1 Aŋ määngä murjin woo kä tïṇṇäŋänä nïïnnä yaana ïïccete ti nïïnnä ŋaṭükel ye ti, ädit jengä pïlkä, yaaka naŋi icä kääl wic ye. 2 Aŋ pääm kañi a ḍüljïnï woo kääl tük. 3 Aŋ iken kaaccä, aŋ Pïṭo Yeecüwa gaane batta agene kä wääton käälok. 4 Aŋ wääna witken agene kä ḍïïktïnï ye, ook kä yew üükïn woo yudok gurken ti eŋit buruŋgu gäldïdï.

5 Aŋ iken ṭeŋgin aŋ waŋgen kümjï ïñï ŋommañ jï, aŋ kiini ook ogo, "M'ana a üdon ye maawe mä tüwïn gïtï ina? 6 Ike baati winni, juwin ñaalok tüwnü ti! Jiik yeeke pajje wääna kiinne kä i mor cääye kä nänṭä keellä Jalïïl ina. 7 Aŋ Ike jaajjin ogo, ‘Ääŋkalaŋ Minneni Mänbaan bi ḍïmjï mä yaackä ïnken ti, aŋ bi ṭeljänä ti kaakkon jok, aŋ nïïnkä kä ḍäk bi juwu ñaalok tüwnü ti ŋuca.’"

8 Aŋ jiik yeeke pajji. 9 Aŋ wääna iken ḍuukene kääl wic ye, baaddoni yaaka kä caay wiñen kä keelok ye, päkki wakkä muure ke mäkkalaŋ. 10 Aŋ iken a Märïyam yen mä Majdalïïna ke Aanna ke Märïyam yaana a Yaagüüp meen ina, ke määngä yakkalaŋ yaaka tüüjgï nüütkï kä gin'a näŋŋä ḍoŋe ye. 11 Aŋ iken batta lüggïdï kä jiik määngä ḍoocu bata gin'a a jiik'a a waanjï ye. 12 Aŋ Bütürüc juwin aŋ bännä kääl wic, aŋ wääna gääŋjenee kä ïñï ye, buruŋgu yaaka jïgene daa kä me ye yooṭṭe ïñï gïtken ladaŋ. Aŋ ike ḍukcin i wiñe a ḍïïktïnï kä nääŋkä yaaka näŋŋä ḍuuggen ye.

13 Aŋ nïïnnä yaanna ti baaddoni yek Yeecüwa yakkalaŋ kä yew atï tooyle yaana battä me ogo Amuuc ye ti, aŋ waan Amuuc ke Oorcalïïm nääkïdï äŋkä waŋgen kä yew. 14 Aŋ iken a nääŋkä yaaka näŋŋä ḍuuggen ye ken jaaygä waadgen ti. 15 Aŋ wääna jaayene kä jiik yaakka ye, i Yeecüwa kä ḍoŋe iken wäädi ŋätin, aŋ attene kä, 16 aŋ waŋgen mïïldïn aŋ batta ookcutu gïtï.

17 Aŋ tääckene ti ogo, "Ikee jaaye ogo ŋaaka tiññani i ikee ääte aŋŋi?"

Aŋ yuuttu ïñï i iken anaŋ. 18 Aŋ luugi yaŋkalaŋ battä me ogo Kilipaac ogo, "A Ïkï parü ken agä willä Oorcalïïm jï, nääŋkä yaaka näŋŋä ḍuuggen nïïnkä yaakki ti winni ye kuju?"

19 Aŋ taaji Yeecüwa ogo, "A ŋaaka ken näŋŋä ḍoŋe?"

Aŋ luugi ogo, "A waak'a näŋŋä ḍuuggen Yeecüwa yen mä Naacira ti yaana a bäṭo teyconḍe lïïṭït kä jiik ke nääŋkä Jooŋ ñome ti ke mäbaan muure ñomgen ti ye. 20 Aŋ müükkï ḍuuŋku däŋkä ke woydoni yooko mügdoni yek mä Ruumaan ogo joojjï jooññu tüwnü, aŋ ṭelji ti kaakkon jok. 21 Aŋ ḍoojon ogo m'ana bi mä Icärayiil määgee woo ye. Yaakka muure näŋŋä ḍuuggen nïïnkä yaaka kä ḍäk ḍakkä yaakca ti.

22 "Aŋ määngä yooko yakkalaŋ murjin woo kääl wic kä tïṇṇäŋänä aŋ ikoon ḍiigonon witin. 23 Aŋ gaane batta agene wääton, aŋ iken äätin aŋ ikoon nüütkonon ogo iken yuṭṭo malaŋŋi yakkalaŋ üükono woo, aŋ iken kïïnnïï ogo Yeecüwa däämo. 24 Aŋ muggo yakkalaŋ attä kääl wic, aŋ daa wääti bata yaana jaajjene määngä ye. Aŋ Ike batta agene kä yoorgon."

25 Aŋ iken kiini Yeecüwa ogo, "Yoore por amkïtïnïc aŋ lüynü juuggic kä yaana batta luggede kä jiik muure yaaka jaayi bäṭoni ye. 26 Batta a bargon ogo Macii bi wääco wakkä yaakki muure aŋ wäättan kaaco ti gällä yeene ti?" 27 Aŋ iken nüütkï Yeecüwa jiik pergin yek Müüca ke bäṭoni muure, aŋ ŋüülgene gïtï waak'a a pergin Meeŋka Jiik Jooŋ jï ye muure, ke wakkä yaaka jayok kä Ike ye.

28 Aŋ wääna cokulene ti tooyle yaana umkutu ye ti, i Yeecüwa yore gääññe ogo Ike atce ñomuk. 29 Aŋ Ike erdi kä yaac aŋ kiini ogo, "Cääyïn nänṭä keellä winni, äŋ waŋe bunnu nänṭä aŋŋa biigin ti!" Aŋ Ike attä cäyok ke iken.

30 Aŋ wääna cääjjene ïñï amma ti ye, i Ike kuññu biŋŋan aŋ ŋüülkene aŋ wiṇṇe gïtï, aŋ wäättana iññeeda. 31 Aŋ waŋgen pättä woo aŋ ŋïjï ogo Ike, aŋ wïïccä ïñï waŋgen ti.

32 Aŋ iken wäättan tääjä pääken ogo, "Aŋ gula batta ina juuggo cäärene woo wääna nüütkïdï kä päy jï Meeŋka Jiik Jooŋ jï ina?"

33 Aŋ iken juwin ñaalok kä bïraŋ aŋ ḍukcin Oorcalïïm, aŋ baaddoni yaaka kä caay wiñen kä keelok ika, wääti yoken agene ḍülgïn nänṭä keellä ke mäkkalaŋ wïca. 34 Aŋ iken jayok ogo, "A gïtken, Pïṭo juwin ñaalok tüwnü ti! Aŋ yore nüütkene woo Camaan." 35 Aŋ iken muuṭuk nüütcïn kä gin'a näŋŋä ḍoŋe päy jï ye, aŋ Yeecüwa ŋïjï wääna wittee kä gïtï biŋŋan ina.

36 Aŋ wääna iken jaayene kä jiik yaakka ye, Yeecüwa kä ḍoŋe üükïn woo waadgen ti aŋ iken kiini ogo, "Ŋïïbbïn wäätï ke ikee!"

37 Aŋ iken ṭeŋgin aŋ bojgin, aŋ ḍüücï ogo iken yuṭṭo callï. 38 Aŋ taaññe ogo, "Ikee näke liin ina aŋan? Aŋ ikee juuggic riijä aŋan ina? 39 Yoore ïnkï ke kïïgï, a Ika inni. Taba yok aŋ ooka gïtï. Callï batta cääygene gaan ke äwgä, bata yaana yoodda kä cääygana kä yaanni."

40 Jaajjin aŋan aŋ nüütkene ïnke ke kïïge. 41 Aŋ kä ñammä juuggen ke ḍiiktin witken iken batta por lüggïdï ogo Ike. Aŋ tääckene ti ogo, "Ikee cääygene kä ginäämkä winni?" 42 Aŋ iñi yakcan eegon, 43 aŋ koowne aŋ amme iken ñomgen ti.

44 Aŋ kiinne ogo, "A iken ikki jiik'a kiinne kä wääna biltä kä ti ke ikee ina. Aŋ yaakki bi ḍääkï yaaka a pergin ogo Ika jiik ḍoocin yek Müüca jï, ke bäṭoni ke meeŋka uulgu jï muure ye."

45 Aŋ kupkene witin ogo Meeŋka Jiik Jooŋ ookcï gïtï. 46 Aŋ kiinne ogo, "A pergon aŋŋi, ogo Macii bi pillä näkkee aŋ bi tüwo aŋ nïïnkä ko ḍäk bi juwo ñaalok tüwnü ti. 47 Aŋ kä yäṇtonḍe, ṭoŋ muure bi päkkänä me kä ḍaŋŋä kä nääŋkä yaackä, aŋ iken bi kulke ḍugin, aŋ bi ïïjjï ti kä Oorcalïïm. 48 Aŋ a ikee ken age mä yuṭin yek waak yaakki.

49 "Ika atä ikee tuckede gin'a ircene kä Wäyo ye, aŋ cääye baan mooye jï ke ääte kä me yok kä teynä yaana ñaalok polloŋ jï ye."

50 Aŋ baaddoni yeeke woojjene woo iññe baan yaana battä me ogo Betani ye ti, aŋ ïnke lajjene ñaalok aŋ ŋüülkene. 51 Aŋ wääna ŋüülkeneeda kä ye, yore keppe woo iken ti, aŋ küülï ñaalok Jooŋ iññe polloŋ jï. 52 Aŋ Ike maaŋi, aŋ iken ḍukcin Oorcalïïm i juuggen ñabaŋ kä yaac. 53 Aŋ iken Jooŋ maaŋgä kaal yen änlaṇṇä jï kamat.