1 Aŋ ääŋkalaŋ Yeecüwa mäṭï nänṭä kalaŋ ti. Aŋ wääna ḍaŋŋee kä ye, kiini baaddo yaŋkalaŋ ogo, "Pïṭo, nüüdjon kä mallä, bata yaana Yaaya baaddoni yeeke nüüṇṇeeda kä ye." 2 Aŋ kiini Yeecüwa ogo, "Naana ikee mäṭe ye, jaaye ogo,

‘Wäyo, dalä yäṇtonḍü wäätï a laṇṇä

aŋ Yätkïtïn yüünü dalä ḍägä.

3 Iñjon bïggï yooko yek äŋ yaanni jïñe.

4 Aŋ kulkoon ḍuuggin nääŋkä yaackä yooko,

bata yaana daa kulkodon kä m'aka ikoon näŋkoton nääŋkä yaackä ye.

Ŋana ikoon üüŋjodoon puuccinni gïtï.’"

5 Aŋ iken kiini ogo, "A ŋaani ken cääygene muukonḍe, aŋ yoku umge kä wïïrïn kule gïtï aŋ kiine ogo, ‘Muukonḍi, iñja bïggï kä ḍäk a mïïngä ḍoŋi ti, 6 muukonḍi yaŋkalaŋ ätä kä utar aŋ ika batta cääyga ginäämkä, yaana iñä daa kä ye.’ 7 Aŋ luugi muukonḍe kä äräŋŋä ogo, ‘Ŋana ika lilgaa gitkin, äntüke a üüljïnï, aŋ ikoon agon nïïnjïdïnï ïñï ke merkä yeeki, aŋ ika batta bi lïïṭä juwin ñaalok ïkï iñeni ginkalaŋ.’ 8 Aŋ ikee kiine, naana ike batta juwïdï ñaalok iñde ogo muukonḍe ye, ike bi juwu ñaalok aŋ iñe waak'a ṭäkke ye muure nääŋka iiñjedee ñujee kä ye.

9 "Aŋ ikee kiine, tääce, aŋ ikee bi iñge me. Määje, aŋ ikee bi käñe. Ṭume aŋ äntüke bi kupkene kä me. 10 Aŋ m'ana tääcï ye, bi iñgä me. Aŋ m'ana määjï ye, bi käñï. Aŋ m'ana ṭümï ye äntüke bi kupkene daa me.

11 "Aŋ ikee wäygä, m'ana minneni yeene ñujjin ike ti ogo ike ïñjï yakcan ye, yoku iñe kaaŋ? 12 Halla naana ike ñujjï ogo kümmü ye, yoku iñe jïïn? 13 Aŋ ikee mä yaackä äccin wakkä ŋerkä merkä yeekic ti ŋäjje, aŋ Wääc yaana ñaalok polloŋ jï ye, bi äccïdï ogoo büṭa Wääktäŋ Laṇṇä yen Jooŋ m'aka tääccï Ike ti ye!"

14 Aŋ Yeecüwa ñüülcïdï woo meŋkeeke m'ana batta jaay ye ti. Aŋ wääna meŋkeeke kääjenee kä woo ye, men jääyin woo, aŋ ṭoŋ witken ḍiiktin. 15 Aŋ yakkalaŋ jayok ogo, "Ike meŋkeekeni ñoolcede woo kä mügdo yen meŋkeekeni, yaana battä me ogo Baljabüül ina." 16 Aŋ kiini yakkalaŋ ogo iken nüütkïï woo gin yäwnä polloŋ jï, i puuccutu a püüccïdïnï.

17 Aŋ nääŋkä yaaka juuggen ti ye, ŋïcï ti Yeecüwa, aŋ kiinne ogo, "Yätkïtïn yaana ḍoŋe ŋüüle gïtï ye i bi yaac aŋ än yaana ḍoŋe ŋüüle gïtï ye i bi ḍimmä. 18 Aŋ naana Wiñ yen Meŋkeekeni ḍoŋe ŋüüle gïtï ye, i yätkïtïn yeene bi yüütï ogoo? Aŋ Ika kiinda ogo meŋkeekeni ñooljo ko Baljabüül. 19 Aŋ naana ika ñuulcudu woo meŋkeekeni kä teynä Baljabüül a gïtken ye, i aŋan baaddoni yeekic ñüülcïdï woo meŋkeekeni kä ŋaani? Aŋ aŋan iken bi wäätï a gütoni yeekic. 20 Aŋ naana a teynä Jooŋ ken ñuuṭu kä meŋkeekeni ye, i aŋan Yätkïtïn Jooŋ äätin ikee ti. 21 Aŋ oon yaana teyaŋ aŋ yore agee yïïcon ye, aŋ än yeene tïïje ye, i wakkä yeeke bi cäyok ṭeṭaŋ. 22 Aŋ naana irkänä m'ana teyaŋ kä ike aŋ ike yoji ye, i äre yokïn kä kaykä yeeke yaaka ḍucee kä jone ye, aŋ waak yaaka peeññe yaakka pääge gïtï.

23 "M'ana batta ke Ika ye, i a ädäŋ yeeni, aŋ m'ana batta ḍüṭon ye, i piirä gïtï.

24 "Aŋ naana wääktäŋ yaaññä kääjin woo men ti ye, atï woo teettälaŋ määjï yïïktäŋ. Aŋ naana batta a käñon ye, i jaajjï ogo, ‘Ika ḍukcu än yeeni yaana äätä kä ina ti.’ 25 Aŋ naana ḍuku ye, i än miike a weecon jï aŋ a tooton. 26 I atï aŋ äcä wääktäŋŋi yaackä meken kä ŋaṭükel yaaka kääṭï kä yiñ kä ike ye, aŋ iken kaacï aŋ cäyok wïca. Aŋ düüñïn cäwdä yeene üüttït kä yiñ kä cäwdä mä ïïjjïn tinä."

27 Aŋ wääna Yeecüwa jaayee kä ogo waak yaakki ye, iiŋ yaŋkalaŋ yääwin ṭeejjük ṭoŋ gïtï ogo, "Ŋüülkïn atï iiŋ yaana Ïkï giiṇṇey aŋ Ïkï neeṇṇey ye ti." 28 Aŋ Yeecüwa ṭääkcin ike kiini ogo, "Ŋüülkïn atï m'ana tiŋit jiik Jooŋ aŋ ñuugulee kä ye ti."

29 Aŋ wääna ṭoŋ ḍiirene kä ye, Yeecüwa jaajjin ogo, "Kil yaanni a kil yaajgonḍe. Iken ñüjï ogo iken nüütkïï me gin'a nüüto ye, aŋ baati gin'a bi iñge daa me ye, a gin'a nüütï a yen Yünaan ye, ken bi iñge daa me. 30 Aŋ bata wääna gin'a nüütï ye näŋŋee ḍoŋe Yünaan ti mä Nïnawa ti ina, aŋ daa Minneni Mänbaan bi wäätï a gin'a nüütï ye kil yaanni ti. 31 Yätkä iiŋe yen mä ïñïnä bi juwu ñaalok nïïnnä jooññu ti, aŋ ook kil yaanni bi jooje, nääŋka ike äätee kä ŋommañ ŋoy tiŋdee kä ŋäjjin yen Cïlïmaan ye, aŋ mäŋkalaŋ bilti winni tiññaŋ yäwaŋ kä Cïlïmaan. 32 Aŋ mä Nïnawa bi juwu ñaalok nïïnnä jooññu ti ke kil yaanni aŋ bi joocu, nääŋka iken ḍaŋŋene kä nääŋkä yaackä yeeken kä paŋŋä yen Yünaan ye. Aŋ mäŋkalaŋ bilti winni tiññaŋ yäwaŋ kä Yünaan."

33 "Baati m'ana diko paaŋe aŋ paane yok ginkalaŋ jï ye, halla ḍooce arwal jï ye, ike ṭääkcï diko ḍooce nänṭä yaana yuddee kä ye, yuṭene m'aka kaaccïdï äräk ye.

34 "Waŋü ken a diko yen yorü. Aŋ naana waŋü cääy ṭeṭaŋ ye, yorü muure dïkï. Aŋ naana waŋü yaajaŋ ye, i yorü muure a mïïllä. 35 Waŋü tïïccï, nuŋko ŋana diktäŋ yaana yorü ti yaanna wäätcedee a mïïllä. 36 Aŋ naana yorü muure dïkï, aŋ batta cääyge kä taaŋŋe yaana a mïïllä ye, bi dïkcï woo bata yaana dikene diko yaana a paaŋjïnï woo ïkï ti ye."

37 Aŋ wääna Yeecüwa jaaynee kä ye, bari män Pïrrïcïïnnï yaŋkalaŋ ogo ääto ämjï ko amma. Aŋ kaaccä äräk aŋ cääjjin ïñï ammä ti. 38 Aŋ Pïrrïïcï Yeecüwa tïïññe yok aŋ yoorre batta ïṇte lookcede woo i amma batta mor äbänä me, aŋ wiñe ḍiiktin. 39 Aŋ kiini Pïṭo ogo, "Ikee Pïrrïcïïnnï ḍuygu ke kuḍulgu looge ŋätken ti, aŋ ikee gïtkïc a küümïn kä jon tälle ke yiñ. 40 Ikee amgï, batta a m'ana näŋŋä üṇtük ye ken näŋŋä külok cäänna? 41 Aangï iñde waak'a muure bilti ikee ti ye, nuŋko waak muure bi latene kä woo ikee ti.

42 "Aŋ jooññu ikee ti Pïrrïcïïnnï! Nääŋka Jooŋ iñde daa kä äccin caycayni kuucakuuññi ke gura ke wakkä pïïtïn muure, aŋ woṇṇu ke biilin yen Jooŋ gääle. Aŋ päjjïdï yoku yaakka naŋdene aŋ yaŋkalaŋ ŋana yoku gäälle gïtï.

43 "Jooññu ikee ti Pïrrïcïïnnï, nääŋka bille kä nänkä ba' eemdin däŋkämalläni yek Yühüüṇṇï ti, aŋ ŋïïbdïn me weeldüŋŋi ti ye. 44 Jooññu ikee ti, ikee beele bata kälkä me witken, yaaka batta a ḍückïnï gin'a nüütï ye, aŋ laayge kä me witin i batta ŋäjjänä me ye."

45 Aŋ luugi nüüto yen jiik ḍoocin yek Jooŋ yaŋkalaŋ ogo, "Nüüto, kä jiik yüükü yaakka ikoon kircodoon ti cäänna!"

46 Aŋ luugi Yeecüwa ogo, "Jooññu ikee ti, nüütoni yek jiik ḍoocin yek Jooŋ, kä yaana me iñde daa ḍuugin pekdaŋŋi yaaka batta lïïltä kä ḍürdin ye, aŋ ikee kä ḍuuggic ïnkïc ṭulgen kä kiṭuk batta tapcede ti, yaana yoku yüükkede daa ti ye. 47 Jooññu ikee ti, ikee yaaka ŋeerde yokïn kälkä witken yek bäṭoni ye, aŋ iken a m'aka nägi ḍuugin dänkäyurgic ye. 48 Aŋ naana aŋŋi ye, ikee age mä yuṭin yek dänkäyurgic aŋ ikee gïmmene kä nääŋkä yeeken, iken bäṭoni nägi ḍuugin, aŋ kälkä witken ŋeerdi yokïn. 49 Aŋ aŋŋi ŋäjjin Jooŋ jääyïdï ogo, ‘Iken bi tucku bäṭoni, ke tüüjgï, aŋ yakkalaŋ näkä ḍuugin aŋ yakkalaŋ bi pütkünü gïtï.’

50 "Aŋ ina ken kil yaanni bi tacte daa me kä yïmgä bäṭoni yaaka nägi ḍuugin kä ïïjjïn ti naŋŋä ŋommañ ti ye, 51 kä yïmgä Abïïl ti ke yek Jakarïya, yaana nägi me ḍok waan yen tambal ke än Jooŋ ti ye. Ee, ikee kiine, kil yaanni bi jooju kä yïmgä mä yaakca muure.

52 "Jooññu ikee ti, ikee nüütoni yek jiik ḍoocin yek Jooŋ! Nääŋka kupo yen ŋäjjin koojjene daa woo ye, aŋ ikee kä ḍuuggic batta age kaacin, aŋ m'aka ṭäkï kaaccin ye, batta age kä äkkïdïnï kaacï."

53 Aŋ wääna Yeecüwa wïca mañjedeeda ïñï ye, Pïrrïcïïnnï ke nüütoni jiik ḍoocin yek Jooŋ jujjin kä kiindin Ike kä yiñ i tactä kä wakkä ḍiirken. 54 Aŋ keeygä yoku ogo jääyo woo jiikkalaŋ aŋ mügjï.