1 Aŋ Yeecüwa jaajjin baaddoni yeeke ti ogo, "Puuccin kä nääŋkä yaackä äätïdï a jïñe aŋ jooññu m'ana äätete puuccin ye ti. 2 Aŋ päjjïdï naana ḍikkänä me ḍok päämḍeynä aŋ yeepänä me koon mooye jï, kä yaana merkälen lïcken pugeeda kä ḍugin kä nääŋkä yaackä ye. 3 Aŋ waŋgic tïïce kä gin'a naŋde ye. Naana määdic näŋŋä yiñ ye i gerä aŋ naana ḍaŋŋä kä nääŋkä yaackä ye i kulku. 4 Aŋ naana näŋŋä yiñ ääŋke kä ŋaṭükel äŋ jïñe keellä ti aŋ ḍüükïdï ïkï ti aŋ jaay ogo, ‘Ika ḍaŋŋä kä nääŋkä yaackä ye,’ i kulku."

5 Aŋ tüüjgï jaajjin Pïṭo ti ogo, "Luggin yoono ŋucku ti."

6 Aŋ Pïṭo luukcin ogo, "Naana ikee cääygene kä luggin bata käwcan jallä, aŋ jaan yaanni kiine ogo, ‘Yorü puudu woo, aŋ cuutci ïñï koon mooye jï ye,’ i ikee bi tiiŋge!

7 "Naana mäŋkalaŋ ikee ti cääyge ñuugulo ätä yiil jï halla kaaynä käbälgä ti ye, yoku kiingä men yeene mooye ogo, ‘Äätä aŋ cääjjä ïñï aŋ ämï’? 8 Ba'ay! Yoku kiine ogo, ‘Tutkaa ginäämkä aŋ yorü yukku aŋ ñuugulaa, dalä ika ämä aŋ mätä. Aŋ wäättan ïkï bi ämä aŋ mätä ṭeṭaŋ.’ 9 Aŋ ike yoku ñuugulo maaŋe yok kä yaana ike tiiŋgene daa ingin yeene ye? Ba'ay. 10 Aŋ a yuudu keellä ikee ti naana ikee näŋŋe gin'a eenjene kä me muure ye, i ikee bi jaaye ogo, ‘Ikoon agon kiinkä yaaka batta päjjïdï ye. A ñuugula yoono ken naŋŋon pare.’"

11 Aŋ wääna Yeecüwa atee kä Oorcalïïm ye, Ike ḍakkä ti kewnä waadgä Jalïïl ke Caamira ti. 12 Aŋ wääna kaaccedee kä tooyle jï ye, Ike purjin ke ook kä caay näkä jaan. Aŋ yuuttu kä utar, 13 aŋ bäärä ogo, "Ïkï men mooye, Yeecüwa, ängoon ŋïngïn!"

14 Aŋ Ike däämjin iken ti, aŋ kiinne ogo, "Ate aŋ ḍuuggic nüütke woo mä däŋkä." Aŋ wääna attene kä ye, iken yoken lattä woo kä jaan.

15 Aŋ yaŋkalaŋ iken ti wääna yuṭṭee kä ṭeññä ye, i ike ḍukcin ŋäjäk Yeecüwa ti, aŋ yaaw kä yaac kä maaŋŋä Jooŋ ti! 16 Aŋ waŋge kümjene ïñï Yeecüwa ñome ti aŋ maaŋŋe yok kä gin'a näŋgeneeda kä ye, aŋ oon yaanna a män Caamira.

17 Aŋ Yeecüwa tääccin ogo, "Ika batta läätcänä yokïn woo ook kä caay? Aŋ wali m'aka kä waŋäḍeŋ ye? 18 Baati m'ana ḍüükïdï aŋ Jooŋ maaŋe yok ye, a boorgon yaanni pare?" 19 Aŋ ike kiini ogo, "Juwu aŋ atä, luggin yüünü ïkï mäkkeney."

20 Aŋ taaji Pïrrïcïïnnï ogo, "A tooku ken bi äätene Yätkïtïn yen Jooŋ?"

Aŋ luukke ogo, "Yätkïtïn yen Jooŋ batta äätïdï kä päy yaana yoottu me ye. 21 Aŋ me batta bi jaajjï ogo, ‘Inni winni,’ halla, ‘Ïya wïca,’ aŋ Yätkïtïn yen Jooŋ bilteen waadgic ti."

22 Aŋ baaddoni yeeke kiinne ogo, "Nïïnkä bi ätä naana ikee ṭäke ogo ikee yurce nïïnnä yaŋkalaŋ yen Minneni Mänbaan ye, aŋ batta bi yoore. 23 Aŋ mäbaan ikee bi kiiṇte ogo, ‘Däämje wïca,’ halla, ‘Däämme winni,’ aŋ ŋana ikee ate aŋ bäätcede. 24 Bata yaana wïldïn wïldedee aŋ dikcedee polloŋ taaŋŋe kalaŋ ti ke taaŋŋe kalaŋ ti ye, bi wäätï nïïnnä Minneni Mänbaan ti naana Ike ätä ye. 25 Aŋ Minneni Mänbaan por bi wääcï wakkä ḍiirken, aŋ bi tuucu yok kil yaanni.

26 "Aŋ bata yaana nïïnkä Noo ti ina cäänna bi beeljï nïïnkä Minneni Mänbaan ti. 27 Aŋ nïïnkä yaakca ti me ämï aŋ mätï aŋ iken ḍïjï aŋ ḍeygä me, ke Noo kaace kuun jï, aŋ tääl mooye äätin aŋ iken muure ḍüümme gïtï.

28 "Aŋ cäänna a yuudu keellä ke nïïnkä Luut ti, iken ämï aŋ mätï, aŋ kïjï aŋ yääjï, aŋ pïïtï aŋ bätï. 29 Aŋ nïïnnä yaana Luut Caduum daljeneeda ïñï ye, maañ ke cägärey puukin ïñï polloŋ jï, aŋ iken muure ḍüümme gïtï. 30 Aŋ bi wäätï aŋan daa nïïnnä yaana bi üükene woo Minneni Mänbaan ye. 31 Aŋ nïïnnä yaanja ti baati m'ana cääy daaŋ yeene wic, aŋ wakkä yeeke a äräk, aŋ kaacï ïñï ogo koowje ye. Aŋ cäänna baati m'ana cääy yiil jï, aŋ ḍukcï ŋäjäk ogo ginkalaŋ ye. 32 Päjje iiŋ yen Luut. 33 M'ana püccïdï ogo üṇṇü yeene tïïjje ye, i bi yääye, aŋ m'ana üṇṇü yeene yääyne ye, i bi mäkke. 34 Ikee kiine, mïïllä jïñe yaanja ti mäkkalaŋ kä yewwe bi a ootin bür keellä ti, aŋ keelok bi koowgu me aŋ yaŋkalaŋ bi mañjänä me ïñï. 35 Määngä kä yewwe bi ḍïjï päk nänṭä keellä aŋ keelok bi koowgu me aŋ yaŋkalaŋ bi mañjänä me ïñï. 36 Aŋ ook kä yewwe bi ñuugal yiil jï, keelok bi koowgu me aŋ yaŋkalaŋ bi mañjänä me ïñï."

37 Aŋ kiini ogo, "Pïṭo, kä wa?"

Aŋ kiinne ogo, "Nänṭä yaana gin tüwon bilti ye, i weñgä yoken ḍültü wïca."