1 Aŋ wääna Yeecüwa ḍaŋŋee kä nüütkïn me jiik yeeke muure ye, i Ike kaaccä ti Kaparnahuum. 2 Aŋ ḍuuŋgon kääygä yen mä Ruumaan yaŋkalaŋ cääyge kiingon a raac kä yaac a yaana tüw ye, aŋ a m'ana eemde ye. 3 Aŋ wääna tiiŋŋee kä ogo Yeecüwa ye, tuccin ḍuuŋku Yühüüṇṇï yakkalaŋ Ike ti taajjï ogo ääto kiingon yeene ṭeeñje. 4 Aŋ wääna ḍäägene kä ti Yeecüwa ti ye, jujjin kä ñuynu yok Ike kä juuggen muure ogo, "Men yaanni päjjïdï kä yüükkïn ti, 5 ike ṭoŋ yooko bilge, aŋ ikoon bätkonon daaŋmallä yen Yühüüṇṇï." 6 Aŋ Yeecüwa attä ke iken. Aŋ wääna cokulenee ti än ti ye, ḍuuŋgon kääygä mugge yakkalaŋ tucce ogo kïïnjï ogo, "Mügdo, ŋana jonü lüüjï, batta päjjïdï ïkï kääjä äräk baanni. 7 A yaana batta päjjädä kä äätin ïkï ti kä ḍoŋi yaanni. Aŋ ïkï jääyä woo jiik aŋ kiingon yeeni bi ṭeñ. 8 Ika cäänna agä oon ïñï mügdïn ti, ke kääygälen ïñï ika ti, aŋ yaana kiinä ogo, ‘Atä,’ ye, i daa atï, aŋ yaana kiinä ogo, ‘Äätä,’ ye, i daa ätä, aŋ naana kiingon yeeni kiinä ogo, ‘Yaanni naŋä,’ ye, i daa naŋe." 9 Aŋ wääna Yeecüwa tiiŋŋee kä aŋan ye, wiñe ḍiiktin aŋ m'aka Ike baattä ye, kiinne ogo, "Ikee kiine, Ika batta agä käñon mä Icärayiil ti m'ana luggin yeene tälaŋ aŋŋi ye." 10 Aŋ m'aka tuji me ye wääna ḍuukene kä paa ye, i kiingon wäädi a ṭeñon.

11 Aŋ wina Yeecüwa attä baan battä me ogo Naayin ke baaddoni yeeke ke ṭoŋ ḍiirken. 12 Aŋ wääna Yeecüwa ḍakkee ti äntüke baan mooye ti ye, pärjin ke me ḍürït män tüwon, aŋ minneni yaanna a keelok meen ti, aŋ meen a boro. Aŋ ṭoŋ ḍiirken yek baan jïñe ke ike. 13 Aŋ wääna yoorene daa Pïṭo ye, ängene ŋïngïn aŋ iiŋ kiinne ogo, "Ŋana ïkï weegä!"

14 Aŋ Ike wükcïn ti, aŋ piñcil tamme yok. Aŋ m'aka ḍürït ye, yuuttu ïñï. Aŋ Ike jaajjin ogo, "Durñu, ïkï kiineni, juwu ñaalok!" 15 Aŋ män tüwon juwin ñaalok aŋ jääyin woo, aŋ ḍuukki Yeecüwa meen.

16 Aŋ iken muure mügï yokïn liin, aŋ iken jaajjin i mäŋï Jooŋ ogo, "Bäṭo yen Jooŋ yaŋkalaŋ yaana yäwaŋ ye, üükïn woo waadgo ti." Aŋ "Jooŋ äätin yüükkïdï ti mä yeeke!" 17 Aŋ jiik Yeecüwa piirjin woo Yühüdïya jï muure ke bänkä yaaka yiirene kä ye.

18 Aŋ Yaaya baaddoni yeeke ike nüütkï waak muure. Aŋ ike bääṭin ti baaddoni yeeke kä yewwe, 19 aŋ tucce Pïṭo ti ogo taajjï ogo, "Ïkï agä Macii yaana äätïdï ye, halla ikoon kiijjon mäŋkalaŋ ŋuca?"

20 Aŋ m'aka kä yewwe yaakka äätin Yeecüwa ti aŋ kiini ogo, "Ikoon tuujonon kä Büüṭo Yaaya ogo Ïkï taajjïda me ogo, ‘Ïkï agä Macii yaana äätïdï ye, halla ikoon kiijjon mäŋkalaŋ ŋuca?’"

21 Aŋ äŋ jïñe yaanja ti Yeecüwa ṭiiññä m'aka yoken caraŋ ke rackä ke m'aka cääygene wääktäŋŋi yaackä ye kä ḍiräk, aŋ uykuni ḍiirken päṇṇe waŋgin. 22 Aŋ baaddoni luuŋŋe ogo, "Ate aŋ Yaaya nüütke kä waak'a yoorre aŋ tiiŋŋe ye, uykuni yuṭṭu aŋ puudgu jujjin woo, aŋ mä jaan lattä woo aŋ miŋkäni tiiŋŋä, aŋ mä tüwïn juwin ñaalok tüwnü ti, aŋ aangï päkki me Jiik Ŋerkä. 23 Aŋ ñaaynä m'ana batta ḍükcïdï ŋäjäk ogo Ika ye." 24 Aŋ wääna baaddoni yek Yaaya kaaccene kä woo ye, Yeecüwa uccin kä päkkin ṭoŋ jiik ogo Yaaya aŋ kiiṇde ogo, "Wääna atte kä woo teettälaŋ Yaaya ti ye a ŋaaka ken ṭäkke yoodde? A biiruŋ yaaka boku jommu ye? 25 Aŋ a ŋaaka ken umgede woo yoodde? A oon yaana eŋit buruŋgu carkä ye? U'u! M'aka eŋit buruŋgu carkä ye a äärgä ti ba' yätkäni. 26 Aŋ a ŋaaka ken umgede woo yoodde? A bäṭo? Ee, ikee kiine, ike kääṭï kä bäṭo. 27 A ike inni yaana jaaynene Meeŋka Jiik Jooŋ ye ogo,

‘Ika bi tuccu tuujgon yeeni ñomü ti,

yaana bi tütï päy yüünü ñomü ti ye.’

28 "Ikee kiine, waadgä m'aka a giitin kä määngä ye ti baati m'ana Büüṭo Yaaya bore kä yäwnä ye. A m'ana ḍeeraŋ Yätkïtïn Jooŋ ye ti, ken Yaaya bore kä yäwnä."

29 Aŋ me muure ke ḍüṭoni yaacken wääna tiiŋŋene jiik Yeecüwa ye, iken gïmmïn ogo päy Jooŋ ŋeroŋer. Nääŋka büülene daa kä Yaaya ye. 30 Aŋ Pïrrïcïïnnï ke nüütoni yek jiik ḍoocin yek Jooŋ yaakkä kä ṭäktäŋ Jooŋ nääŋka iken batta agene kä büülgïn kä Yaaya ye. 31 Aŋ Yeecüwa jaajjin ogo, "Merkä kil yaanni bi iirjä ke ŋaaka? Iken belok bata ŋaaka bi? 32 Belok bata merkälen yaaka cäyok nänṭä ba' weel, aŋ bäärjïdï meken ti ye ogo, ‘Ikee kütkene me ṭüürüül aŋ ikee batta age ŋeelin. Aŋ ikee uulgene me uullu nüüjdüŋ aŋ ikee batta age nüüjïn.’ 33 Büüṭo Yaaya äätin batta ämï bïggï aŋ batta mätï määk, aŋ ikee jaaye ogo, ‘Cääygïïda ko meŋkeeke!’ 34 Aŋ Minneni Mänbaan äätin ämï aŋ mätï, aŋ ikee jaaye ogo, ‘Amtük ko yaac, aŋ ogo maaddomääk, aŋ ogo muukon ḍüṭoni yaacken ke mä yaackä.’ 35 Aŋ ŋäjjin yaana a jïñe ye, ŋïctä me kä cäwdä merkä yeeke muure."

36 Aŋ Yeecüwa bärki Pïrrïïcï yaŋkalaŋ baanne ogo iken ämo amma, aŋ kaaccä äräk ba' Pïrrïïcï aŋ cääjjin nänṭä ammä amma. 37 Aŋ baan yaanja ti, iiŋ yaŋkalaŋ bilti nääŋä nääŋkä yaackä, aŋ tiiŋŋä ogo Yeecüwa bilto ti ämo ba' Pïrrïïcï, aŋ ike äätin ädit kuulkul pïtïna yaana kiygä me kä car ye. 38 Aŋ iiŋ yuuttu kïïge ti kä ŋäjäk i week, aŋ ḍeeme kïïgïn kä ïwok, aŋ ḍüülle kïïgïn kä jiike, i muje kïïgïn aŋ tükkene pïtïna.

39 Aŋ wääna nääŋkä yaakka yoorene daa Pïrrïïcï yaana ike bärki amma ti ye, ḍoŋe kiinne ogo, "Naana men yaanni a bäṭo ye, iiŋ yaana ike taptä yok yaanna yoku ŋäjjene, ke cäwdä yaana cääyee kä ye. Ike a iiŋ yaajgonḍe!"

40 Aŋ luugi Yeecüwa ogo, "Camaan, Ika cääyga jiik ṭäkä kiinenii."

Aŋ Camaan jaajjin ogo, "Nüüto, kiinja."

41 Aŋ Yeecüwa jaajjin ogo, "Mäŋkalaŋ ook kä yewwe näge kä mïïngä. Ṭäkï yaŋkalaŋ ti tiil 500. Aŋ yaŋkalaŋ ti caykä kä duuc. 42 Aŋ m'aka kä yewwe yaakka mïïngä yeeken batta lïïltä kä wannä, aŋ kulkeneeda kä. Aŋ a yaana wali ye, ken ike bilgänä kä yaac?"

43 Aŋ luugi Camaan ogo, "Ika jaayä ogo m'ana kulkenee mïïngä yeeke ḍiiro yaanna."

Aŋ kiini Yeecüwa ogo, "Jiik yüükü yaakka a gïtken." 44 Aŋ däämjin iiŋ ti, aŋ Camaan kiinne ogo, "Iiŋ yaanni yooddu? Wääna kääjänä än yüünü jï ye, ika batta agja kä iñgon piik yaaka lämä kïïgï ye, aŋ ike kïïgï lookke woo kä ïwok waŋge aŋ ḍüüljene woo kä jiike. 45 Ika batta agja kä muckïnï gimgin bata ŋïïbbïn yoono, aŋ iiŋ yaanni wääna daa kääjänä ti äräk ye, ike batta a yuuton ïñï kä muññu kïïgï. 46 Ika batta agja kä cückïnï witkin ñownä, aŋ ike Ika tükkana kïïgïn pïtïna.

47 "Ïkï kiineni, nääŋkä yaacken yeeke yaaka ḍiräk yaakka a külkïnï, ike billin kä yaac. Aŋ m'ana a külkïnï kä ḍeeraŋ ye, i billä kä ḍeeraŋ." 48 Aŋ iiŋ kiinne ogo, "Nääŋkä yüükü yaacken yaakka a külkïnï."

49 Aŋ m'aka ämene kä nänṭä keellä ke ike ye, jujjin kä tääjin pääken ogo, "Ike a ŋaani ina ken külkïdï nääŋkä yaackä yaanna?"

50 Aŋ Yeecüwa iiŋ kiinne ogo, "Luggin yüünü ïkï määgeney woo, atä kä ŋïïbbïn."