1 Aŋ wääna iken äätene Oorcalïïm kä cokal aŋ ḍäägene ti tooyle Beetpaac pääm yaana wiñe a jengä jeytüünni ye ti, i Yeecüwa tuccin baaddoni yeeke kä yewwe ñomgen ti. 2 Aŋ kiini Yeecüwa ogo, "Ate tooyle yaana ñomgic ti yaanna, aŋ ikee bi käñe tüürüŋ a weengon ke tüürüŋle yeene gunne ti. Gütke aŋ icka kä. 3 Aŋ naana mäŋkalaŋ ikee taaññe ye, i kiine ogo ṭäkkïï ko Mügdo, aŋ ikee bi dale buwin äbe."

4 Yaakki wäättä ḍääkit yaaka jaayi Jooŋ kä bäṭo ye ogo,

5 "Mä Oorcalïïm kiine ogo,

‘Yooṭe, Yätkä yeenic äätïdï ikee ti.

Aŋ Ike ḍoŋe agee ḍuugïnï ïñï,

aŋ taabit tüürüŋ,

aŋ a tüürüŋle ken taabdee kä.’"

6 Aŋ baaddoni yaaka kä yew ye näŋjin bata yaana eenjene daa kä Yeecüwa ye. 7 Aŋ iken tüürüŋ äbi ke tüürüŋle Ike ti, aŋ tüürüŋle ḍucki ŋäc buruŋgu yeeken, aŋ Yeecüwa taappä.

8 Aŋ ṭoŋ ḍiirken buruŋgu yeeken peti ïñï päy jï ñome ti, aŋ yakkalaŋ ŋüülïn jengä kimken ken peti ïñï päy jï. 9 Aŋ ṭoŋ ḍiirken yaaka äätä ñome ti ke yaaka ŋäñe ti ye, yawdïdï ogo,

"Maaŋŋä Jooŋ ti kä Minneni yen Daawüüt!

Ŋüülkïn m’ana äätïdï kä yäṇtäŋ Pïṭo ye ti!

Maaŋŋä Jooŋ ti küüṭṭülaŋ polloŋ jï!"

10 Aŋ wääna Yeecüwa kaaccee kä ti Oorcalïïm ye, baan jïñe yore cükke muure aŋ me tääccin ogo, "A ŋaani ina?"

11 Aŋ ṭoŋ luukcin ogo, "A bäṭo Yeecüwa, män Naacira yen mä Jalïïl."

12 Aŋ Yeecüwa kaaccä kaal yen änlaṇṇä jï, aŋ m’aka kïjï ke m’aka yääjï ye ñooṭṭe woo muure wïca, aŋ däräŋgä yek räṇṇä tiil uuljene ïñï ke nooŋŋi yek m’aka yääjï gülküteni ye. 13 Aŋ kiini Yeecüwa ogo, "A pergon Meeŋka Jiik Jooŋ jï ogo, ‘Än yeeni bi battä me ogo än mallä,’ aŋ yelle yok a än muddoŋŋi!"

14 Aŋ uykuni ke puudgu äätin Ike ti änlaṇṇä jï, aŋ ṭeeññe. 15 Aŋ wääna ḍuuŋku däŋkä ke nüütoni yek jiik ḍoocin yek Jooŋ yuṭṭene nääŋkä yäwkä yaaka naŋde aŋ merkälen yaawene änlaṇṇä jï ogo maaŋŋä Jooŋ ti kä Minneni yen Daawüüt ye ti, i iken piiṇdin.

16 Aŋ iken Yeecüwa taaji ogo, "Merkälen yaakka jiiken tiŋdä?"

Aŋ luugi Yeecüwa ogo, "Ee. Ikee batta age päkin Meeŋka Jiik Jooŋ jï? Jaay ogo, ‘Ïkï merkälen ke tüṇtülgü nüüṇṇï ogo Ïkï maaŋjïda.’" 17 Aŋ iken dalji ïñï Yeecüwa kaaccä woo baan mä Oorcalïïm jï attä Betani, aŋ nïïnïn wïca.

18 Aŋ kä tïṇṇäŋänä wääna Yeecüwa ḍukcedee kä baan jï ye, näägi käñ. 19 Aŋ yurcin jaan beel bata ŋoommu päy taaŋ, aŋ umgene ti aŋ batta a käñon ṭulge, a gitke pääken. Aŋ kiinne ogo, "Ŋana ïkï giidä ṭülgü ŋuca!" Aŋ kä ḍeeraŋ aŋŋi jaan ïjjïn woo.

20 Aŋ wääna yoorene daa baaddoni ye, iken witken ḍiiktin, aŋ tääccin ogo, "Jaan ŋoommu yaanni ïwnä ogoo kä bïraŋ aŋŋi?"

21 Aŋ luugi Yeecüwa ogo, "Ikee kiine a gïtken, naana ikee cääyge kä luggin aŋ juuggic batta riijä ye, ikee batta bi a nääŋkä yaaka näŋŋä jaan ŋoommu yaanni ti ye, pääken ken bi naŋde. Aŋ cäänna naana pääm yaanni kiine ogo, ‘Ḍïmjä koon mooye jï’ ye, i bi näŋï ḍoŋe. 22 Aŋ naana ikee cääygene kä luggin ye wakkä muure yaaka ñuye kä mallä ye, bi kañe."

23 Aŋ Yeecüwa attä kaal yen änlaṇṇä jï, aŋ jujjin kä nüüṇṇü me aŋ ḍuuŋku däŋkä ke me mäyken äätin Ike ti, aŋ tääccin ogo, "A mügdïn yaana wali ye, ken ñuugilii kä waak yaakka, aŋ a ŋaani ken Ïkï iññey mügdïn yaanni?"

24 Aŋ luugi Yeecüwa ogo, "Ikee cäänna bi taaje kä tääctäŋ kä keelok, aŋ naana Ika luuŋŋa ye, ikee cäänna bi nüütke kä mügdïn yaana wali ye ken naŋdä kä waak yaakki. 25 Mügdïn büüllü yen Yaaya ätä wa, ätä polloŋ jï halla ätä mänbaan ti?"

Aŋ iken luugjin pääken ogo, "Aŋ bi yore luuge ogoo? Naana ïkïïn jaaccïn ogo ääto polloŋ jï ye, Ike ïkïïn bi kïïnïn ogo, aŋ ikee batta luggede kä ike ina? 26 Aŋ naana ïkïïn jaaccïn ogo ääto mänbaan ti ye, ïkïïn boocïn kä ṭoŋ, me muure Yaaya ŋäjjänä a bäṭo." 27 Aŋ iken Yeecüwa luugi ogo, "Batta ŋäjjon." Aŋ kiini Yeecüwa ogo, "Cäänna ikee batta nüütkede kä mügdïn yaana wali ye ken ñuugulu kä."

28 Aŋ iken taaji Yeecüwa ogo, "Ikee päje ogo ŋaaka kä yaanni? Oon yaŋkalaŋ cääyge merkä kä yew. Aŋ ike attä minneni yaana a ïïcca ye ti, aŋ kiinni ogo, ‘Minneni yeeni, atä ñuugulu yiil jï tiññaŋ.’

29 "Aŋ minneni luukcin ogo, ‘Ika batta atä.’ Aŋ wäättan jone ääkkene aŋ attä.

30 "Aŋ wäy attä minneni kalaŋ ti aŋ kiinne kä jiik keelkä, aŋ ike jaajjin ogo, ‘Abba, ika bi atä.’ Aŋ batta a aton.

31 "M’aka kä yewwe yaakki ti, a ŋaani ken näŋŋä ṭäktäŋ wäyen?"

Aŋ iken luukcin ogo, "A ïïcca."

Aŋ iken luugi Yeecüwa ogo, "Ikee kiine a gïtken ḍüṭoni yaacken ke balkä ikee bi yütene ti Yätkïtïn Jooŋ ti. 32 Aŋ Yaaya äätin ikee nüütkede päy woṇṇu, aŋ ikee batta age luggïnï kä ike. Aŋ ḍüṭoni yaacken ke balkä ken luggin kä ike. Aŋ wääna yuṭṭee kä aŋan ye, ikee cäänna batta age luggïnï kä ike, aŋ ikee batta age ääkcïnï."

33 Aŋ Yeecüwa jaajjin ogo, "Gäärrä yaanni tiiŋe ŋuca. Aŋ wïca oon yaŋkalaŋ a män ŋommañ pïïttä yiil aŋ yaŋŋe yok kä kaal, aŋ ṭummu taga aŋ kuṭṭu än küülconḍe yen tïïco. Aŋ müükkene pïïtoni ogo pïïtcïko, aŋ ike ïñjï yen ŋommañ, aŋ ike attä woo baan yaŋkalaŋ ti. 34 Aŋ wääna waan errä cokulenee ye, ike tuccin ñuuguloni pïïtoni ti ogo ike äckïï me yeeke. 35 Aŋ pïïtoni ñuuguloni yeeke koowi aŋ keelok jiibi, aŋ yaŋkalaŋ nägi ḍok, aŋ yaana wäätcete kä ḍäk ye yibi kä guygu. 36 Aŋ tuccin ñuuguloni yakkalaŋ ŋuca ḍiräk kä yaaka ïïjjïn ye, aŋ näŋgi nääŋkä keelkä.

37 "Aŋ düüñïn ti tuckene minneni yeene aŋ jaajjin ogo, ‘A minneni yeeni bi eemtä.’

38 "Aŋ wääna minneni yoorene daa ye, jaajjin ogo, ‘A yäto yen män yiil inni, ääte näkïn ḍok nuŋko yäṇṇä yeene koowïn daa kä ye.’ 39 Koowi aŋ yeepi woo yiil taaŋ aŋ nägi ḍok."

40 Aŋ Yeecüwa tääccin ogo, "Aŋ naana män yiil ätä ye yoku pïïtoni yaakka naŋe ogoo?"

41 Aŋ luugi ogo, "Me yaacken yaakka bi näge ḍuuggin kä näŋŋä yaajgonḍe, aŋ yiil bi müükke pïïtoni yakkalaŋ yaaka bi ike äckänä yeeke waan errä ti ye."

42 Aŋ kiini Yeecüwa ogo, "Ikee batta age päkin Meeŋka Jiik Jooŋ jï ogo,

‘Jaan kïye yaana tüüññïï yok kuṭoni ye

ken wäätto ogo jaan kïye yen yoggon yaana tiilcodo ye,

aŋ a yaana naŋi Pïṭo ye inni,

aŋ ken yäwaŋ daammä yoono ti?’

43 "Aŋ ikee kiine, Yätkïtïn yen Jooŋ bi aŋgänä me yok ikee ti, aŋ iñgä me ṭoŋ yaaka gidok jengä ṭulgen yeeke ye. 44 Aŋ m’ana ḍïmjï jaan kïye yaanni gïtï ye bi liiktit gïtï a pïlkälen, aŋ m’ana ḍimgänä gïtï jaan kïye mooye yaanni ye bi ruumtit gïtï."

45 Aŋ wääna ḍuuŋku däŋkä ke Pïrrïcïïnnï tiiŋŋene gäärrä Yeecüwa ye, i ooki gïtï jaay ogo iken. 46 Aŋ iken ṭäkï ogo yoku mügjï aŋ iken bojgin kä ṭoŋ yaaka Yeecüwa ḍooccutu ogo bäṭo ye.