ସାତଜଣ ଞଙ୍ନେମରଞ୍ଜି ଆମଙ୍ ଜିସୁନ୍ ଅବ୍ତୁୟ୍ଲନେ
1 ସିଲଡ୍ଲ୍ଲନ୍ ଜିସୁନ୍ ତିବିରିଆ ଅନେଙ୍ ସମେଁୟ୍ଣ୍ଡ୍ରାଲୋଙନ୍ ଆରି ବତର ଞଙ୍ନେମରଞ୍ଜି ଆମଙ୍ ଅବ୍ତୁୟ୍ଲନେ । ଆନିନ୍ କେନ୍ ଏନ୍ନେଲେ ଆମଙଞ୍ଜି ଅବ୍ତୁୟ୍ଲନେ; 2 ସିମନ୍ ପିତ୍ରନ୍, ତୋମାନ୍, ଆନିନ୍ଆଡଙ୍ ଦିଦୁମ ଗାମ୍ତଜି, ଗାଲିଲିନ୍ ଆ କାନ୍ନାବାୟ୍ ନିତନ୍, ଜେବଦିନ୍ ଆ ଡାଙ୍ଗଡ଼ାଅନ୍ଜି ଆରି ଜିସୁନ୍ ଆ ଞଙ୍ନେମର୍ଜି ଆମଙ୍ଲୋଙ୍ ସିଲଡ୍ ଆରି ବାଗୁନେ ଏକ୍କାନ୍ ଡକୋଲଞ୍ଜି । 3 ୨୧:୩ ଲୁକ ୫:୫ସିମନ୍ ପିତ୍ରନ୍ ଆନିଞ୍ଜିଆଡଙ୍ ବରେଞ୍ଜି, "ଞେନ୍ ଞମ୍ୟବାନ୍ ଇୟ୍ତେ ।"
ଆନିଞ୍ଜି ସିମନନ୍ଆଡଙ୍ ବରେଞ୍ଜି, "ଇନ୍ଲେଞ୍ଜି ନିୟ୍ ଆମନ୍ ସରିନ୍ ଏଇୟ୍ତାୟ୍ ।" ଆନିଞ୍ଜି ଡୁଙ୍ଲନ୍ ଜିର୍ରେ ଡୋଙ୍ଗାଲୋଙନ୍ ଇୟ୍ଲେ ଡାଜେଜି, ଆରି ତି ଆ ତଗଲ୍ ଆନିଞ୍ଜି ଇନ୍ନିଙ୍ ଞମ୍ଲେ ଅଃର୍ରପ୍ତିଲଜି । 4 ଆସ୍ରାଆରେନ୍ ସିଲଡ୍ଲ୍ଲନ୍ ଜିସୁନ୍ ଆସର୍ଲଲୋଙନ୍ ଆତନଙ୍ ଡକୋଲନ୍, ବନ୍ଡ ଆନିନ୍ ଜିସୁନ୍ ଗାମ୍ଲେ ଞଙ୍ନେମରଞ୍ଜି ଅଃଜ୍ଜନାଲଜି । 5 ଜିସୁନ୍ ଆନିଞ୍ଜିଆଡଙ୍ ବରେଞ୍ଜି, "ଏ, ପସିୟ୍ଜି ଅମଙ୍ବେନ୍ ଅୟନ୍ ଡକୋ ପଙ୍ ?"
ଆନିଞ୍ଜି ଆନିନ୍ଆଡଙ୍ ଜାଲଙେଞ୍ଜି, "ଇଜ୍ଜା, ଇନ୍ନିଙ୍ ତଡ୍ ।"
6 ୨୧:୬ ଲୁକ ୫:୬ ଜିସୁନ୍ ଆନିଞ୍ଜିଆଡଙ୍ ବରେଞ୍ଜି, "ଡୋଙ୍ଗାନ୍ ଆର୍ଜଡ଼ୋମ୍ଗଡ୍ ଜାଲନ୍ ସେଡ୍ବା, ଆମ୍ୱେଞ୍ଜି ଏଞାଙ୍ତେ ।" ସିଲଡ୍ଲ୍ଲନ୍ ଆନିଞ୍ଜି ଜାଲନ୍ ସେଡେଞ୍ଜି, ଆରି ଏତ୍ତେଲେ ଆଗୋଗୋୟ୍ ଅୟନ୍ ଗତରେନ୍ ଡ, ଆନିଞ୍ଜି ତିଆତେ ଡିଙ୍ଲେ ଅଃର୍ରପ୍ତିଲଜି ।
7 ତିଆସନ୍ ଅଙ୍ଗା ଞଙ୍ନେମର୍ଆଡଙ୍ ଜିସୁନ୍ ଡୁଙ୍ୟମେନ୍, ଆନିନ୍ ପିତ୍ରନ୍ଆଡଙ୍ ବରେନ୍, "ତିଆନିନ୍ ପ୍ରବୁନ୍ ।" ସିମନ୍ ପିତ୍ରନ୍ ତିଆନିନ୍ ପ୍ରବୁନ୍ ଗାମ୍ଲେ ଆରମ୍ଡଙେନ୍, ଆନିନ୍ ଆ ଅଙ୍ଗିନ୍ ରଲନ୍ ସମେଁୟ୍ଣ୍ଡ୍ରାଲୋଙନ୍ ଅନ୍ତ୍ତିଡ୍ଲନେ, ଇନିଆସନ୍ଗାମେଣ୍ଡେନ୍ ଆନିନ୍ ଆବଙ୍ଗୁୟ୍ ଡକୋଏନ୍; 8 ବନ୍ଡ ଆନ୍ନା ଞଙ୍ନେମରଞ୍ଜି ଅୟନ୍ ଆବରିଜନ୍ ଆ ଜାଲ ଡିଙ୍ଲେ ଡିଙ୍ଲେ ସନ୍ନା ଡୋଙ୍ଗାଲୋଙନ୍ ଜିର୍ରାଜି, ଇନିଆସନ୍ଗାମେଣ୍ଡେନ୍ ଆନିଞ୍ଜି ଆସର୍ଲଲୋଙନ୍ ସିଲଡ୍ ସଙାୟ୍ଲୋଙ୍ ଅଃଡ୍ଡକୋଲଜି, ବାଗୁସଅ ସନ୍ତି ଆ ସଙାୟ୍ଲୋଙ୍ ଆନିଞ୍ଜି ଅୟନ୍ ଞମେଞ୍ଜି । 9 ଆନିଞ୍ଜି ଆସର୍ଲଲୋଙନ୍ ପଡ୍ଲନ୍ ତେତ୍ତେ ଆରଡ଼େତୋଡନ୍, ଆରି ତି ଆ ତୋଣ୍ଡୋ ଆଗାୟ୍ଗାୟ୍ ଅୟନ୍ ଡ ରୁଟିନ୍ ଆତମ୍ମିଜନ୍ ଇୟ୍ଲାୟ୍ ଗିଜେଜି । 10 ଜିସୁନ୍ ଆନିଞ୍ଜିଆଡଙ୍ ବରେଞ୍ଜି, "ଆମ୍ୱେଞ୍ଜି ନମିଞେନ୍ ଅଙ୍ଗା ଆୟ ଏଞମେନ୍ ତେତ୍ତେ ସିଲଡ୍ ଲାଙ୍ଲେଡ୍ ପାଙାୟ୍ବା ।"
11 ସିମନ୍ ପିତ୍ରନ୍ ଜିର୍ରେ ଅୟନ୍ ଆବରିଜନ୍ ଆ ଜାଲ ଡିଙ୍ଲେ ଇୟ୍ଲେ ପାଙେ । ତେତ୍ତେ ସୋଡ଼ାରାଡମ୍ ଆୟ ବସଅ ତେପନଟା ଡକୋଏନ୍, ଡେଲୋଜନଙ୍ଡେନ୍ ଜାଲନ୍ ଅଃନ୍ନତଡ୍ଲୋ ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)