Lüka 20

Tääctäŋ kä Mügdïn yen Yeecüwa

1 Nïïnnä yaŋkalaŋ ti wääna Yeecüwa nüütee kä me kaal yen änlaṇṇä ti, aŋ päkee kä Jiik Ŋerkä ye, i umgi ḍuuŋku däŋkä ke nüütoni yek jiik ḍoocin ke me mäyken. 2 Aŋ kiintä ogo, "Nüütkoon, kä mügdïn yaana wali ye ken ina ñuugilii kä waak yaakka yaanna? A ŋaani ken Ïkï iññey mügdïn?"

3 Aŋ luukke ogo, "Aŋ ikee cäänna taaje tääctäŋ. Nüütka, 4 büüllü yen Yaaya ätä wa, ätä polloŋ jï halla ätä mäbaan ti?"

5 Aŋ iken luugjin pääken waadgen ti. Aŋ jayok ogo, "Naana ïkïïn jaaccïn ogo polloŋ jï ye, i ïkïïn bi kïïnïn ogo, ‘Aŋ Yaaya batta gïmgede ina?’ 6 Aŋ naana ïkïïn jaaccïn ogo, mäbaan ti ye, i ṭoŋ muure ïkïïn bi yïpïn kä pämkä kä yaana agene lüggïnï kä ogo Yaaya ogo bäṭo ye." 7 Aŋ iken luukcin ogo, "Batta ŋäjjon."

8 Aŋ iken luuki Yeecüwa ogo, "Ikee batta nüütkede kä mügdïn yaana näŋä kä waak yaakki ye."

Gäärrä yen Pïïtoni Yaacken

9 Aŋ ṭoŋ pääjgi Yeecüwa gäärrä yaanni ogo, "Oon yaŋkalaŋ pïïttä bal*20.9 balyaanni pïïtene me jaan ṭulge belok bata lüütkon. Aŋ näŋene me määk. , aŋ müükkene pïïtoni aŋ attä baan yaŋkalaŋ jï kä utar küürïdï. 10 Aŋ wääna wuuŋ ḍäägenee ye, i ike tuccin ñuugulo pïïtoni ti, ogo ïñjï jengä ṭulgen yek bal. Aŋ giibi pïïtoni, aŋ ḍuuki ŋäjäk ïnke kä lat. 11 Aŋ ike ŋuccin tuccin ñuugulo yaŋkalaŋ, aŋ cäänna giibi aŋ nääkki yok loon, aŋ ḍuuki ŋäjäk ïnke kä lat. 12 Aŋ ŋuccin tuccin ḍäken. Aŋ yaanna cäänna näŋgi yok kuuŋ aŋ ñooṭi woo.

13 "Aŋ män bal jaajjin ogo, ‘Ika bi näŋjä ogoo? Ika bi tuccu minneni yeeni yaana bilgä ye, naana ye bi eemtä.’

14 "Aŋ wääna yooṭene daa kä pïïtoni ye, i iken jaajjin waadgen ti ogo, ‘A yäto yen män bal inni, ääte näkïn ḍok aŋ yäṇṇä yeene wäätï a yoono.’ 15 Aŋ yeepi woo bal taaŋ aŋ nägi ḍok. Aŋ pïïtoni bi naŋgä ogoo män bal? 16 Ike bi ätä aŋ pïïtoni yaakca näge ḍugin aŋ bal iñe mäkkalaŋ."

Aŋ wääna tiiŋŋene kä aŋan ye, iken jaajjin ogo, "Jooŋ batta ïccïdï." 17 Aŋ Yeecüwa däämjin iken ti aŋ taaññe ogo, "Meeŋka Jiik Jooŋ yaanni nüütï ŋaaka?

‘Jaan kïye yaana tuuji yokïn kuṭoni ye

ken wäättä a jaan kïye yen yoggon yaana tïïlcïdï ye.’

18 "M’ana ḍïmjï jaan kïye gïtï ye liiktit gïtï a pïlkälen, aŋ m’ana ḍimgänä gïtï jaan kïye mooye yaanni ye bi ruumtit gïtï."

19 Aŋ nüütoni jiik ḍoocin ke ḍuuŋku däŋkä määjï waan ogo Yeecüwa mügjï ojana, kä yaana ookene daa gïtï ogo gäärrä pakje ogo iken ye. Aŋ iken bojgin kä me.

Iccin Ḍüllü Kaycar ti

20 Aŋ Ike daamgä aŋ tucki mä jommu yaaka täkï ogo iken ogo mä wotku ye, nuŋko mügjï dako, ko gin’a jaaynee ye, nuŋko müükkïï dako mügdïn yen ḍuuŋgon kääygä ye. 21 Aŋ taaji ogo, "Nüüto, ŋäjjon Ïkï jaayä aŋ nüütü ṭeṭaŋ aŋ Ïkï batta wäkä gïtï me aŋ Ïkï nüütü päy yen Jooŋ a jïñe. 22 Päjjïdï ikoon iccon ḍüllü tiilgä yätkä Kaycar ti halla u’u?"

23 Aŋ ṭäktäŋ yeenen ookke gïtï aŋ kiinne ogo, 24 "Nüütka tiilñan. Biilkä ke perrä yaanni a yen ŋaani?"

Aŋ iken luukcin ogo, "A yen Kaycar."

25 Aŋ Ike jaajjin ogo, "Ŋeraŋ, waak Kaycar iñe Kaycar, aŋ waak Jooŋ iñe Jooŋ."

26 Aŋ batta lïïltä kä müŋŋü me ñomgen ti kä jiikkalaŋ aŋ witken ḍiiktin aŋ tïïŋjïn ïñï.

Juwin Tüwnü ti

27 Aŋ wïca Cüddügïïnnï yakkalaŋ äätin yaaka jayok ogo juwin tüwnü ti baawgo ti ye. 28 Aŋ iken Ike taaji tääctäŋ ogo, "Nüüto, Müüca ikoon iingonon ogo naana oon määden tüwno ye, aŋ batta cääygïï ko merkälen ye i oon iiŋ koowje aŋ ääṭee ko ñaalok merkälen yek määden. 29 Aŋ wïca mädin kä ŋaṭükel yaana ïïjïdï ye, kuññu iiŋ aŋ tüwnü i batta cääyge merkälen. 30 Aŋ yaana bäätcïdï ye, 31 ke ḍäke ke iken yaaka kä ŋaṭükel yaakka iiŋ koowdi aŋ batta a dälcïnï ïñï merkälen aŋ tüwgïn. 32 Aŋ wäättan iiŋ tüwnü cäänna. 33 Aŋ juwin tüwnü ti aŋan iiŋ bi wäätï a yen ŋaani? Iken yaaka kä ŋaṭükel yaakka ike koowdi a iiŋen."

34 Aŋ kiini Yeecüwa ogo, "Merkä yek yuungu yaakki ḍïjï aŋ ḍeygä me. 35 Aŋ m’aka päjjïdï yuungu yaakca ti juwin tüwnü ti ye, batta ḍïjï aŋ batta ḍeygä me. 36 Iken batta bi tüwok ŋuca aŋ bi beeljï bata malaŋŋi aŋ iken a merkälen yek Jooŋ aŋ a merkälen yek juwin tüwnü ti. 37 Aŋ mä tüwïn juwin tüwnü ti aŋ cäänna nüüdï Müüca Meeŋka jï kä jaan küügü yaana käl ye, nänṭä yaana bärcenee Pïṭo ti ye, Jooŋ yen Abrayiim, aŋ a Jooŋ yen Icaak, ke Jooŋ yen Yaagüüp ye ti. 38 Ike batta a Jooŋ yen mä tüwïn Ike a Jooŋ yen mä üdïn aŋ me muure a üdïn kä Ike."

39 Aŋ nüütoni yek jiik ḍoocin yakkalaŋ Ike kiini ogo, "Nüüto, Ïkï jaayni ṭeṭaŋ." 40 Aŋ baati m’ana yore ñuwaŋ kä tajdin Ike ŋuca ye.

Macii a Minneni Ŋaani?

41 Aŋ Ike jaajjin iken ti ogo, "Iken jayok ogo Macii ogo Minneni Daawüüt ogoo? 42 Aŋ Daawüüt kä ḍoŋe jaay Meeŋka Uulgu ti ogo,

‘Pïṭo jaajjin Mügdo yeeni ti ogo,

Cääjjä buŋ birrä yeeni ti.

43 Ke ädäŋŋi yüükü

ḍoocu daa ïñï kïïgü ti.’

44 "Ike battä Daawüüt ogo, ‘Pïṭo,’ aŋ a Minneni yeene ogoo?"

Kolkolli Yiñ Lääñoni ti

45 Aŋ wääna me tiŋdene muure ye, i baaddoni yeeke kiinne ogo, 46 "Waŋgic tïïce nüütoni jiik ḍoocin ti, yaaka billä äätä kä buruŋgu bääykä, aŋ billä ŋïïptä me weeldüŋŋi ti, ke däŋkämalläni yek Yühüüṇṇï gïtï nänkä ŋerkä me ñomgen ti, ke nänkä ba eemdinni yek ammani jon ñamme ti ye. 47 Aŋ yaaka ämï wakkä boroni aŋ täkï mäṭï kä malläni bääyken. Aŋ iken bi käñï jooññu yäwconḍe."