1 Aŋ wäättana Pïṭo Yeecüwa wääkin woo yakkalaŋ caykä kä ŋaṭükel witken kä yewwe, aŋ tucce ñomuk kä yewweni, bänkä mäyken gïtï ke nänkä muure yaaka ṭäkke umgede ye. 2 Aŋ kiinne ogo, "Wakkä pïïtïn yaaka a eegin ye ḍiräk, aŋ iṭoni ken ḍewgaŋ. Aŋ ñujje Mügdo yen errä wakkä pïïtïn ti, dale tucu iṭoni errä wakkä pïïtïn. 3 Ate, ikee tuccede woo bata käbälgälen waadgä bäwni. 4 Ŋana ikee ädde ḍïïggï tiil, aŋ ŋana kücümgü wään, ŋana ikee ŋuccede kujde waygä yakkalaŋ, aŋ ŋana me ŋïïbde päy jï.

5 "Naana ikee kaacce än yaŋkalaŋ ti ye, ïïjje jaajje ogo, ‘Ŋïïbbïn än yaanni ti.’ 6 Aŋ naana mäŋkalaŋ bilti a män ŋïïbbïn ye, i ŋïïbbïn yeenic bi wäätï ke ike, aŋ naana baati ye, ŋïïbbïn yeenic bi ḍuku ikee ti. 7 Aŋ ikee cääye än yaanja ti, äme i mäte waak'a bilti iken ti ye, m'ana ñuugal ye, ṭäkï yek ñuugula yeene. Ikee ŋana bagdede äärgä gïtï.

8 "Aŋ naana ikee kaacce ti baan mooye yaŋkalaŋ jï ye, aŋ ikee gïmgene wäygen ye, waak'a iñte kä ye ame. 9 Aŋ rackä yeeken ṭeeñe aŋ kiine ogo, ‘Yätkïtïn Jooŋ cokilin ti ikee ti.’ 10 Aŋ baan mooye yaana kääcke ti aŋ ikee batta gïmkete mä yeeke ye, kaace woo pääygä yeeke gïtï aŋ ikee jaajje ogo, 11 ‘Ṭüüpon yek baan yeenic yaaka a kürcïdïnï kïïgo ti ye, ṭiŋgene kä me ïñï a gin'a nüütï ye. Aŋ ŋïje, Yätkïtïn Jooŋ cokilin.’ 12 Aŋ ikee kiine, äŋ jïñe yen jooññu naana bi ḍägä ye, baan yaanni jooññe bi käälcï woo kä jooññu Caduum wääna joojene daa me ye."

13 "Jooññu ikee ti mä Korajïïn ke mä Beetcayda! Naana yoku wakkä yäwkä yaaka näŋgene kä yaakki, naŋŋä a mä yaackä ti Cüür ke Cïdoon ye, yoku mä yeeken ḍaŋŋä kä nääŋkä yaackä yeeken kä on, aŋ iiŋcin buruŋgu nüüjdüŋ aŋ tükcïn ṭaaṭaŋ witken ti nüütï ääkcin yeenen. 14 Aŋ jooññu yen mä Cüür ke Cïdoon bi lïïkïdï kä jooññu yeenic nïïnnä jooññu ti. 15 Aŋ ikee mä Kaparnahuum, ikee bi eemge me polloŋ jï? U'u! Ikee bi yipjene me maccük nänṭä ba' jooññu."

16 Aŋ baaddoni yeeke kiinne ogo, "M'ana ikee tiiŋgede ye, Ika tiiŋgada. Aŋ m'ana ikee tuuje yokïn ye, Ika tuuja yok, aŋ m'ana Ika tuuja yok ye, M'ana Ika tuujana ye, tuuje yok."

17 Aŋ baaddoni yaaka tucce caykä kä ŋaṭükel witken kä yewwe ye, ḍuukin kä jon ñamme aŋ Yeecüwa kiini ogo, "Mügdo, ke meŋkeekeni cäänna ikoon tiiŋkoton kä yäṇtonḍü."

18 Aŋ kiinne ogo, "Wiñ yen Meŋkeekeni yooṭṭu ḍïmmïdï ïñï ñaalok polloŋ jï bata wïldïn. 19 Aŋ ikee iñde mügdïn yaana määre kä gïtï käggä ke jïïdgä aŋ yuce kä teynä muure yen ädäŋ ye. Aŋ baati gin'a ikee bi icke ye. 20 Aŋ ŋana juuggic ñabaŋ ogo wääktäŋŋi ikee tiiŋgededa, juuggic dale ñapï nääŋka yäṇtäŋginic peṭene daa me polloŋ jï ye."

21 Aŋ äŋ waŋe yaanja ti Yeecüwa küümmü kä jon ñamme ke Wääktäŋ Laṇṇä yen Jooŋ, aŋ jaajjin ogo, "Ika mäŋä Ïkï Wäyo, Mügdo yen polloŋ ke ŋommañ, nääŋka nääŋkä yaakki päängeneeda yokïn ŋäjjoni ke m'aka a nüütïn ye, aŋ nüütkeneeda m'aka belok bata merkälen ye. Ee, Wäyo, a yaaka ṭäkkä ogo wääto ye ikki. 22 Waak muure iñana kä Wäyo ïṇtï ti. Aŋ baati m'ana ŋäjjä Minneni ye, a Wäy pare, aŋ baati m'ana ŋäjjä Wäy ye, a Minneni pare ke m'ana wagi Minneni aŋ nüütkene woo ike ye."

23 Aŋ däämjin baaddoni yeeke ti, aŋ jääjgene woo pääken ogo, "Ñaaynä m'aka waŋgen yuṭṭu nääŋkä yaaka yoodde yaakki! 24 Ikee kiine, bäṭoni ḍiirken ke yätkäni ḍiirken iken ṭäkkä yoku ogo nääŋkä yaaka yooddee yaakka yoorjï aŋ iken batta a yuṭin, aŋ ṭäkkä ogo yoku iken tiiŋo jiik yaaka tiŋdee yaakka aŋ iken batta a tiiŋin."

25 Aŋ nüüto yen jiik ḍoocin yek Jooŋ yaŋkalaŋ juwin ñaalok, aŋ puucce taaññe ogo, "Nüüto, ika näŋjä ogoo nuŋko käñä kä üṇṇü ke cüle ye?"

26 Aŋ luugi Yeecüwa ogo, "Jiik ḍoocin a pergin ogo ŋaaka? Aŋ pagä ogoo?"

27 Aŋ luuŋŋe ogo, "Pïṭo Jooŋ yüünü bilgä kä jonü muure, aŋ kä yorü muure, aŋ kä teynä yüünü muure, aŋ kä paydinni yüükü muure, aŋ m'ana yiire kä ye, bilgä bata yorü aŋan."

28 Aŋ kiini Yeecüwa ogo, "Jiik yüükü yaakka a gïtken. Nääŋä aŋan ken bi üdïï."

29 Aŋ ike ṭäkï ḍoŋe güüdede woo, aŋ Yeecüwa taaññe ogo, "M'ana yiiron kä ye, a ŋaani?"

30 Aŋ luugi Yeecüwa ogo, "Oon yaŋkalaŋ ätä Oorcalïïm üüŋïdï ïñï nänṭ'a battä me ogo Ariya ye, aŋ ḍimjin mäddoŋŋi ïnken ti, jiibi aŋ gütï yokïn woo kä buruŋgu, aŋ mañji ïñï wägdïdï.

31 "Aŋ büüṭï woo män daaŋ yaŋkalaŋ cäänna attä kä päy yaanna, aŋ wääna men yooṭṭee daa kä ïñï ye, pïrkene wic attä kä päy taaŋŋe yaŋkalaŋ. 32 Aŋ cäänna män Laawï yaŋkalaŋ äätin kä päy yaanna, aŋ yoorre aŋ pïrkene wic aŋ attä kä päy taaŋŋe yaŋkalaŋ. 33 Aŋ män Caamira yaŋkalaŋ kääjin kä päy yaanna cäänna, aŋ wääna yoorreeda kä ye, ängene ŋïngïn. 34 Umgene ti aŋ kuggu yeeke lijgene waŋgin ñownä ke määk aŋ paarre waŋgin. Aŋ men dutte ñaalok tüürüŋ yeene ŋäc aŋ äätenee kä nänṭ'a nïïnene me kä tiil ye, aŋ tïïññe. 35 Aŋ tïṇṇäk aŋŋi män Caamira ääcin woo tiilgä gälkä waŋgen kä yewwe, aŋ iññe m'ana mügït nänṭä yaana nïïnene me ye, aŋ kiinne ogo, ‘Tïïjä, aŋ wääna bi ḍuuku kä ye, wakkä yaaka ŋuccin ti ye, tiil yeeken bi icä.’

36 "Aŋ m'aka kä ḍäk yaakka ti a ŋaani ken yooddu yoku a m'ana yiirä ke men yaana ḍimjin mäddoŋŋi ïnken ti yaanna?"

37 Aŋ luugi nüüto yen jiik ḍoocin ogo, "A m'ana ike ängi ŋïngïn yaanna."

Aŋ kiini Yeecüwa ogo, "Atä aŋ nääŋä bata ike."

38 Aŋ wääna Yeecüwa äätee päy jï ke baaddoni yeeke ye, iken äätin baan ṭuule yaŋkalaŋ ti. Aŋ iiŋ yaŋkalaŋ battä me ogo Marta iken gïmgï än yeene jï. 39 Aŋ ike cääyge käwen battä me ogo Märïyam, ike cääjjin ïñï Pïṭo kïïge ti tiŋit jiik yeeke. 40 Aŋ wääna Marta ñuugulee kuckon näŋgedee kä wilgä wakkä äämkä ye, äätin aŋ Yeecüwa kiinne ogo, "Pïṭo, batta yooddu käwo ika mañjana ïñï i ika ñuugulu pari? Kiinä dalä ätä ika yüükka ti!"

41 Aŋ luugi Pïṭo ogo, "Marta, Marta, ïkï paydä jiik jïñü, aŋ agä penon kä wakkä ḍiirken. 42 Aŋ gin kä keelok ogo ṭok ken yore ṭäkke. Märïyam wäkkä gin'a ŋeraŋ ye, aŋ a yaana batta bi äbänä me woo ike ti ye."