1 Aŋ wääna tïṇṇäwic aŋŋi ye, ḍuuŋku däŋkä ke woydoni yek Yühüüṇṇï näŋŋä waŋ teyne ogo nääkïï ko Yeecüwa. 2 Aŋ ḍiigi aŋ iji müükkï mügdo Biilaatuc yen mä Ruumaan.

3 Aŋ wääna Yahüüja yaana Ike ääkki ŋäc ina ŋïccee Yeecüwa jooce daa me ke tüwnü ti ye, ike jone lüüjjïn aŋ tiilgä gälkä yaaka caykä kä ḍäk yaakka ḍuukkene ḍuuŋku däŋkä ke yätïnï. 4 Aŋ jaajjin ogo, "Ika näŋŋä nääŋkä yaackä kä ääkkin ŋäc m’ana ḍoŋe ladaŋ ye."

Aŋ iken jaajjin ogo, "Ikoon piilgon ŋaaka? Yaanna a ïkï ti." 5 Aŋ Yahüüja tiilgä gälkä yibjene ïñï kaal yen änlaṇṇä yen Jooŋ jï, aŋ kaaccä woo aŋ ḍoŋe maaññe. 6 Aŋ ḍuuŋku däŋkä yakkalaŋ tiil koowi aŋ jaajjin ogo, "Batta päjjïdï ḍoocïn tuññu änlaṇṇä jï i a tiil yek yïmgä aŋŋi. 7 Aŋ iken ḍuccin jiik aŋ tiil kiññene yiil äjo ogo wääto ogo, nänṭä jïŋŋä boorgu. 8 Aŋ ken ina ke tiññaŋ yiil yaanna batte daa me ogo, Yiil Yïmgä yaanna. 9 Yaakki ḍääkit barrä yen bäṭo Ïrmïya ogo,

‘Iken kuññu tiilgä gälkä caykä kä ḍäk,

a äccin yaana ḍooccete daa kä mä Icärayiil ye.

10 Aŋ kiññene yiil äjo,

bata yaana iingana kä Pïṭo ye.’"

11 Aŋ Yeecüwa yuuttu mügdo Biilaatuc yen mä Ruumaan ñome ti, aŋ taaji mügdo ogo, "Ïkï agä Yätkä yen Yühüüṇṇï?"

Aŋ luugi Yeecüwa ogo, "Ïkï jaajjini." 12 Aŋ wääna käkkene daa wic ḍuuŋku däŋkä ke yätïnï yek Yühüüṇṇï ye, i Ike batta a lüükcïnï. 13 Aŋ taaji Biilaatuc ogo, "Ïkï batta tiŋdä käkkinni witkin yaaka üüŋütü me Ïkï ti yaakka?" 14 Aŋ batta agee kä luukon kä jiikkalaŋ, aŋ mügdo wiñe ḍiiktin.

15 Aŋ yuungu muure ti Poñ Kaaldin Wic ti, mügdo yen mä Ruumaan äkkïdï men kä keelok yaana cääy gaŋgar jï aŋ wakä ṭoŋ ye. 16 Aŋ waan yaanja ti iken cääygene mäŋkalaŋ gaŋgar jï ŋäjjänä battä me ogo Barabaac. 17 Aŋ wääna mäbaan yoken ḍülene daa kä ye, i iken taaji Biilaatuc ogo, "A ŋaani ken ṭäkke äkke kä, Barabaac halla Yeecüwa yaana battä me ogo Macii ye?" 18 Aŋ ŋäjje iken Yeecüwa müükkene daa kä puutin.

19 Aŋ wääna Biilaatuc cääyee kä nook yen jooññu wic ti ye, tucki iiŋe jiik aŋ kiinne ogo, "M’ana ḍoŋe ladaŋ yaanna daläbu. Ika wääccä lääggï kä yaac wïïrïn tiññaŋ kä Ike." 20 Aŋ ḍuuŋku däŋkä ke yätïnï ṭoŋ ïïrï ogo ñujjo Barabaac ken äkkee aŋ Yeecüwa ken nägjï ḍok. 21 Aŋ Biilaatuc ṭoŋ taaññe ogo, "Yaaka kä yewwe yaakki ti wali yaana äkke kä ye?"

Aŋ ṭoŋ luukcin ogo, "Barabaac!"

22 Aŋ tääcki ti Biilaatuc ogo, "Aŋ Yeecüwa yaana battä me ogo Macii ye ken naŋä ogoo?"

Aŋ ṭoŋ muure luukcin ogo, "Näge ḍok kä ṭellä kaakkon jok!"

23 Aŋ tääcki ti Biilaatuc ogo, "Ina, a yiñ yaana wali ye ken naŋŋe?"

Aŋ iken üüttïn kä yääw ṭeṭaŋ ogo, "Näge ḍok kä ṭellä kaakkon jok!"

24 Aŋ wääna yoorene daa Biilaatuc ike batta käñdee kä waan, aŋ a büültïn ken tälit ye, i ike kuññu piik aŋ ïnke lookke woo me ñomgen ti, aŋ jaajjin ogo, "Ika ḍoŋi ladaŋ kä yïmgä oon yaanna. Yaanna a nääŋkä yeekic!"

25 Aŋ me muure luukcin ogo, "Dalä yïmgä yeeke a ikoon ti ke merkä yooko ti!"

26 Aŋ Barabaac äkkeneeda. Aŋ iinjin ogo Yeecüwa ḍooyjï me, aŋ müükkene kääygä mä Ruumaan ogo ṭeljïï ti kaakkon jok.

27 Aŋ kääygä yek mügdo Biilaatuc Yeecüwa koowi, aŋ iji wiñ yeenen ti, aŋ kun yen kääygä ḍüülï ti muure Ike ti. 28 Aŋ burŋu yeene güüdï woo, aŋ iiŋki burŋu beel bata yen yätkä. 29 Aŋ ṭurki tarbüc eemdin yen küügü aŋ iiŋkene daa wiñe ti, aŋ ḍucki lacan ïṇte birrä ti aŋ ḍüŋjïn ïñï ñome ti aŋ ñiyene yok aŋ kiiṇtä ogo, "Ogook? Yätkä yen Yühüüṇṇï!" 30 Aŋ ŋüülkï yokïn ñaangä, aŋ lacan koowi aŋ jebene daa kä wiñe ti. 31 Aŋ wääna ñiynene kä yok ye, i güüdï yokïn woo aŋ iiŋki buruŋgu yeeke aŋ koowi iji woo ṭelcätä ti kaakkon jok.

32 Aŋ wääna kaaccene kä woo ye, i iken purjin ke oon yaŋkalaŋ yen mä Giiräwaan, battä me ogo Camaan, aŋ ïïrï kääygä ogo kaakkon Yeecüwa koowje äddee. 33 Aŋ iken ḍakkä ti nänṭä yaana battä me ogo Kulukuuta ye, aŋ aŋan ogo nänṭä yen äwnäwiñ. 34 Aŋ Ike iñi määk a ñukin kä kalkale aŋ wääna näkkeneeda kä ye, Ike yaakkä kä maaṇṇä.

35 Aŋ wääna Ike ṭeljene daa ti kaakkon jok ye, iken buruŋgu yeeke ŋüülï gïtï aŋ naŋi kä jaan. 36 Aŋ iken cääjjin ïñï aŋ Ike tïïcä. 37 Aŋ wiñe ti iken ḍuccin jiik pergin yek cïŋŋä yaana üŋjïdï Ike ti ye jayok ogo, "A Yeecüwa inni, Yätkä yen Yühüüṇṇï." 38 Aŋ ñagaṇṇi yakkalaŋ kä yewwe ṭeli me ke Ike, keelok kä buŋ birrä ti aŋ yaŋkalaŋ kä buŋ aam ti.

39 Aŋ m’aka kaajit ye yawok kiirä witken bergä kä ñääy, 40 aŋ jayok ogo, "Ïkï yaana jaayä ogo änlaṇṇä yen Jooŋ ḍüümjey gïtï, aŋ ŋuca korjey nïïnkä ko ḍäk ye! Ḍoŋü mäkkä! Kääjä ïñï kaakkon jok naana Ïkï agä Minneni Jooŋ a gïtken ye."

41 Aŋ cäänna ḍuuŋku däŋkä ke nüütoni jiik ḍoocin yek Jooŋ ke yätïnï Ike ñiyge yok kiiṇtä ogo, 42 "Ike mäkkalaŋ maŋŋe, aŋ ḍoŋe batta lïïlde kä mäkkin! Naana Ike a Yätkä yen mä Icärayiil ye, dale käjä ïñï kaakkon jok tiññaaŋŋi, aŋ ikoon bi luggon kä Ike. 43 Ike lüggïdï kä Jooŋ aŋ dale Jooŋ Ike mäkkänä tiññaaŋŋi naana ike ṭäkkänä ye, kä yaana jaayee kä ogo Ike agje Minneni Jooŋ ye." 44 Aŋ cäänna ñagaṇṇi yaaka a ṭeljïnï ti ke Ike kaakkonni jugin ye, Ike kirgä cäänna kä jiik keelkä.

45 Aŋ wääna äŋ yuuttee kä ṭeejjük ye, i mïïllä ŋommañ äätte wic muure ke äŋ waŋe näŋe ḍäk. 46 Aŋ wääna wuuŋ ḍäk ti ye, Yeecüwa yaajjin kä yääw mooye aŋ jaajjin ogo, "Ïïlï, Ïïlï, lama cabaktaani?" Aŋ aŋan ogo, "Jooŋ yeeni, Jooŋ yeeni, Ika daldaabu ina?"

47 Aŋ wääna mäkkalaŋ yuddene kä wïca aŋ tiiŋŋene kä aŋan ye, i iken jaajjin ogo, "Ike bäärä bäṭo Ïlïya." 48 Yaŋkalaŋ iken ti lüüṇṇü aŋ uṇtal küümgene kä määk peñkä aŋ ḍoocce lacan ti aŋ läjgeneeda ogo maadje. 49 Aŋ meken jaajjin ogo, "Dalä bu pare tïka, yoorïn naana bäṭo Ïlïya bi ätä Ike mäkkänä ye."

50 Aŋ Yeecüwa yaajjin ŋuca kä yääw mooye aŋ wääktäŋ yeene ḍoocce. 51 Aŋ kä ḍeeraŋ aŋŋi burŋu yaana a daaŋjïnï änlaṇṇä ti ye, jeññä gïtï pïlke kä yewwe bäätin ïñï kä ñaaloŋŋu ke ïñï, aŋ ŋommañ bukcin aŋ ḍaraŋŋi bääktin. 52 Aŋ kälkä witken kupkin, aŋ me ḍiirken yek Jooŋ yaaka a tüwïn ye, juwin ñaalok. 53 Aŋ iken kääjin woo kälkä gïtï, i ḍaŋŋa Yeecüwa a jüwïnï, aŋ iken attä baan mooye laṇṇä jï Oorcalïïm aŋ yoken nüütkï woo me ḍiirken.

54 Aŋ wääna ḍuuŋgon kääygä yen mä Ruumaan ke kääygä yaaka ke ike däämene Yeecüwa aŋ yuṭṭene bukcin ŋommañ ke waak’a näŋŋä ḍuuggen ye, iken bojgin kä yaac aŋ jaajjin ogo, "A gïtken, Ike a Minneni yen Jooŋ!"

55 Aŋ wïca määngä ḍiirken yakkalaŋ däämmïdï kä utar, a yaaka Yeecüwa bäädänä kä Jalïïl aŋ ñuugulunu ye. 56 Aŋ Märïyam yen mä Majdalïïna bilti ke iken ke Märïyam yaana a Yaagüüp ke Yuucip meen ina ke merkälen Jabadï meen.

57 Aŋ wääna biigin ti ḍäägenee ye, oon yaŋkalaŋ a ceeggon äätin ätä Raama battä me ogo Yuucip, aŋ ike cäänna a baaddo yen Yeecüwa. 58 Aŋ ike attä Biilaatuc ti, aŋ ñujjin ogo Yeecüwa gaane, aŋ Biilaatuc iinjin ogo ïñjïda ko me. 59 Aŋ gaane koowi Yuucip, aŋ paarre yok kä burŋu latconḍe yen jïŋŋä me. 60 Aŋ maaṭṭe kääl yeene kïcconḍe jï, yaana agee kä küüñgon pääm ti bata ṭuumpoŋe ye. Aŋ pääm ḍüljene ti kääl tük aŋ attä. 61 Aŋ Märïyam yen mä Majdalïïna ke Märïyam yaŋkalaŋ bilti wïca cäyok ñomgen agene ṭukin ti kääl wic.

62 Aŋ nïïnnä yaana äätïdï Äŋ jïñe Wääktäŋ ti ye, ḍuuŋku däŋkä ke Pïrrïcïïnnï attä yoken ḍülï Biilaatuc ñome ti. 63 Aŋ jaajjin ogo, "Mügdo, ikoon paydon wääna maldo ŋïngïn yaanja mor agee kä üdon kä ye, jaajjin ogo, ‘Ika bi juwu ñaalok nïïnkä kä ḍäk tüwnü ti.’ 64 Aŋ iinjä dalä kääl wiñe tïïcä me ke nïïnnä ḍäk ti. Nuŋko baaddoni yeeke äätïdï aŋ gaane kaltä, aŋ me kiiṇtä ogo, ‘Juwono tüwnü ti.’ Aŋ aŋan yelkïtïn yaana düüñïn ti ye, bi yaajaŋ kä yaana ïïjjïn ti ye."

65 Aŋ iken luugi Biilaatuc ogo, "Kuje tïïconi aŋ ate näŋe tïïññä bata yaana lïïlde ye." 66 Aŋ iken attä aŋ kääl wiñe näŋgi tïïññä, aŋ üüljï kä pääm aŋ märki gin’a ŋïcte daa kä ye, aŋ ḍuccin tïïconi.