1 Aŋ me ḍiirken jujjin kä perrä jiik ke nääŋkä yaaka näŋŋä ḍuuggen waadgo ti ye. 2 Aŋ bata yaana agene mä yuṭin ye, jiik pakin laygin waadgo ti, kä ñuuguloni yaaka kä on ye ti. 3 Aŋ ika ti yooddu ŋeraŋ cäänna kä wakkä muure yaaka baaddänä ṭeṭaŋ kä ïïjjïn ti nä ye, aŋ pirkenii kä ïkï Tïyapülüc män ŋerrä, kä ḍooccin yaana ŋeraŋ ye, 4 nuŋko ŋäjjii kä nüüṇṇü yaana nüüdïnï kä me ye, agee kä gïtken ye.

5 Aŋ wääna yätkä Ïïrüüdüc agee kä mükon kä baan yaana battä me ogo Yühüdïya ye, män daaŋ yaŋkalaŋ battä me ogo Jakarïya, a kun yen mä Abïïya. Aŋ iiŋe battä me ogo Lïjäbet, aŋ ike a kaaynä Haaruun cäänna. 6 Aŋ Jakarïya ke Lïjäbet a me wotken muuṭuk Jooŋ ti, iininni yek Pïṭo muure baattä ke jiik yeeke, aŋ iken ḍuuggen ladaŋ.

7 Aŋ iken batta cääygene merkä, nääŋka Lïjäbet agee kä burŋu ye, aŋ iken muuṭuk ḍuuŋdin. 8 Aŋ ääŋkalaŋ wääna ñuugula a yen kun Jakarïya ye, i ike ñuugal a män daaŋ Jooŋ ñome ti, 9 aŋ kä poñku yaaka naŋtä mä däŋkä yäädgene ñuugulani ye, ñuugula ḍimjin ike ti, yaana kaaccedee kä änlaṇṇä yen Pïṭo jï ḍüüŋjedee kä wakkä pïlkä ye.

10 Aŋ wääna ḍüüŋjedee kä wakkä pïlkä ye, i me ḍiirken mäṭï woo üṇtük. 11 Aŋ malak yen Pïṭo üükïn woo ike ti, aŋ yuuttu taaŋŋä birrä yen tambal yaana ḍüüŋcete me wakkä pïlkä ye. 12 Aŋ wääna yoorene daa Jakarïya ye, ike ṭeeŋŋä aŋ näkki liin kä yaac. 13 Aŋ kiini malak ogo, "Jakarïya, ïkï ŋana booju. Jooŋ mallä yüünü tiiŋŋe, aŋ ïïŋü Lïjäbet ïkï bi gitkey minneni aŋ bi äkkä ogo Yaaya*. 14 Aŋ jonü bi ñapï ïñï kä yaac, aŋ me ḍiirken bi juuggen ñabaŋ kä yaana giidene daa me ye, 15 aŋ ike bi yäwaŋ Pïṭo ti, aŋ ike batta bi mätï määk, aŋ ike bi a küümon kä Wääktäŋ Laṇṇä yen Jooŋ kä meen jïñe tinä. 16 Aŋ mä Icärayiil ḍiirken bi ḍuuge ŋäjäk Pïṭo Jooŋ yeenen ti. 17 Aŋ ike bi atï Pïṭo ñome ti, kä wääktäŋ ke teynä yen bäṭo Ïlïya, aŋ wäygä ḍuuke cuure juuggin ke merkä yeeken aŋ m'aka tüücï jiik ye, ḍuuge ti mä wotku ti, nääŋka me bi tutkeeda kä päy yen Pïṭo ye."

18 Aŋ Jakarïya malak taaññe ogo, "Aŋ gin yaanni bi ŋäjjä ogoo? Ika agä daan aŋ iiŋ yeeni a ṭiin."

19 Aŋ luugi malak ogo, "Ika agä Jïbïrïïn. Ika yuddu Jooŋ ñome ti, aŋ ika tuujana ogo ïkï kïïnjïda aŋ ïkï päkkïda jiik ŋerkä yaakki. 20 Aŋ kä tiññaŋŋä ïkï batta bi lïïṭä jiik ke äŋ jïñe yaana nääŋkä bi näŋene ḍuuggen ye, nääŋka batta agii kä lüggïnï kä jiik yeeki ye, aŋ jiik yeeki bi näŋï ḍuuggen äŋ jïñe yaanja ti."

21 Aŋ mäbaan muure kïïjï Jakarïya woo üṇtük aŋ me witken ḍiiktin kä kuurin yeene änlaṇṇä yen Jooŋ jï.

22 Aŋ wääna kääjenee kä woo ye, batta lïïṭït iken jääckätä, aŋ ŋïjï ike a yuṭon ginkalaŋ yooddin ti äräk änlaṇṇä jï. Aŋ wäättana iken jääckätä kä ïnke i batta lïïṭït jiik. 23 Aŋ wääna ḍaŋŋee kä ñuugula yeene änlaṇṇä jï ye, i ike ḍukcin paa. 24 Aŋ wääna nïïnkä yaakka baakkene kä ye i iiŋe Lïjäbet laaccä, aŋ nääkin pankä kä duuc i läñ yeene batta nüüdede woo aŋ jaajjin ogo, 25 "A yaana näŋgana kä Pïṭo ye inni, nïïnkä yaakki ti ika nüütkana ŋerrä yeene, aŋ loon yeeni aŋgene yok me waadgen ti."

26 Aŋ pankä yaaka kä ḍüügük laaccene Lïjäbet ye, Jooŋ tuccin malak Jïbïrïïn baan yaana ogo Jalïïl ye ti, nänṭ'a battä me ogo Naacira ye, 27 ṭuul yaana kücï oon battä me ogo Märïyam ye ti, a yütkïnï oon battä me ogo Yuucip a kaaynä yätkä Daawüüt. 28 Aŋ malak attä ike ti aŋ kiinne ogo, "Ogook, ïkï yaana agä ŋüülkïnï ye. Pïṭo ke ïkï."

29 Aŋ Märïyam ṭeeŋŋä kä yaac kä jiik malak aŋ ḍoŋe taaññe ogo, "Ŋïïbbïn yaanni bi a yen ŋaaka?" 30 Aŋ kiini malak ogo, "Märïyam, ŋana ïkï booju, ïkï käññi ŋerrä Jooŋ ti. 31 Aŋ ïkï bi laacci aŋ ïkï bi giidä Minneni, aŋ bi äkkä ogo Yeecüwa. 32 Aŋ bi yäwaŋ aŋ bi battä me ogo Minneni Jooŋ yaana Küülaŋ kä Yaac ye, aŋ bi mükkünü Pïṭo Jooŋ nook mügdïn yen daan wäyen Daawüüt, 33 aŋ kaaynä Yaagüüp bi müge ke cüle, aŋ Yätkïtïn yeene batta bi düñü!"

34 Aŋ Märïyam malak taaññe ogo, "Aŋ bi wäätï ogoo aŋan i ika batta agä cääyon ke oon yaŋkalaŋ aŋan?"

35 Aŋ luugi malak ogo, "Wääktäŋ Laṇṇä bi käjä ïñï ïkï ti, aŋ teynä yen Jooŋ yaana Küülaŋ kä Yaac ye, ïkï bi mïïley yok. Aŋ män laṇṇä yaana bi giidä woo jïñü ti ye, bi battä me ogo Minneni Jooŋ. 36 Aŋ yooru, Lïjäbet yaana a yïmgä yüükü ye, cäänna laaccä minneni i a ṭiin, aŋ a paan yeene yaana wäätcete kä ḍüügük ye inni, aŋ a ike yaana battä me ogo burŋu ye. 37 Aŋ baati gin'a Jooŋ yoje ye."

38 Aŋ Märïyam jaajjin ogo, "Yooru, ika agä m'ana ñuugal Pïṭo ye. Jiik yüükü dalä wäätï bata yaana kiinnaa kä ye." Aŋ mañji ïñï malak.

39 Aŋ waan yaanja ti Märïyam juwin bännä tüümoni witin baan yen mä Yühüdïya. 40 Aŋ kaaccä ti paa ba' Jakarïya aŋ Lïjäbet ŋïïmme. 41 Aŋ wääna ŋïïbbïn Märïyam tiiŋene daa kä Lïjäbet ye, minneni ñääjjin jïñe ti, aŋ Lïjäbet küümmü kä Wääktäŋ Laṇṇä. 42 Aŋ ike yaajjin kä yaac ogo, "Ïkï agä ŋüülkïnï määngä gïtï aŋ minneni yaana a käwcan jïñü ti yaanna a ŋüülkïnï! 43 Ika agä ŋaani, ke Pïṭo yeeni meen ääte kä ika ti? 44 Aŋ wääna tiiŋŋä kä ŋïïbbïn yüünü ye, i minneni yaana jïñï ti ye ñääjjin woo kä jon ñamme. 45 Ŋüülkïn ïkï ti, ïkï yaana gïmmïnï kä jiik yaaka ätä Pïṭo ti ogo bi näŋo ḍuuggen ye."

46 Aŋ Märïyam jaajjin ogo,

"Wääktäŋ yeeni mäŋï Pïṭo.

47 Aŋ joni ñabaŋ kä Jooŋ Magdo yeeni,

48 nääŋka kiingon yeene ḍoŋe agee kä ḍüügïnï ïñï aŋ payneeda kä ye!

Aŋ tiññaŋ ke ñomuk kilkä yek yuungu muure ika bi batta ogo män ŋüülkïnï,

49 nääŋka Ike yaana Lïïṭït ye,

näŋgana kä waak'a yäwaŋ ye.

Aŋ yäṇtonḍe a laṇṇä.

50 Aŋ ängin ŋïngïn yeene bi

bäätï kilkä ke kilkä yaaka bojok kä Ike ye.

51 Aŋ Ike näŋŋä nääŋkä teykä kä buŋe,

aŋ m'aka ḍuuggen äärätä ñaalok ye,

piirre gïtï.

52 Aŋ mügdoni äbene ïñï nooŋŋi yek mügdïn witin,

aŋ m'aka ḍuuggen agene kä ḍüügïnï ïñï ye, ken äärene ñaalok.

53 Aŋ m'aka näkä käñ ye,

yääŋgene gïtï kä wakkä ŋerkä, aŋ ceeggï tucce woo ïnken kä el.

54 Aŋ mä Icärayiil yaaka Ike ñuugulunu ye yüükkene ti,

aŋ ängin ŋïngïn yeene payde,

55 aŋ Ike ḍuccin jiik ke dänkä yurgo,

ke Abrayiim ke kaaynä yeeke ti ke cüle."

56 Aŋ Märïyam nääkin pankä kä ḍäk ke Lïjäbet, aŋ wäättana ḍukcin paa baanne.

57 Aŋ äŋ jïñe yaana giite Lïjäbet ye, ḍäägin, aŋ giiṇṇä minneni oone. 58 Aŋ tiiŋi m'aka yiirene kä ye, ke mä yeeke ogo ängin ŋïngïn mooye nüütkïnïï dako woo Pïṭo, aŋ yüükkï ti jon ñamme. 59 Aŋ nïïnkä kä ŋaṭükel iken äätin minneni ertä me, aŋ ṭäkï äkkätä ogo Jakarïya kä yäṇtäŋ wäyen. 60 Aŋ minneni meen kulcin ogo, "Ba'ay, battä me ogo Yaaya." 61 Aŋ luuki me ogo, "Mä yeekic ti baati m'ana battä me kä yäṇtäŋ yaanna ye." 62 Aŋ wäyen taaci kä ïnken ogo, "Minneni ṭäkkä äkkädä ogo ŋaani?" 63 Aŋ ñujjin ogo ike ïñjï me külkül aŋ peṭṭe ogo, "Yäṇtonḍe baddïï me ogo Yaaya." Aŋ me witken ḍiiktin. 64 Aŋ ojana poŋe kupkin aŋ lemme yore cükke aŋ wäättana jääyin woo aŋ mäŋjin ñaalok Jooŋ ti. 65 Aŋ m'aka yiirene kä ye muure bojgin. Aŋ m'aka cäyok tüümoni witin baan Yühüdïya ye, muure a jiik yaakka ken jaayge kä. 66 Aŋ m'ana daa tïïŋï ye, i ḍooje jone ti aŋ tääccï ogo, "Aŋ minneni yaanna atï wäätcïdï a ŋa' bi?" Nääŋka Pïṭo ïṇte agee kä tapon ike ti ye.

67 Aŋ wäyen Jakarïya küümmü kä Wääktäŋ Laṇṇä, aŋ bäṭṭä ogo,

68 "Maaŋŋä atï Pïṭo ti, Jooŋ yen mä Icärayiil,

nääŋka attee mä yeeke ookkeeda aŋ määgeneeda kä woo ye.

69 Aŋ ïkïïn ärkïnïn ñaalok Magdo yaana Lïïṭït ye,

kä än kiingon yeene yätkä Daawüüt ti,

70 bata yaana Ike jaaynee kä lemmä bäṭoni yeeke yaaka a latken kä on ye.

71 Aŋ Ike ïkïïn bi määgin woo ädäŋŋi ïnken ti,

ke m'aka ïkïïn pütkïnïn jugin ye ïnken ti.

72 Dänkä yurgo nüütkene ängin ŋïngïn,

aŋ paydee kä jiik ḍoocin yeeke yek latkä,

73 kä lïïttäŋ yaana lïïtkenee kä daan yuuro Abrayiim ye,

74 ogo ïkïïn määgïnda woo ädäŋŋi ïnken ti,

aŋ nuŋko maaŋjïnda ko

i ŋana ïkïïn boojjïn,

75 kä laṇṇä ke woṇṇu yuungu yooko ti muure ñome ti.

76 Aŋ ïkï, minneni yeeni, ïkï bi batti me ogo bäṭo yen M'ana Küülaŋ kä Yaac ye,

nääŋka bi ïïjjïï kä atii kä ñomuk Pïṭo tutkeeda kä päy ye,

77 aŋ mä yeeke nüütkü ogo bi käño määgin woo

ko kulkin nääŋkä yaackä yeeken.

78 Nääŋka Jooŋ yoono agee kä ängodo ŋïngïn ye,

kä buur äŋ yaana dïïkïdï ïñï ñaalok polloŋ jï ïkïïn ti ye,

79 dïïkïdï ïñï m'aka cäyok mïïllä gïtï aŋ cäyok ṭïïbbä tüwnü ti ye,

tïïcïn kä kïïgo yaaka atïn kä päy ŋïïbbïn ti ye."

80 Aŋ minneni pïr aŋ tey kä wääktäŋ. Aŋ ike cääynä woo teettälaŋ ke üüke woo mä Icärayiil ti.