1 Yünaan mäṭṭä Pïṭo yeene Jooŋ yakcan jï. 2 Aŋ ike jaajjin ogo,

"Ika yaajjänä Pïṭo ti kä tïñïdïn yeeni

aŋ ika luuŋŋa.

Kä nänṭä ba' tüwnü tinä ika wiigänä ïkï ti,

aŋ ika tiiŋganaa.

3 Aŋ ika yeeppaa wii mooye lüürconḍe jone jï,

aŋ wii ika küürana ti.

Aŋ buktuŋŋi yüükü muure ke lamdinni ika mïïṭana wic.

4 Aŋ ika jaajjänä ogo, ‘Ika ñooṭana me woo ñomü ti,

aŋ ika bi däämjä änlaṇṇä yüünü ti ŋuca ogoo?’

5 Aŋ piik ika cookana ñaalok ke ḍoŋi ti,

aŋ kul ika küürana ti,

aŋ biiruŋ yoken paaṭi wiñi ti.

6 Aŋ ika kaaccä ïñï pämkä ŋoyin,

aŋ ika üüljana tüggïn ŋommañ ke cüle.

Aŋ ïkï, ay Pïṭo Jooŋ yeeni, ïkï üṇṇü yeeni ḍuugini woo käälok.

7 Aŋ wääna üṇṇü yeeni bunnee ye,

ay Pïṭo, ïkï pajjeneni

aŋ mallä yeeni ḍäägin ïkï ti,

änlaṇṇä yüünü jï.

8 Aŋ m'aka däämï juŋku yaaka a waanjïnï ye,

ñomgen ṭuki woo biilin ke cüle ti.

9 Aŋ ercinni yeeki bi naŋä.

Aŋ ika bi äccädä wäämmä yok ïkï ti, aŋ ika bi oolu uulgu yek maaŋŋä.

Mäkkin a yen Pïṭo."

10 Aŋ Pïṭo yakcan kiinne, aŋ Yünaan ŋokke woo nänṭä ïwnä ti.