1 Aŋ woydoni muure juwin aŋ Yeecüwa iji Biilaatuc ti. 2 Aŋ jujjin kä käkkin wic Ike jayok ogo, "Men yaanni kaññon ṭoŋ woyde kärgit, aŋ ikoon ṭïïgon kä iccin ḍüllü Kaycar ti, aŋ jaay ogo, Ike ko ḍoŋe agje Macii, Yätkä."

3 Aŋ Biilaatuc Ike taaji ogo, "Ïkï agä Yätkä yen Yühüüṇṇï?"

Aŋ luugi Yeecüwa ogo, "Ïkï jaajjini."

4 Aŋ Biilaatuc jaajjin ḍuuŋku däŋkä ke ṭoŋ ti ogo, "Ika batta agä käñon yiñ oon yaanni ti."

5 Aŋ iken tïñï jayok ogo, "Mäbaan cüŋŋe witin baan mä Yühüdïya jï muure kä nüüṇṇü yeene, ïïjjïn ti kä Jalïïl aŋ cäänna ke winni."

6 Aŋ wääna Biilaatuc tiiŋŋee aŋŋi ye i tääccin ogo naana oon yaanna ogo män Jalïïl ye. 7 Aŋ wääna ike ukcenee gïtï ogo Yeecüwa üüŋo baan yaana mügdïï ko Ïïrüüdüc ye, i tuckene Ïïrüüdüc yaana cääy Oorcalïïm waan yaanja ti ye.

8 Aŋ wääna Ïïrüüdüc yuṭṭee Yeecüwa ye ike jone ñappä kä yaac kä yaana ṭäkee kä on ogo yoku yoorje ye. Aŋ tiŋdee kä ogo Ike ye, aŋ ike näkä guy ogo yoku ike yurce Yeecüwa näŋo gin yäwnä. 9 Aŋ tajdene kä tääctäŋŋi ḍiirken, aŋ Ike batta a lüükcïnï. 10 Aŋ ḍuuŋku däŋkä ke nüütoni jiik ḍoocin yudok Ike käkkätä wic kä car kuckon. 11 Aŋ Ïïrüüdüc ke kääygä yeeke Ike boongu jok aŋ ñiyene yok aŋ iiŋki yokïn burŋu beel bata yen yätkä, aŋ tuci ŋäjäk Biilaatuc ti. 12 Aŋ Ïïrüüdüc ke Biilaatuc aŋŋa mugin waadgen ti nïïnnä yaanja ti i ñomuk por iken puudu gïtï waadgen ti.

13 Aŋ Biilaatuc ḍuuŋku däŋkä bärkene ke woydoni nänṭä keellä ke mäbaan, 14 aŋ kiinne ogo, "Ikee oon yaanni ickana kä bata m'ana ñomuk ṭoŋ woyde kärgit ina. Aŋ wääna Ike tajdänä daa kä ñomgic ti ye, ika batta agä käñon yiñ Ike ti yaana käkkene daa kä wic ye. 15 Aŋ cäänna Ïïrüüdüc batta a käñon ginkalaŋ aŋ ḍüükkïnïn tückïnïn kä. Bata yaana yoodde daa kä ye, baati gin'a agee kä naŋgon päjjïdï tüwee kä ye. 16 Winni Ike bi ḍooyu aŋ äkkä."

17 Aŋ yoku päjjïdï Biilaatuc ti, iken äkkänä woo män gaŋgar jï kä keelok poñ ti.

18 Iken muure yaajjin nänṭä keellä ogo, "Näge ḍok aŋ Barabaac ken äkkoon kä." 19 Aŋ oon yaana ogo Barabaac yaanna yeepi me gaŋgar jï kä biirrä me baan mooye jï, ke näŋŋä men. 20 Aŋ Biilaatuc ṭäkï ogo Yeecüwa ken äkkee me, aŋ ṭoŋ ŋocce jääjgene. 21 Aŋ iken ike luuki kä yääw ogo, "Näge ḍok kä ṭellä kaakkon jok! Näge ḍok kä ṭellä kaakkon jok!"

22 Aŋ iken kiinne ääŋke wäätcete kä ḍäk ogo, "Ina, a yiñ yaana wali ye ken naŋŋe? Ika batta agä käñon yiñ yaana päjjïdï tüwee kä ye. Aŋan Ike bi ḍooyu aŋ äkkä."

23 Aŋ iken tïñï kä ñuynu yeenen, aŋ yawok kä yääw küülconḍe ogo Yeecüwa bääkkan daa ṭeljïï me ti aŋ yääw yeenen woottu woo. 24 Aŋ Biilaatuc gïmmïn kä ñuynu yeeken. 25 Aŋ ike oon yaana yeepi me gaŋgar kä biirrä me ke näŋŋä men ye, äkkeneeda kä woo a yaana ñuygu ye, aŋ Yeecüwa müükkeneeda kä ṭäktäŋ yeenen.

26 Aŋ bata yaana daa iken Yeecüwa ijene daa woo ye, Camaan yen mä Giiräwaan yaana ätä woo tooy yaŋkalaŋ jï ye, mügï kääygä aŋ iñi kaakkon ogo ijje baatce Yeecüwa ŋäc. 27 Aŋ wïca ṭoŋ ḍiirken yek mäbaan cüülü ke määngä Ike baattä ŋäc, yaaka wegok aŋ nüüjï ogo Ike ye. 28 Aŋ iken ṭukki Yeecüwa ñome aŋ kiinne ogo, "Ṭulgu yek Oorcalïïm, ŋana ikee weege ogo Ika, weege kä ḍuuggic ke merkä yeekic. 29 Nïïnkä äätïdï yaaka bi jaayge kä me ogo, ‘Ŋüülkïn burŋuni ti ke kurku yaaka batta gidok merkä ye, ke tingä yaaka batta nïïtï ye.’ 30 Aŋ wäättan iken bi juwu kä jiik pämkä kiiṇtä ogo, ‘Ḍimgoon witin!’ Aŋ tüümoni ogo, ‘Kümjon witin!’ 31 Aŋ naana iken waak yaakki naŋtä aŋŋi a jaan garrä ti ye, i bi yaajaŋ kä yaac jaan ïwnä ti."

32 Aŋ muddoŋŋi yakkalaŋŋi kä yewwe koowi me ke Yeecüwa icä näkä ḍuugin. 33 Aŋ wääna ḍakkene ti nänṭ'a battä me ogo äwnäwiñ ye ti, ṭelji ti kaakkon jok wïca, iken ke muddoŋŋi yaŋkalaŋ kä buŋ birrä, aŋ yaŋkalaŋ kä buŋ aam.

34 Aŋ Yeecüwa jaajjin ogo, "Wäyo, kulku, nääŋkä yaaka naŋtä yaakka kucu." Aŋ buruŋgu näŋgi jaan aŋ päägi gïtï.

35 Aŋ ṭoŋ yuuttu woo wïca daamcätä, aŋ woydoni yeeken jayok kä ñääy ogo, "Mäkkalaŋ määgene woo, aŋ dale ḍoŋe määge woo to naana Ike a Macii, yaana a wäägïnï woo kä Jooŋ ye!"

36 Aŋ cäänna ñääyge yok kääygä, aŋ wükkütü ti i iñtä määk peñkä. 37 Aŋ kiiṇtä ogo, "Naana Ïkï agä Yätkä yen Yühüüṇṇï ye, i ḍoŋü määgä woo!"

38 Aŋ a pergon ñaalok wiñe ti jaay ogo, "A Yätkä yen Yühüüṇṇï inni!"

39 Aŋ muddoŋŋi yaaka ŋaabit ñaalok kaakkonni jugin ye, yaŋkalaŋ Ike kirgä ogo, "Ïkï agä Macii hatta? Ḍoŋü mäkkä aŋ ikoon määgoon woo cäänna!"

40 Aŋ geri muddok menen ogo, "Ïkï batta booju kä Jooŋ? I ina ïkï käññi jooññu keellä bata Ike yaanna. 41 Ïkïï jooññu yoono wodaŋ, ïkïï joocï me kä nääŋkä yooko yaaka naŋŋï ye, aŋ Ike batta a näŋon gin'a yaajaŋ ye."

42 Aŋ Yeecüwa kiinne ogo, "Yeecüwa, paydaa naana Ïkï äätädä Yätkïtïn yüünü ti ye."

43 Aŋ luuki Yeecüwa ogo, "Ïkï kiineni a gïtken, ïkï bi ke Ika tiññaŋ polloŋ jï."

44 Aŋ wääna äŋ yuuttee kä ṭeejjük ye, i mïïllä ŋommañ äätte wic muure ke äŋ waŋe näŋe ḍäk. 45 Aŋ äŋ waŋe mïïldïn, aŋ burŋu yaana a daaŋjïnï änlaṇṇä jï ye, jeññä gïtï ṭeejjük pïlke kä yewwe. 46 Aŋ Yeecüwa yaajjin kä yaac ogo, "Wäyo, wääktäŋ yeeni müükkenii kä ïnkü ti." Aŋ wääna jaajjenee kä aŋŋi ye, Ike tüwnü.

47 Aŋ wääna nääŋkä yaakka yoorene daa kä ḍuuŋgon kääygä yen mä Ruumaan ye, i mäŋjin Jooŋ ti ogo, "A gïtken, men yaanni a men wotconḍe." 48 Aŋ ṭoŋ yaaka bilti aŋ yuṭṭu nääŋkä yaakka ye, ḍukcin i juuggen jiipä. 49 Aŋ m'aka Yeecüwa ŋäjjänä ye, ke määngä yaaka Ike bäädänä ŋäc baan mä Jalïïl ye, nääŋkä yaakka däämmätä kä utar.

50 Aŋ mäŋkalaŋ äätin battä me ogo Yuucip, ike a baŋ yen gütoni yaŋkalaŋ, aŋ ike a män ŋerrä aŋ wodaŋ. 51 Ike yaakkä kä waŋ ke nääŋkä yaaka naŋi meken ye, ike a män Raama baan yen Yühüüṇṇï, aŋ ike a Yätkïtïn yen Jooŋ ken keeye. 52 Aŋ ike äätin Biilaatuc ti aŋ ñujjin ogo Yeecüwa gaane. 53 Aŋ gämmene ïñï kaakkon jok aŋ paarre yok kä burŋu, aŋ ḍoocce kääl a tooton ṭuumpok, aŋ batta a jïkon kä men ääŋkalaŋ. 54 Aŋ a nïïnnä yaana tutene me yoken ye, aŋ cokilin ti Äŋ jïñe Wääktäŋ ti.

55 Aŋ määngä yaaka Yeecüwa bäädänä kä Jalïïl ye, Yuucip bäädi ŋäc, aŋ kääl yoori ke nänṭä yaana määrcene me gaan ye. 56 Aŋ iken ḍukcin paa aŋ näŋŋä jengä pïlkä ke ällin, yaaka ṭäkkänä tükcütü Yeecüwa gaane ti ye. Aŋ yoken yïïkkï Äŋ jïñe Wääktäŋ ti kä jiik ïïnïnï.