍ ଡକୋଜି, ଇସ୍ୱରନ୍ ଆନିଞ୍ଜିଆଡଙ୍ ବିସାରତଜି, ତି ପରାନ୍ସାତ୍ତିନ୍ ଆ କାବ୍ବାଡ଼ା ଆର୍ଲୁମ୍ତେଞ୍ଜି ଆ ମନ୍ରାଜିଆଡଙ୍ ଅମଙ୍ବେନ୍ ସିଲଡ୍ ଅମ୍ଡୁଙ୍ବାଜି ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)