1 Aŋ Äŋ jïñe Wääktäŋ ti wääna Yeecüwa attee ämee kä ginäämkä än yen woydo yen Pïrrïcïïnnï ye ti, i Ike daamgä kä yaac. 2 Aŋ oon yaŋkalaŋ bilti ñome ti wïca tirke ke bugge wenok. 3 Aŋ Yeecüwa tääccin nüütoni yek jiik ḍoocin yek Jooŋ ti ke Pïrrïcïïnnï ti ogo, "Ṭeeññä Äŋ jïñe Wääktäŋ ti päjjïdï jiik ḍoocin yek Jooŋ ti halla batta päjjïdï?" 4 Aŋ iken tïïŋjïn ïñï. Aŋ tamme yok aŋ ṭeeññe aŋ tucce woo. 5 Aŋ iken kiini ogo, "Ikee ti m'ana cääyge minneni halla yaan aŋ ḍïmjï jïïdük Äŋ jïñe Wääktäŋ ti ye, batta yoku äbe woo kä bïraŋ?" 6 Aŋ iken batta a lïïṭïn kä luukcin kä yaakka.

7 Aŋ wääna Yeecüwa ukcenee gïtï wilgä wäkene nänṭä ba' eemdin ye, i nüütkene gäärrä ogo, 8 "Naana ïkï bärkini mäŋkalaŋ ammani ñäänkä ti ye, ŋana ïkï cääjjädä nänṭä ba' eemdin, nuŋko mäŋkalaŋ bilti yaana kääṭï kä ïkï ye agee bärkini. 9 Aŋ m'ana ïkï bärkeney ye, bi ätä aŋ ïkï kiiney ogo, ‘Nänṭä yüünü iñä men yaanni.’ Aŋ ïkï bi wükcü woo kä loon cääjjä ïñï kä pet.

10 "Naana ïkï bärkini me ye, atä aŋ cääjjä ïñï kä pet, nuŋko m'ana ïkï bärkeney yaanna naana ätä ye, i ïkï bi kiiney ogo, ‘Muukonḍi, cääjjä ñaalok nänṭä ba' eemdin.’ Aŋ wäättan ïkï bi eemgi me wilgä ñomgen ti muure yaaka ke ïkï ye. 11 M'ana ḍoŋe äärede ñaalok ye, i bi ḍuukunu me ïñï, aŋ m'ana ḍoŋe ḍuukcede ïñï ye, i bi ääränä me ñaalok."

12 Aŋ Yeecüwa jaajjin cäänna oon yaana me bärkene ye ti ogo, "Naana ïkï näŋŋi ammani jon ñamme ye, ŋana müggü bärkädä ke mädgic ke mä yüükü ke ceeggï yaaka yiire kä ye, nuŋko iken cäänna ïkï bärkiti aŋ ïkï wangi. 13 Aŋ naana ïkï näŋä ammani jon ñamme ye, aangï ke ŋolku ke puudgu ke uykuni ken bärkä ti, 14 aŋ ïkï bi agä ŋüülkïnï. Nääŋka iken batta wangi kä ye. Ïkï bi wangi me juwin mä tüwïn yek wotku ti."

15 Aŋ wääna mäŋkalaŋ m'aka cääyene ïñï därŋañ ti aŋ tiiŋŋee kä jiik yaakka ye, i Ike kiini ogo, "Ŋüülkïn m'ana bi ämï bïggï Yätkïtïn yen Jooŋ ti ye."

16 Aŋ kiini Yeecüwa ogo, "Oon yaŋkalaŋ näŋŋä ammani jon ñamme mooye aŋ bääṭin ti me kä ḍiräk. 17 Aŋ wuuŋ yen ammani jon ñamme ti ike tuccin ñuugulo yeene ogo ato mä bärkïnï kiinje ogo, ‘Ääte, waak muure a tootin.’ 18 Aŋ iken muure jujjin yaŋkalaŋ daa kä jiike. Aŋ m'ana ïïjjïdï ti ye jaajjin ogo, ‘Ika por kijdä yiil, aŋ päjjïdï ika atä woo aŋ yooru. Kura kulkaa.’ 19 Aŋ yaŋkalaŋ jaajjin ogo, ‘Ika kiññä yätkä kä caay yek puuynu aŋ ika atä puuccudu. Kura kulkaa.’ 20 Aŋ yaŋkalaŋ jaajjin ogo, ‘Ika ḍiññä iiŋ, aŋ ika batta bi äätä.’

21 "Aŋ ñuugulo ḍukcin aŋ men mooye yeene ickene jiik yaakka. Aŋ män än pennä aŋ ñuugulo yeene kiinne ogo, ‘Kaacci woo kä bïraŋ pääygä mäyken gïtï ke pääygälen gïtï baan mooye jï, aŋ ääcä aangï ke ŋolku ke uykuni ke puudgu.’ 22 Aŋ ñuugulo jaajjin ogo, ‘Men mooye, eenjin yüünü näŋŋä ḍoŋe, aŋ nänṭä kalaŋ mor bilti.’ 23 Aŋ men mooye ñuugulo yeene kiinne ogo, ‘Atä pääygä gïtï ke kalkä ti, aŋ me ïïrä dalä ätä nuŋko än yeeni küümee kä. 24 Ikee kiine, m'aka ïïjgï me bari me ye, baati yaana bi näkkä amma yeeni ye.’"

25 Aŋ ṭoŋ ḍiirken äätä ke Yeecüwa aŋ ṭukkene ñome aŋ kiinne ogo, 26 "Aŋ naana m'ana äätïdï Ika ti ye, i wäyen ke meen ke iiŋe ke merkälen ke mädgen ke käwgen aŋ cäänna ke üṇṇü yeene bilgene kä yaac käälcïdï woo Ika ti ye, i batta wäätcïdï a baaddo yeeni. 27 Aŋ m'ana kaakkon yeene batta ädde aŋ bäätïdï Ika ti ye, batta bi wäätï a baaddo yeeni.

28 "Aŋ naana mäŋkalaŋ ikee ti ṭäkï bätï än küülconḍe ye, ike batta por ïïjjï kä cääjjin ïñï aŋ tiilgä yeeke page naana ḍääkit korru ye? 29 Aŋ naana ïïjjïn ken naŋŋe aŋ batta agee lïïlgon kä ḍaaŋŋä ye, i m'ana yüṭï ye ike bi yirkätä, 30 aŋ bi jayok ogo, ‘Oon yaanni uccin kä baṇṇä aŋ batta agee kä lïïlgon kä ḍaaŋŋä.’

31 "Aŋ naana yätkä yaŋkalaŋ atï woo ke ook kä 10,000 ogo iken näägo ke yätkä yaana äätïdï ike ti ook kä 20,000 ye ike yoku batta ïïjjï cääjjï ïñï aŋ püccï naana ike teyaŋ kä yaac kä pärjin ke yätkä yaanna ye? 32 Aŋ naana batta lïïlde ye, i ike tüccï tüüjgï yätkä ti i iken uturaŋ woo aŋ tääccï kä ŋïïbbïn. 33 Aŋ kä yuudu keellä, m'ana batta waak yeeke dalde buw muure ye, i batta bi wäätï a baaddo yeeni.

34 "Äyyä ŋeraŋ, aŋ naana äyyä lämme yääynä ye, i bi läpï ïñï ogoo ŋuca? 35 Batta päjjïdï ŋuca ŋommañ ti ke gün ti, päjjïdï yeepänä me woo. Aŋ m'ana cääyge gitke ye, dale tïïŋï aŋ ooke gïtï."