1 Aŋ Yeecüwa kaaccä ti baan mooye yen mä Ariya aŋ kaajit a kaajon. 2 Aŋ wïca oon yaŋkalaŋ battä me ogo Jakka. Ike a wiñ yen ḍüṭoni yaacken aŋ a ceeggon. 3 Aŋ ike püccïdï ogo Yeecüwa yoorje, aŋ kä ṭoŋ ḍiirinenen batta lïïṭït kä yaana agee kä leel ye. 4 Aŋ ike lüüṇṇü ñomuk aŋ aajjin ñaalok ŋoommu wic ogo yoorje kä yaana Yeecüwa kaajdee kä päy yaanja ti ye. 5 Aŋ wääna Yeecüwa äätenee kä nänṭä yaanja ti ye, däämjin ñaalok aŋ Jakka kiinne ogo, "Jakka, kääjä ïñï kä bïraŋ, Ika äätädä cääyä paa baannü tiññaŋ."

6 Aŋ ike kääjin ïñï kä bïraŋ aŋ Yeecüwa müŋŋe kä jon ñamme. 7 Aŋ wääna yoorene daa ṭoŋ ye, i iken muure ŋürïmïn ogo, "Ike attä wäätcïdï a willä yen oon yaaññä."

8 Aŋ Jakka yuuttu ñaalok aŋ Pïṭo kiinne ogo, "Tiiŋä, Pïṭo, wakkä ïṇtï baŋen bi iñä aangï. Aŋ naana ika mäŋkalaŋ piiŋŋä kä ginkalaŋ ti ye i ḍuukku daa ääŋke kä ŋan."

9 Aŋ ike kiini Yeecüwa ogo, "Tiññaŋ mäkkin äätin än yaanni ti, aŋ ike cäänna a minneni yen Abrayiim. 10 Minneni Mänbaan äätin määjï aŋ mäkï m'aka a yääyin ye."

11 Aŋ wääna iken tiiŋŋene waak'a jaayi Yeecüwa ye, ike cumjin kä pääjgin iken gäärrä kä yaana cokulee cokal Oorcalïïm ye, aŋ iken ḍüücï ogo Yätkïtïn yen Jooŋ bi üüko woo ko bïraŋ. 12 Aŋ Ike jaajjin ogo, "Oon yaŋkalaŋ yaana tïïlcïdï kä yaac ye, attä baan yaŋkalaŋ ti kä utar ogo kujo yätkïtïn aŋ wäättan ḍuuko. 13 Aŋ kiinkä yaaka kä caay ye, bärkene aŋ yaŋkalaŋ daa iken ti iññe tiilñan kä keelok, aŋ kiinne ogo, ‘Ñuugele kä ke ḍuuku kä.’ 14 Aŋ mä yeeke ike pütkünü jok, aŋ tuccin tüüjgï ŋäñe ti atï jayok ogo, ‘Ikoon batta ṭäkon oon yaanna mügït ikoon ke on.’

15 "Aŋ wääna ike wäätte kä agee kä yätkä ye, ike ḍuukin aŋ iinjin ogo kiinkä yaaka iññee tiilgä gälkä ye, bärkïï dako me ti, ŋäjjee ko ogo ŋaaka ken kaññïï ñuugala yeenen ti. 16 Aŋ yen ïïjjïnï ti äätin aŋ jaajjin ogo, ‘Men mooye, tiilgä gälkä yüükü käñgänä ti tiilgä gälkä kä caay.’

17 "Aŋ kiinne ogo, ‘Ŋeraŋ, ïkï agä kiingon ŋerconḍe. Aŋ ïkï agä lüggïnï ḍeerconḍe ti, aŋ aŋan ïkï bi wäätci agä mügdo yen bänkä mäyken kä caay.’

18 "Aŋ yaana bäätcïdï ye äätin aŋ jaajjin ogo, ‘Men mooye, tiilgä gälkä yüükü ŋuckunu ti tiilgä gälkä kä duuc.’

19 "Aŋ ike cäänna kiini ogo, ‘Ïkï bi wäätci agä mügdo yen bänkä mäyken kä duuc.’

20 "Aŋ ḍäken äätin aŋ jaajjin ogo, ‘Men mooye, tiilñan gällä yüünü inni tïïññä a tooton yok kä burŋu pïïle, 21 kä yaana booññu kä ïkï ye, ïkï agä oon teyconḍe, ïkï kujdu waak'a batta agii kä ḍoocin kä ïkï ye, aŋ ïkï eṭä waak'a batta agii kä pïïtïn kä ïkï ye.’

22 "Aŋ kiinne ogo, ‘Ïkï kiingon yaajgonḍe, ïkï bi joojeni kä jiik lemmü. Ika ŋäjjaa agä oon teyconḍe, ika kujdu waak'a batta agä doocin ye, aŋ ika eṭä waak'a batta agä pïïtïn ye! 23 Tiilñan gällä yeeni batta ḍooccudu kun tiil jï ina? Yoku ika käññä ginkalaŋ witken ti kä ḍeewaŋ, wääna ḍuuku kä ye.’

24 "Aŋ ike jaajjin m'aka yudok ye ti ogo, ‘Tiilñan gällä koowe ike ti, aŋ iñe m'ana cääygene tiilgä gälkä kä caay ye.’

25 "Aŋ ike kiini ogo, ‘Men mooye, ike cääygene tiilgä gälkä kä caay!’

26 "‘Ikee kiine, m'ana cääyge ye, bi iñgä me ḍiirken, aŋ bi cääygene kä ḍiräk, aŋ m'ana batta cääyge ye, yaaka bilti ike ti kä ḍeewaŋ ye, bi koojjunu me woo ike ti. 27 Aŋ ädäŋŋi yeeki yaaka batta ṭäkï ogo ika agjo yätkä yeenen ye, äbe winni aŋ iire pugin ñomi ti.’"

28 Aŋ wääna Yeecüwa jaaynee kä waak yaakka ye, Ike attä ñomuk ñaalok Oorcalïïm. 29 Aŋ wääna Ike äätenee kä cokal Beetpaac ke Betani pääm yaana wiñe a jengä jeytüünni ye, tuccin baaddoni yeeke kä yewwe. 30 Aŋ iken kiinne ogo, "Ate tooyle yaana ñomgic ti yaanna, aŋ wääna kaace kä ti ye, ikee bi käñe tüürüŋle a weengon yaana batta a taapon kä mäŋkalaŋ ye, gütke aŋ icka kä winni. 31 Aŋ naana ikee taajene mäŋkalaŋ ogo, ‘Gütkedee ina ye?’ I kiine ogo, ‘Ṭäkkänä Mügdo.’"

32 Aŋ tüüjgï kä yew attä aŋ kañi bata yaana kiinneeda kä ye. 33 Aŋ wääna iken tüürüŋle gütkete daa kä ye, i iken kiini mä tüürüŋle ogo, "Tüürüŋle güde ina?"

34 Aŋ iken jaajjin ogo, "Ṭäkkänä kä Mügdo." 35 Aŋ icki Yeecüwa aŋ buruŋgu yeeken peti tüürüŋle ŋäc aŋ tääpcene Yeecüwa.

36 Aŋ wääna Ike atee kä ye i iken buruŋgu yeeken peti ïñï päy jï. 37 Aŋ wääna cokulenee ti päy yaana kääjïdï ïñï pääm yaana wiñe a jengä jeytüünni ye ti, i ṭoŋ ḍiirken yaaka a baaddoni yeeke ye, jujjin kä juuggen ñammen, aŋ mäŋï Jooŋ kä yääw mooye kä wakkä muure yek yäwkä yaaka yoori ye.

38 Jayok ogo,

"Ŋüülkïn yätkä yaana äätä kä yäṇtäŋ yen Pïṭo ye ti!

Ŋïïbbïn polloŋ jï aŋ gällä ñaalok küüṭṭülaŋ!"

39 Aŋ Pïrrïcïïnnï yakkalaŋ ṭoŋ gïtï Ike kiintä ogo, "Nüüto, baaddoni yüükü gerä!"

40 Aŋ Ike luukcin ogo, "Ikee kiine, naana iken tiiŋjin ïñï ye, i guygu bi yaajjï!"

41 Aŋ wääna Ike cokulenee ti Oorcalïïm aŋ yooṭṭeeda kä ye, Ike weekcin ogo ike, 42 aŋ jaajjin ogo, "Tiññaŋ yoku ŋäjjä a ŋaaka ken bi äcä ŋïïbbïn ïkï ti! Aŋ tiññaŋ a paangon yok ïkï ti. 43 Aŋ nïïnkä bi ätä ïkï ti, yaana ädäŋŋi yüükü ïkï tïñgï yok aŋ ïkï küürïnï ti ye, aŋ ïkï mïtï yokïn täŋkä muure. 44 Aŋ ïkï ḍüümgï gïtï, ke merkälen yaaka külok ïkï ti ye. Aŋ batta bi mäñjï pääm yaŋkalaŋ menen wic ïkï ti, kä yaana batta ŋäjjii kä wuuŋ Jooŋ yaana äätedee mäkee kä ïkï ye."

45 Aŋ Yeecüwa kaaccä ti kaal yen änlaṇṇä jï aŋ juwin kä ñoolcin woo yääjoni. 46 Aŋ kiinne ogo, "A pergon Meeŋka Jiik Jooŋ jï jaay ogo, ‘Än yeeni bi wäätï a än yen mallä,’ aŋ ikee ti yelle yokïn aŋŋa ṭuum yen käṭoni."

47 Aŋ nïïnkä muure Yeecüwa nüütï kaal yen änlaṇṇä jï. Aŋ ḍuuŋku däŋkä ke nüütoni jiik ḍoocin ke woydoni yek mäbaan ṭäkkänä ogo nägjï ḍok. 48 Aŋ iken batta käñit päy yaana naŋge daa kä ye, kä yaana mäbaan muure tiŋdene kä jiik yeeke ṭeṭaŋ yaaka jaaye ye.