1 Aŋ yun yen caay wiñen kä duuc mügdïn Kaycar Tibarayüüc ti. Wääna Biilaatuc Albüntï agee kä mügdo yen mä Yühüdïya aŋ Ïïrüüdüc agee kä mügdo yen mä Jalïïl aŋ määden Pïlïbbï agee kä mügdo yen Ïtoorïya ke Tarakuuni, aŋ Liyciniyaac agee kä mügdo yen mä Abileena ye. 2 I Annaan ke Kayaapa ken a ḍuuŋku däŋkä küülken. Aŋ waan yaanja ti jiik Jooŋ äätin Yaaya minneni Jakarïya ti woo teettälaŋ. 3 Aŋ Yaaya attä bänkä yaaka cokulaŋ ti wii mä Üürdün ti ye muure päkï ogo, "Ḍage kä nääŋkä yaackä yeekic aŋ büüṭe aŋ Jooŋ ikee bi kulke kä nääŋkä yaackä yeekic." 4 Bata yaana agee kä pergon meeŋka yen bäṭo Ïcaaya ti ye ogo,

"Mäŋkalaŋ yaaw woo teettälaŋ wïca ogo,

‘Päy toote yok yen Pïṭo

aŋ dale wotï woo.

5 Aŋ nänk'a a ḍääñgï ye muure dale kümok,

aŋ pämkä ke tüümoni muure wükü ïñï,

aŋ pääygä yaaka batta wodaŋ ye wotï woo

ke nänk'a ŋoṭuman ye yïljï woo.

6 Aŋ me muure bi yüṭï

maŋŋä yen Jooŋ.’"

7 Aŋ Yaaya ṭoŋ yaaka äätin ogo iken büüljï ye kiinne ogo, "Ikee merkä käggä! A ŋaani ken ikee kolle ogo ikee buurcee woo ko piinkä Jooŋ yaaka ääto ye? 8 Näŋe käwkä yaaka nüütï ogo nääŋkä yaackä dallee buw, aŋ ikee ḍuukenee Jooŋ ti ye. Aŋ ŋana ikee ḍuuggic ḍooje ogo wääc ogo Abrayiim. Ikee kiine, Jooŋ lïïṭï näŋï pämkä yaakka ti a merkä yek Abrayiim. 9 Aŋ tiññaŋ len a nüüton ti jengä bïcäŋgenen ti, aŋ jaan yaana giit ṭulge yejgaŋ ye, tääyänä me woo aŋ yeepänä me maccük." 10 Aŋ taaji ṭoŋ ogo, "Ikoon näŋjon ogoo?"

11 Aŋ ike luukcin iken ti ogo, "M'ana cääygene buruŋgu kä yewwe ye, i pääkä ke m'ana batta cääygene kä ye, aŋ m'ana cääygene ginäämkä ye näŋjï nääŋkä keelkä cäänna."

12 Aŋ ḍüṭoni yaacken cäänna äätin ogo iken büüṭo, aŋ jaajjin ogo, "Nüüto, nüütkoon ikoon näŋjon ogoo?"

13 Aŋ ike luukcin ogo, "Ŋana ikee ḍüṭe käälcïdï woo yaaka nüütkene kä me ogo naŋje ye."

14 Aŋ kääygä cäänna äätin aŋ jaajjin ogo, "Aŋ ikoon näŋjon ogoo?"

Aŋ luukke ogo, "Ŋana ikee kujde tiilgä me ti kä yääññä, aŋ ŋana me cïŋe kä yelkïtïn. Yeekic ken koowde aŋ ḍaŋŋä."

15 Aŋ me muure kïïjjïdï Macii ogo ääto ko bïraŋ, aŋ iken ṭäkï ogo ŋäjjïï naana Yaaya ken bi ogo Macii ye. 16 Aŋ iken muure luugi Yaaya ogo, "Ikee büüle kä piik, aŋ m'ana teyaŋ kä ika ye bilti äätïdï, aŋ ika batta yoku agä kiingon yeene yaana yoku päjjïdï gütï waygä yeeke wingen ye. Aŋ Ike ikee bi büüle kä Wääktäŋ Laṇṇä yen Jooŋ ke maañ. 17 Aŋ kuun yeene a ïṇte ti kuujjedee kä woo külkï päk gïtï, aŋ taga yeene wiñe bi laate woo, aŋ päk yeeke bi ḍülje tuññu jï, aŋ külkï bi tuñge maañ yaana batta tüwït ye." 18 Aŋ Yaaya me päkkene Jiik Ŋerkä kolde kä pääygä ḍiirken. 19 Aŋ Ïïrüüdüc yaana a mügdo ye, kuññu Ïïrüdïya iiŋ määden, aŋ geri Yaaya kä gin'a naŋŋe ye, ke wakkä ḍiirken yaaka naŋŋe ye. 20 Aŋ Ïïrüüdüc ŋuccin näŋŋä gin yaaññä kä yaac kä iccin Yaaya gaŋgar.

21 Aŋ wääna ṭoŋ muure büüṭṭene kä ye, i Yeecüwa büüṭṭü cäänna i mor Yaaya batta äcänä me gaŋgar jï. Aŋ wääna Ike mäṭee kä ye, polloŋ yore kupkene. 22 Aŋ Wääktäŋ Laṇṇä yen Jooŋ kääjin ïñï Ike ti kä biilkä gülküte, aŋ jiik jääyin ñaalok polloŋ jï ogo, "Ïkï agä Minneni yeeni yaana bilgä ñape ñab joni ye."

23 Aŋ wääna Yeecüwa ïïjjenee kä ñuugula yeene ye yuunge bi ḍakcïdï caykä kä ḍäk.

Aŋ mäbaan payit ogo Minneni Yuucip.

Aŋ Yuucip a minneni Haali.

24 Aŋ Haali a minneni Mataat.

Aŋ Mataat a minneni Laawï.

Aŋ Laawï a minneni Malkï.

Aŋ Malkï a minneni Yanna.

Aŋ Yanna a minneni Yuucip.

25 Aŋ Yuucip a minneni Mattatiya.

Aŋ Mattatiya a minneni Amuuc.

Aŋ Amuuc a minneni Nahuum.

Aŋ Nahuum a minneni Acüülï.

Aŋ Acüülï a minneni Najjaay.

26 Aŋ Najjaay a minneni Maat.

Aŋ Maat a minneni Mattatiya.

Aŋ Mattatiya a minneni Camaay.

Aŋ Camaay a minneni Yuucip.

Aŋ Yuucip a minneni Yahüüja.

27 Aŋ Yahüüja a minneni Junaan.

Aŋ Junaan a minneni Rïïca.

Aŋ Rïïca a minneni Jarabaabïl.

Aŋ Jarabaabïl a minneni Caaltïïl.

Aŋ Caaltïïl a minneni Niiri.

28 Aŋ Niiri a minneni Malkï.

Aŋ Malkï a minneni Addï.

Aŋ Addï a minneni Guucam.

Aŋ Guucam a minneni Almudaam.

Aŋ Almudaam a minneni Eer.

29 Aŋ Eer a minneni Jecüwa.

Aŋ Jecüwa a minneni Ïlïyaajar.

Aŋ Ïlïyaajar a minneni Yüraam.

Aŋ Yüraam a minneni Mataat.

Aŋ Mataat a minneni Laawï.

30 Aŋ Laawï a minneni Camoon.

Aŋ Camoon a minneni Yahüüja.

Aŋ Yahüüja a minneni Yuucip.

Aŋ Yuucip a minneni Yünaam.

Aŋ Yünaam a minneni Ïlïyakïïm.

31 Aŋ Ïlïyakïïm a minneni Maliya.

Aŋ Maliya a minneni Manna.

Aŋ Manna a minneni Mataata.

Aŋ Mataata a minneni Naacaan.

Aŋ Naacaan a minneni Daawüüt.

32 Aŋ Daawüüt a minneni Yecce.

Aŋ Yecce a minneni Ubeet.

Aŋ Ubeet a minneni Buwaac.

Aŋ Buwaac a minneni Caalim.

Aŋ Caalim a minneni Naac.

33 Aŋ Naac a minneni Amïnadaap.

Aŋ Amïnadaap a minneni Aaraam.

Aŋ Aaraam a minneni Hïjïroon.

Aŋ Hïjïroon a minneni Paaric.

Aŋ Paaric a minneni Yahüüja.

34 Aŋ Yahüüja a minneni Yaagüüp.

Aŋ Yaagüüp a minneni Icaak.

Aŋ Icaak a minneni Abrayiim.

Aŋ Abrayiim a minneni Taare.

Aŋ Taare a minneni Nahüür.

35 Aŋ Nahüür a minneni Caarüük.

Aŋ Caarüük a minneni Raaw.

Aŋ Raaw a minneni Paalic.

Aŋ Paalic a minneni Aabir.

Aŋ Aabir a minneni Caale.

36 Aŋ Caale a minneni Kinaan.

Aŋ Kinaan a minneni Arpiceet.

Aŋ Arpiceet a minneni Caam.

Aŋ Caam a minneni Noo.

Aŋ Noo a minneni Lamak.

37 Aŋ Lamak a minneni Matüceela.

Aŋ Matüceela a minneni Ïdrïïc.

Aŋ Ïdrïïc a minneni Yaarit.

Aŋ Yaarit a minneni Maalla.

Aŋ Maalla a minneni Kinaan.

38 Aŋ Kinaan a minneni Ïnooc.

Aŋ Ïnooc a minneni Ceet.

Aŋ Ceet a minneni Aadam.

Aŋ Aadam a minneni Jooŋ.