1 Aŋ Yeecüwa tüüjgï yaaka kä caay witken kä yewwe ye bärkene ti, aŋ iññe teynä ke mügdïn yaana ñuulcete kä woo meŋkeekeni muure ye, aŋ ṭiiñene kä rackïtïnnï ye. 2 Aŋ tucce woo ogo päko Yätkïtïn yen Jooŋ aŋ ṭiiño rackä. 3 Aŋ kiinne ogo, "Ŋana ikee kujde ginkalaŋ ke ikee, ŋana lacan, aŋ ŋana kücam, aŋ ŋana bïggï, aŋ ŋana tiil, aŋ ikee ti ŋana mäŋkalaŋ buruŋgu küügde. 4 Aŋ än yaana kaacce kä ti ye, ikee cääye wïca daa ke baan yaanna mañje daa ïñï. 5 Aŋ naana baan yaana mä yeeke ikee batta gïmkete ye, kaace woo, aŋ ṭüüpon ṭeŋje woo kïïgïc ti a yaana bi nüütï ogo kollu yeenen ye." 6 Aŋ tüüjgï yeeke kaaccä woo aŋ attä bänkälen ti, päkï Jiik Ŋerkä, i ṭïïñï rackä nänṭä muure.

7 Aŋ nääŋkä yaakka muure tiiŋi mügdo Ïïrüüdüc, aŋ wiñe ḍiiktin kä jiik mäkkalaŋ ogo Yaaya ken juwono ñaalok tüwnü ti. 8 Aŋ yakkalaŋ jayok ogo bäṭo Ïlïya ken üükono woo, aŋ yakkalaŋ ogo bäṭoni yek mä ñomuŋŋu yaŋkalaŋ ken juwono ñaalok. 9 Aŋ Ïïrüüdüc jaajjin ogo, "Aton Yaaya eṭṭä witkin woo. Aŋ a ŋaani ina jiik yeeke tiŋdä belok aŋan yaakka?" Aŋ ike ṭäkï ogo yoorje.

10 Aŋ wääna tüüjgï ḍuukene kä ti ye, Yeecüwa nüütkï kä waak'a naŋi ye muure. Aŋ koowne üŋjenee woo pääken baan yaana battä me ogo Beetcayda ye. 11 Aŋ wääna ŋïjene daa kä ṭoŋ ḍiirken ye, Ike baati ŋäc. Aŋ iken paaki, aŋ nüütkene kä Yätkïtïn yen Jooŋ, aŋ m'aka a rackä ṭäkï ṭeeññä ye, ṭeeññe.

12 Aŋ biigin ti aŋŋi, tüüjgï yaaka caay witken kä yewwe ye, äätin Ike ti aŋ Ike kiini ogo, "Ṭoŋ yaakki tucci woo dalä atï bänkä ṭulgen ti ke yirkä yaaka cokulaŋ ti ye, nuŋko nïïnene wïca aŋ käñene wakkä äämkä, kä yaana nänṭ'a cääyïn kä yaanni a woo käpet ye."

13 Aŋ kiini Yeecüwa ogo, "Iñe dale ämï."

Aŋ iken luukcin ogo, "Ikoon cääygonon kä bïggï kä duuc aŋ yak kä yewwe, halla ikoon aton me ḍiirken yaakki muure kijgon wakkä äämkä?" 14 Aŋ ook bi ḍakcïdï 5,000 wïca.

Aŋ baaddoni yeeke kiinne ogo, "Ḍooce yokïn ïñï kä kurku, aŋ dale kun cääyge caykä kä duuc." 15 Aŋ me ḍooci yokïn ïñï muure. 16 Aŋ bïggï yaaka kä duuc ye ke yak yaaka kä yewwe ye koowne, aŋ däämjin ñaalok polloŋ jï, aŋ mäŋjin ñaalok aŋ wiiṇṇe gïtï aŋ iññe baaddoni yeeke ogo pääggïï mäbaan. 17 Aŋ iken ämmä muure ke burrene, aŋ baaddoni yeeke ääṭin ñaalok arwalli kä caay witken kä yewwe yek bïggï palken yek wiitin gïtï yaaka buuccu ye.

18 Aŋ ääŋkalaŋ Yeecüwa attä mälcïdï ñaalok woo pare aŋ baaddoni yeeke ke Ike, aŋ tääckene ti ogo, "Mäbaan jayok ogo Ika agjo ŋaani?"

19 Aŋ luugi ogo, "Mäkkalaŋ jayok ogo Büüṭo Yaaya. Aŋ yakkalaŋ jayok ogo bäṭo Ïlïya. Aŋ ŋuca yakkalaŋ ogo bäṭoni yek mä ñomuŋŋu yaŋkalaŋ ken juwono ñaalok tüwnü ti."

20 Aŋ tääckene ti ogo, "Aŋ ikee jaaye ogo Ika agjo ŋaani?"

Aŋ luugi Bütürüc ogo, "Ïkï agä Macii yen Jooŋ!"

21 Kolle aŋ ingene ogo jiik yaakka ŋana nüütkïdïï mäŋkalaŋ. 22 Aŋ jaajjin ogo, "Minneni Mänbaan bi wääcï wakkä ḍiirken, aŋ bi tuucu yok yätïnï ke ḍuuŋku däŋkä ke nüütoni jiik ḍoocin yek Jooŋ, aŋ Ike bi näkä me ḍok aŋ nïïnnä ḍäk ti Ike bi juwu ñaalok tüwnü ti."

23 Aŋ me muure kiinne ogo, "M'ana ṭäkï baaddin Ika ye, dale ḍoŋe wiire, aŋ kaakkon yeene ḍürde kamat aŋ Ika baadda. 24 M'ana ṭäkï üṇṇü yeene mäkkede ye, i bi yääye, aŋ m'ana üṇṇü yeene yääyde ogo Ika ye, i bi mäkke. 25 Aŋ mänbaan bi käñï ŋa' naana wakkä ŋommañ wiñe muure koowne aŋ ḍoŋe yääyne halla yaaccä woo ye? 26 Aŋ m'ana yore a maay kä Ika aŋ kä jiik yeeki ye, Minneni Mänbaan yore bi maaydit kä ike naana ätä kä gällä yeene ke gällä yen Wäy ti, ke yen malaŋŋi latken ti ye. 27 Aŋ ikee kiine a gïtken, mäkkalaŋ bilti winni batta bi näkkä tüwnü, ke yuṭene Yätkïtïn yen Jooŋ."

28 Aŋ nïïnkä kä cunuuk wääna Yeecüwa jaaynee jiik yaakka ye, Bütürüc ke Yuhanna ke Yaagüüp attene mälcete ñaalok pääm wic. 29 Aŋ wääna Yeecüwa mäṭee kä ye, ñome ääkcin biilkä aŋ buruŋgu yeeke bojjin ïñï ke gäldede. 30 Aŋ wina, ook kä yewwe jaayene kä, aŋ iken a Müüca ke Ïlïya. 31 Aŋ iken üükïn woo kä gällä, aŋ jaygin kä jiik tüwnü yeene, yaana ḍaŋŋa atï ḍääkï ḍoŋe Oorcalïïm ye.

32 Aŋ Bütürüc ke mügge nügdïdï näkä nïïnkä, aŋ wääna waŋgen pätkene daa ye, gällä yeene yooṭi aŋ ook kä yewwe yudok ke Ike. 33 Aŋ wääna ook Yeecüwa mañcete daa ïñï ye, Ike kiini Bütürüc ogo, "Men mooye, ŋeraŋ kä biltinono ti winni. Dalä ikoon kuṭon däŋkä kä ḍäk, yaŋkalaŋ a yüünü aŋ yaŋkalaŋ a yen Müüca aŋ yaŋkalaŋ a yen Ïlïya." I jiik yaaka jaaye yaakka kuje.

34 Aŋ wääna jaayee kä ye, curŋu üükïn woo aŋ iken äädi yokïn, aŋ wääna kaaccene curŋu gïtï ye, iken bojgin.

35 Aŋ yääw yaŋkalaŋ jääyin curŋu gïtï ogo, "A Minneni yeeni ina, yaana a wakon ye, tiiŋgede!"

36 Aŋ wääna yääw jaaynee kä ye, Yeecüwa kañi cääy pare. Aŋ iken tïïŋjïn ïñï nïïnkä yaakca ti baati m'ana agene kä nüütkïdïnï kä gin'a yoori ye.

37 Aŋ tïṇṇäk aŋŋi wääna kääjene kä ïñï pääm wic ye, paaki ṭoŋ ḍiirken. 38 Aŋ ṭoŋ ḍiirken yaakka gïtï mäŋkalaŋ yaajjin ogo, "Nüüto, ika ñuujudu Ïkï ti däämmä minneni yeeni ti, a minneni yeeni yaana a dune ye. 39 Aŋ utu jok wääktäŋ yaaññä ke octe daa yok yääw aŋ wiñe wïïrïdï aŋ jäwnä kääjïdï woo poŋe ti, aŋ rïïde ïñï kuckon aŋ liige yok aŋ batta äkkede ogo wec. 40 Aŋ baaddoni yüükü ñujgunu ŋïngïn ogo ñoolcï woo, aŋ iken yoji."

41 Aŋ Yeecüwa luukcin ogo, "Ikee yaaka luggin yeenic baati ye, aŋ age kil yaaññä ye! Aŋ ke tooku Ika cääyä ke ikee i ikee waaje?" Aŋ men kiinne ogo, "Minneni yüünü äbä winni!"

42 Aŋ wääna minneni äätedee ti Yeecüwa ti ye, wiñe wïïrïn aŋ yeepi ïñï meŋkeeke aŋ rïïtï ïñï. Aŋ wääktäŋ yaaññä geri Yeecüwa, aŋ minneni ṭeññä aŋ ḍuukkene wäyen.

43 Aŋ iken muure witken ḍiiktin kä teynä Jooŋ yaana yäwaŋ ye.

Aŋ wääna iken muure witken ḍiiktin kä nääŋkä yaaka naŋde ye, i baaddoni yeeke kiinne ogo, 44 "Jiik yeeki yaaka ṭäkkä jääjgede kä yaakki tiiŋe ṭeṭaŋ. Minneni Mänbaan cokulene me müükkïn mäbaan." 45 Aŋ baaddoni jiik yaakka batta agene kä ookin gïtï, a paangin yokïn iken ti nuŋko ŋana ookcete daa gïtï, aŋ iken bojok kä tääccin Ike ti kä jiik yaakka.

46 Aŋ iken jujjin kä riijin pääken ogo ŋaani ken bi yäwoyäw. 47 Aŋ paydinni yeeken ŋïjï Yeecüwa, aŋ ääṭin ñaalok minneni kä ïṇte aŋ yuutte gunne ti. 48 Aŋ kiinne ogo, "M'ana minneni yaanni gïmgene kä yäṇtonḍi ye, i a Ika ken gïmgana. Aŋ m'ana Ika gïmgana ye, gïmmïdï kä M'ana Ika tuujana ye. Aŋ m'ana ḍeeraŋ ikee gïtï muurijaan ye, ike ken yäwaŋ."

49 Aŋ Yuhanna jaajjin ogo, "Men mooye, ikoon miikconon mäŋkalaŋ ñuulcïdï woo meŋkeekeni kä yäṇtonḍü aŋ kiinnon ogo yuuto ïñï, nääŋka ike batta ke ïkïïn ye." 50 Aŋ kiini Yeecüwa ogo, "Ŋana yuutcede ïñï, m'ana nääŋkä yooko naŋde i batta ke ïkïïn ye, a men yoono."

51 Aŋ wääna äŋ jïñe yaana atee kä ñaalok polloŋ jï cokelenee ye, i ñome ṭukke üŋjïdï Oorcalïïm. 52 Aŋ tuccin tüüjgï ñomuk, aŋ attä kaaccä tooyle mä Caamira Ike tutkutu nänṭä. 53 Aŋ tuuji me yok nääŋka ñome ṭukcedeeda Oorcalïïm ye. 54 Aŋ wääna yoorene daa baaddoni yeeke Yaagüüp ke Yuhanna ye, kiini ogo, "Pïṭo, Ïkï ṭäkä maañ ingon käjä ïñï ñaalok polloŋ jï aŋ iken amjänä woo?" 55 Aŋ Yeecüwa ñome ṭukke iken ti aŋ girkene. 56 Aŋ iken attä baanle yaŋkalaŋ ti.

57 Aŋ wääna atene kä päy jï ye, kiini mäŋkalaŋ ogo, "Ïkï bi baaddeni ke nänṭ'a atii kä ye."

58 Aŋ kiini Yeecüwa ogo, "Wiiwkä cääyge kälken, aŋ ḍïïrgä cääyge kurken, aŋ Minneni Mänbaan batta cääyge nänṭä yaana nääkcedee kä wiñe ye."

59 Aŋ mäŋkalaŋ kiini Yeecüwa ogo, "Bäätä Ika ti!"

Aŋ luugi oon ogo, "Pïṭo, dalä por ika atä wäyo jïkä ïñï."

60 Aŋ kiini Yeecüwa ogo, "Dalä mä tüwïn jïkï mä tüwïn yeeken. Aŋ ïkï atä päkä Yätkïtïn yen Jooŋ."

61 Aŋ kiini yaŋkalaŋ ŋuca ogo, "Pïṭo, Ïkï bi baaddeni, aŋ dalä por ika ḍukcu mä paanä nüütkü ogo ika atco."

62 Aŋ kiini Yeecüwa ogo, "M'ana ïṇte ice kooccu ti i däämjïdï ŋäjäk ye, batta päjjïdï Yätkïtïn yen Jooŋ ti."