1 Aŋ ääŋkalaŋ ti Yeecüwa kaaññä kä yirkä gïtï Äŋ jïñe Wääktäŋ ti, aŋ baaddoni yeeke päk witken jecä aŋ wooccutu ïnken ti aŋ amgä. 2 Aŋ kiini Pïrrïcïïnnï yakkalaŋ ogo, "Ikee nääŋe gin'a batta gïmkätä jiik ḍoocin Äŋ jïñe Wääktäŋ ti ye, ina?"

3 Aŋ luugi Yeecüwa ogo, "Ikee batta age päkin nääŋk'a naŋi Daawüüt wääna näke daa käñ, ke m'aka ke ike ina? 4 Aŋ kaaccä än jï ba' Jooŋ aŋ kuññu bïggï latkä, aŋ ämmä, aŋ m'aka ke ike ye iññe, aŋ a yaana batta gïmkätä jiik ḍoocin amgä ye, a mä däŋkä pääken ken ämï." 5 Aŋ kiini Yeecüwa ogo, "Minneni Mänbaan a Mügdo yen Äŋ jïñe Wääktäŋ."

6 Aŋ Äŋ jïñe Wääktäŋ kalaŋ ti, Yeecüwa attä daaŋmallä yen Yühüüṇṇï ti, aŋ jujjin kä nüüṇṇü me. Aŋ mäŋkalaŋ wïca ïṇte birrä a diton. 7 Aŋ nüütoni jiik ḍoocin yek Jooŋ ke Pïrrïcïïnnï Yeecüwa daamgä kä ätkïtïn naana bi ṭïïñï me Äŋ jïñe Wääktäŋ ti ye, määjene waan yaana käkkene daa wic ye. 8 Aŋ paydinni yeeken ŋïjï Yeecüwa, aŋ m'ana ïṇte a diton ye, kiinne ogo, "Juwu yuutci ñaalok me ñomgen ti." Aŋ men juwin aŋ yuuttu wïca. 9 Aŋ iken kiini Yeecüwa ogo, "Ikee taaje, a nääŋkä yaaka wali ye ken päjjïdï jiik doocin ti, Äŋ jïñe Wääktäŋ ti, a nääŋkä ŋerkä halla a nääŋkä yaackä? A määkin woo üṇṇü halla a ḍüümmü gïtï?" 10 Aŋ me yaakka daamjene muure aŋ men kiinne ogo, "Ïṇtü lajjä woo!" Aŋ lajjene woo, aŋ ïṇte päjjin. 11 Aŋ iken piindin kä yaac, aŋ iken luugjin tügïn ogo ŋaaka ken yoku näŋgïï Yeecüwa.

12 Aŋ nïïnnä yaŋkalaŋ ti Yeecüwa aajjin ñaalok pääm wic mälcïdï ñaalok, aŋ wïïrïn jïñe muure yoomme mäṭï Jooŋ ti. 13 Aŋ wääna nänṭä bojjenee kä woo ye, baaddoni yeeke bärkene ti, aŋ wääkin woo caay witken kä yew iken ti, aŋ äkkene ogo tüüjgï, aŋ iken a,

14 Camaan, yaana battä me ogo Bütürüc ina,

iken ke määden Aṇdaraawuc,

ke Yaagüüp,

ke Yuhanna,

ke Pïlïp,

ke Bartalamaawuc,

15 ke Matta,

ke Yuungon,

ke Yaagüüp minneni Alpï,

ke Camaan yaana näkä maam kä baan yeene ye,

16 ke Yahüüja minneni Yaagüüp,

ke Yahüüja Garyüütï, yaana a aagdo ŋäc yeene ye.

17 Aŋ Yeecüwa düürïn ïñï ke iken aŋ yuuttu ïñï nänṭä raaññä, aŋ wïca baaddoni yeeke ḍiräk kä yaac, aŋ ṭoŋ ḍiirken yoken agene ḍülgïn mä Yühüdïya ke mä Oorcalïïm aŋ ke mä koon mooye ḍoŋe yen mä Cüür ke Cïdoon, 18 äätin tiŋit Ike ti, aŋ iken ṭeeñgä kä rackïtenen. Aŋ m'aka näkä wääktäŋŋi yaackä ye, ṭeeñde cäänna. 19 Aŋ me muure ṭäkï ogo tabjï yok, nääŋka teynä kääjedee kä woo Ike ti aŋ iken ṭeeññeeda kä muure ye.

20 Aŋ Yeecüwa däämjin baaddoni yeeke ti, aŋ kiinne ogo,

"Ñaaynä ikee yaaka age aangï ye ti,

Yätkïtïn Jooŋ a yeenic!

21 Ñaaynä ikee yaaka näke käñ tiññaŋ ye ti,

ikee bi bure.

Ñaaynä ikee yaaka weege ye ti,

ikee bi yiṭe.

22 "Ñaaynä ikee ti naana ikee putkene me gïtï aŋ ikee ñoolge me ye, aŋ ikee kirge me aŋ yäṇtäŋginic tuucu yokïn bata mä yaackä ogo Minneni Mänbaan ye. 23 Juuggic ñapï nïïnnä yaanja ti aŋ ñääye, nääŋka iñdin yeenic yäwconḍe bi agee kä polloŋ jï ye. Aŋ a nääŋkä yaaka näŋgi dänkä yurgen bäṭoni ye, ikki.

24 Yiñ ikee ti ceeggï,

kä yaana kuññe kä waak ŋerkä yeekic ḍaŋŋa ye.

25 Yiñ ikee ti m'aka a burin tiññaŋ ye,

ikee bi näkkene käñ.

Yiñ ikee ti m'aka yïṭï tiññaŋ ye,

ikee bi nüüje aŋ ikee bi weege.

26 Yiñ ikee ti naana ikee maaŋge me yokïn ye,

a nääŋkä yaaka näŋgi dänkä yurgen bäṭoni yaaka a yeloŋŋi ye ikki.

27 "Aŋ ikee kiine, ikee yaaka Ika tiiŋgada ye, ädäŋŋi yeekic bilge, aŋ m'aka ikee putkene gïtï ye, näŋgede nääŋkä ŋerkä. 28 M'aka ikee tuumge ye ŋüülkede, aŋ m'aka ikee näŋkete yiñ ye mäṭe kä iken. 29 Aŋ naana m'ana ïkï paccey taaŋŋü ti ye, ṭukku taaŋŋü menen. Aŋ m'ana burŋu mooye yüünü koowde ye, ŋana ṭïïgä kä burŋu mä külok. 30 Aŋ m'ana ïkï ñujgeney yok kä ginkalaŋ ye, iñä, aŋ m'ana kuññu gin yüünü ye, ŋana ḍukkudu ike ti. 31 Aŋ me näŋgede nääŋkä yaaka ṭäkke ogo näŋgedeeda ko me ye.

32 "Aŋ naana ikee bille m'aka ikee bilgene ye, a ŋaaka ken ŋeraŋ aŋan ikee ti? Aŋ cäänna mä yaackä billä m'aka iken bilgänä ye. 33 Aŋ naana m'aka ikee näŋkete nääŋkä ŋerkä aŋ daa ken näŋgede nääŋkä ŋerkä ye, a ŋaaka ken ŋeraŋ aŋan ikee ti? Aŋ cäänna mä yaackä nääŋä aŋan. 34 Aŋ naana ikee iñde mïïngä m'aka yoodde ikee bi ḍuukkete ye, a ŋaaka ken ŋeraŋ aŋan ikee ti? Aŋ cäänna daa mä yaackä äccïdï mïïngä mä yaackä ti, aŋ ṭäkï ogo ḍüügïï muure. 35 Aŋ ädäŋŋi yeekic bilge, näŋgede nääŋkä ŋerken aŋ iñde mïïngä, ŋana daamjede ogo bi ḍüügïï. Aŋ aŋan iñdin yeenic bi yäwaŋ. Aŋ ikee bi wääte age merkä Jooŋ yaana Küülaŋ kä Yaac ye, Ike ŋeraŋ m'aka batta mäŋï Ike ye ke me yaacken ti. 36 Ängede ŋïngïn bata yaana Wääc me ängedeeda ŋïngïn ye.

37 "Ŋana me jooje, nuŋko ŋana käñde kä jooññu. Ŋana ikee ine, nuŋko ŋana käñde kä ennä. Kulkede, nuŋko bi käñe kä kulkin ye. 38 Iccede, aŋ ikee bi iñge Jooŋ. Pääynä ŋerconḍe cïge aŋ yoge ke puukce woo, aŋ bi daa puukkene kä me cuukulli yeekic gïtï. Aŋ kä pääynä yaana pääjgede kä me ye, ken daa bi pääjgene kä me."

39 Aŋ kiini Yeecüwa kä gäärrä ogo, "Uyku yoku lïïṭï lodit uyku? Iken batta bi ḍïmjï käälok muuṭuk? 40 Baati baaddo yaana nüüto yeene käälede ïñï ye. Baaddo yaana nüüṇṇü yeene päärre ye, wäätï bata nüüto yeene.

41 "Ïkï däämä luum yaana määdic ke käwic waŋe ti ye, aŋ jaan mooye yaana waŋü ti yaanna batta daamä ina? 42 Aŋ määdic kiiṇdä ogo, ‘Dalä luum yaana waŋü ti yaanna äbä woo,’ i ïkï jaan mooye yaana waŋü ti yaanna batta yooddu ina? Ïkï lääño! Por jaan mooye äbä woo waŋü ti nuŋko däämii ṭeṭaŋ, aŋ nuŋko luum määdic äbeeda woo waŋe ti ye.

43 "Jaan ŋerconḍe batta giit ṭulge yaacken, aŋ jaan yaajgonḍe batta giit ṭulge ŋerken. 44 Aŋ jaan daa bi ŋïje kä ṭulge. Yoku jaan yaana beel bata ŋoommu ye ṭulge urgu me tiim ti, ke yoku jaan yaana beel bata lüütkon ye ṭulge urgu me küügü ti? 45 Män ŋerrä tuññu yeene ŋerconḍe jï ääcïdï woo wakkä ŋerkä jone ti, aŋ män yaaññä tuññu yeene yaajgonḍe jï ääcïdï woo wakkä yiñ jone ti. Aŋ lemmä jaay wakkä yaaka jon agee kä küümgïnï ye.

46 "Ika yaawa ogo, ‘Pïṭo, Pïṭo,’ i nääŋkä yaaka kiiṇde kä ye, batta naŋde ina? 47 M'ana ätä Ika ti aŋ tïïŋï jiik yeeki aŋ ñuugulee kä ye, ikee bi nüütke beel bata ŋaaka. 48 Ike bi beel bata oon yaana kuṭṭu än, küüñjene ïñï kä lüür aŋ ŋoye ïñï baṇṇe kä karkar ye. Aŋ wääna tääl yiiŋenee kä ye, än yaanna moṭṭe woo, aŋ batta a ḍïmmïnï nääŋka agee kä baton kä ṭeṭaŋ ye. 49 Aŋ m'ana jiik yeeki tiŋde aŋ batta ñuugulee kä ye, i beel bata oon yaana kuṭṭu än ŋomgu gïtï aŋ batta agee kä baton ŋoy ye. Aŋ wääna tääl yiiŋenee kä ye, än yaanna moṭṭe woo, aŋ oja ḍïmmïn ïñï, aŋ ḍüümtinene yäwaŋ."