1 Aŋ jiik Pïṭo äätin Yünaan ti ŋuca ogo, 2 "Juwu atä Nïnawa baan mooye yäwnä jï, aŋ me päkkä jiik yaaka iñdenii kä ye." 3 Aŋ Yünaan juwin aŋ attä Nïnawa kä jiik Pïṭo. Aŋ Nïnawa a baan mooye yäwnä Jooŋ ti yaana ääcïdï nïïnkä kä ḍäk men äätä jïñe ti ye.

4 Aŋ Yünaan kaaccä ti baan mooye jï, aŋ äätin jïñe ti nïïnnä kä keelok. Aŋ me päkkene ogo, "Nïïnkä caykä kä ŋan Nïnawa bi ḍüümgü me gïtï." 5 Aŋ mä Nïnawa luggin kä Jooŋ, me mäyken ke me lïcken ti aŋ iken bäṭṭä ogo büültüŋ aŋ iken iiŋcin buruŋgu nüüjdüŋ. 6 Aŋ yätkä yen mä Nïnawa tiiŋŋä jiik Yünaan, aŋ ike kääjin ïñï nook yen mügdïn wic, aŋ buruŋgu yätkïtïn güüdene woo aŋ ike iiŋcin buruŋgu nüüjdüŋ aŋ cääjjin ṭaaṭaŋ gïtï.

7 Aŋ ike bäṭṭä Nïnawa jï ogo, "Kä jiik yätkä ke mä yeeke mäyken, dale ŋana mäŋkalaŋ ke ḍigärgä bata däk ke käbälgä ŋana näkkïdï ginkalaŋ, ŋana ämï aŋ ŋana mätï piik. 8 Me ke ḍigärgä dale ïïŋcï buruŋgu nüüjdüŋ aŋ me mälcï kä yaac Jooŋ ti, aŋ dale me muure ḍagok kä nääŋkä yaackä yeeken, aŋ yüütï ïñï kä ïïrrä teynä yeenen. 9 Aŋ ŋäjjänä ŋaani? Naana ye ïkïïn bi äänïn woo, aŋ Jooŋ piinkä yeeke bi ḍuuke ti, aŋ ïkïïn batta bi tüwïn."

10 Aŋ wääna Jooŋ yuṭṭee kä nääŋkä yaaka naŋi aŋ ḍaŋŋene kä pääygä yiñ ye, i ängene ŋïngïn aŋ batta agee kä tückïnï wakkä yaackä bata wääna jaajjenee kä ina.