1 Aŋ Yeecüwa ḍuku wii yen mä Üürdün, i Ike a küümon kä Wääktäŋ Laṇṇä yen Jooŋ, aŋ iji Wääktäŋ woo teettälaŋ 2 nïïnkä caykä kä ŋan, i puuccutu booŋïn, aŋ ke nïïnkä yaakca pääreeda i batta a ämon ginkalaŋ aŋ wäättana näägi käñ. 3 Aŋ kiini booŋïn ogo, "Naana ïkï agä Minneni Jooŋ ye, pääm yaanna kiinä dalä wäätï a biŋŋan."

4 Aŋ luugi Yeecüwa ogo, "A pergon Meeŋka Jiik Jooŋ jï ogo, ‘Batta a ginäämkä pare ken mänbaan ḍooje.’"

5 Aŋ iji booŋïn nänṭä küüllü, aŋ nüütkene waak yätkïtïnnï yek ŋommañ wiñe muure kä waan keellä. 6 Aŋ kiini booŋïn ogo, "Gällä ke mügdïnnï yaakki bi iñenii kä muure nääŋka agene kä yeeki ye, aŋ iñdä m'ana ṭäkkä ye. 7 Aŋ naana ika maaŋja ye, bi wäätï a yüükü muure." 8 Aŋ luugi Yeecüwa ogo, "A pergon ogo,

‘Pïṭo Jooŋ yüünü ken maaŋä,

aŋ ken ḍüŋgüdü ïñï pare.’"

9 Aŋ koowi booŋïn iññe baan mä Oorcalïïm ti, aŋ yuutte änlaṇṇä yen Jooŋ leŋŋe ti ñaalok. Aŋ kiinne ogo, "Naana, ïkï agä Minneni Jooŋ ye, ḍoŋü yeepci ïñï. 10 A pergon Meeŋka Jiik Jooŋ jï ogo,

‘Malaŋŋi yeeke bi iingee jiik ogo ïkï, aŋ ïkï bi tïïjjïda,

11 aŋ ïkï bi ḍürdïda ñaalok ïnken ti,

nuŋko ŋana tojdïda ko pääm kïyü ti.’"

12 Aŋ luugi Yeecüwa ogo, "Meeŋka jaay ogo, ‘Pïṭo Jooŋ yüünü ŋana puuccudu.’" 13 Aŋ wääna booŋïn ḍaŋŋee kä puuccin muure ye, i Ike dalibuw ke waan kalaŋ ti.

14 Aŋ Yeecüwa ḍuukin Jalïïl a küümon kä teynä yen Wääktäŋ Laṇṇä, aŋ jiik pakin ogo Ike ḍakkä bänkälen gïtï muure. 15 Aŋ Ike nüüttü me daaŋmallä yen Yühüüṇṇï jï, aŋ maaŋi yokïn iken muure.

16 Aŋ wääna äätenee kä Naacira tooy yaana pïrree kä jï ye, i Ike attä daaŋmallä yen Yühüüṇṇï jï nïïnnä Äŋ jïñe Wääktäŋ ti bata kamat, aŋ Ike yuuttu ñaalok päkï. 17 Aŋ iñi me meeŋka yen bäṭo Ïcaaya, aŋ wääna meeŋka kupkeneeda kä ye, käññä nänṭä, yaana a pergon ogo,

18 "Wääktäŋ Pïṭo ke Ika,

aŋ Ika cüñña yok ogo aangï päkkodoo Jiik Ŋerkä,

Ika tuujana ogo m'aka cääygo gaŋgar jï ye teetco woo,

aŋ uykuni pädjo waŋgin,

aŋ mä piikin teetco woo,

19 aŋ Ika päkco ogo waan yen ŋerrä Pïṭo ḍäägono."

20 Aŋ Yeecüwa meeŋka üüljene aŋ ḍuukkene ñuugulo, aŋ cääjjin ïñï. Aŋ m'aka cäyok daaŋmallä yen Yühüüṇṇï jï ye, däämjin Ike ti muure. 21 Aŋ Ike jujjin kä jiik iken ti ogo, "Tiññaŋ Meeŋka Jiik Jooŋ yaaka tiiŋŋe yaakki, näŋŋä ḍuuggen ñomgic ti." 22 Aŋ me muure jaajjin kä jiik ŋerkä kä Ike, aŋ witken ḍiiktin kä jiik ŋerkä yaaka jääyede woo lemme ti ye. Aŋ iken tääccin ogo, "Batta a Minneni Yuucip halla?" 23 Aŋ Ike jaajjin iken ti ogo, "A gïtken gäärrä yaanni bi ŋoce kiina kä ogo, ‘Ṭiiño, ḍoŋü ṭeeñä! Näŋä nääŋkä yäwkä baan yüünü jï, bata yaaka naŋŋi Kaparnahuum ye.’ 24 Aŋ ikee kiine a gïtken, baati bäṭo yaana a gïmgïnï baan yeene jï ye. 25 Aŋ ikee kiine a gïtken, yuungu yaaka bäṭo Ïlïya biltee kä ti ina mä Icärayiil boroni yeeken ḍiräk, aŋ ñaal yuuttu ïñï kä mäṇṇä yuungu kä ḍäk, aŋ pankä kä ḍüügük, aŋ baan jïñe muure nägi käñ kä yaac. 26 Aŋ Ïlïya batta a tucon iken ti, tuci me boro yaŋkalaŋ ti Cerpaat nänṭ'a battä me ogo Cïdoon ye jï. 27 Aŋ waan yaana bäṭo Ïlaaca biltee kä ti ina m'aka näkä jaan ye, ḍiräk Icärayiil, aŋ baati m'ana a ṭeñon ye, a Niimaan yen mä Cüürïya pare ken yore lattä woo."

28 Aŋ wääna me muure biltene ti daaŋmallä yen Yühüüṇṇï jï, aŋ tiiŋŋene kä jiik yaakka ye, i me piindin kä yaac. 29 Aŋ me juwin ñaalok, aŋ mügï me olcutu me woo baan jï, aŋ aajjene ñaalok tulluŋ pääm yaana agene bäton kä baan yeenen ye, ogo yoku yeepcï ïñï wïca. 30 Aŋ Ike kaaccä woo waadgen ti aŋ ḍakkä kä päy yeene.

31 Aŋ Ike attä Kaparnahuum, baan mä Jalïïl ti, aŋ jujjin kä nüüṇṇü me nïïnnä Äŋ jïñe Wääktäŋ ti. 32 Aŋ iken witken ḍiiktin kä yaac kä nüüṇṇü yeene, nääŋka jaayee kä teynä ye.

33 Aŋ wääna Ike biltee ti daaŋmallä yen Yühüüṇṇï ti ye, i oon yaŋkalaŋ cääyge wääktäŋ yaaññä yen meŋkeeke, aŋ yaajjin kä yääw mooye ogo, 34 "Kaacci woo ay! Yeecüwa yen mä Naacira a ŋaaka ken ṭäkkä ikoon ti? Ïkï äätädä nääkä ikoon? Ïkï ŋäjjeni Ïkï agä ŋaani, Ïkï agä Män Laṇṇä yen Jooŋ!" 35 Aŋ geri Yeecüwa ogo, "Tiiŋjä ïñï aŋ kääjä woo ike ti!" Aŋ meŋkeeke oon yeeppe ïñï ñomgen ti aŋ wäättana kääjin woo i batta agee kä ïckïdïnï.

36 Aŋ iken muure witken ḍiiktin aŋ wäättana tääjä pääken ogo, "Jiik yaakka bi a ŋaaka? Ke teynä ke mügdïn yaana ingedee kä wääktäŋŋi yaackä aŋ kääcete kä woo yaakka!" 37 Aŋ jiik yeeke piirjin woo baan jï muure.

38 Aŋ Yeecüwa daaŋmallä yen Yühüüṇṇï mañjene ïñï, aŋ attä paa ba' Camaan. Aŋ Camaan marayḍe wäätte yore ääṭï, aŋ Yeecüwa ñujgi me yok ogo ṭeeñje. 39 Aŋ wükcïn ti ike ti, aŋ yor äärtäŋene gerre, aŋ kaaccä woo ike ti. Aŋ iiŋ juwin ñaalok kä nänṭetinä, aŋ jujjin kä ñuugulin iken. 40 Aŋ wääna äŋ joorjenee kä ye, me duurin ääcin rackä Yeecüwa ti, aŋ mäŋkalaŋ daa kä rackïtïn yaana biilke a pare ye, aŋ ïnte ḍooccede witken ti aŋ ṭeeññe. 41 Aŋ meŋkeekeni kääjin woo rackä ḍiirken ti i yawok ogo, "Ïkï agä Minneni Jooŋ!" Aŋ geri Yeecüwa aŋ ṭïïge kä jiik, nääŋka ŋïjene daa kä agee kä Macii ye.

42 Aŋ kä kääjin äŋ Yeecüwa murjin woo teettälaŋ. Aŋ maawgä me, aŋ wääna kañene daa kä ye, i ñujgi yok ogo ŋana iken daljïdïï ïñï. 43 Aŋ kiini Yeecüwa ogo, "Ika ṭäkä päkä Jiik Ŋerkä yek Yätkïtïn Jooŋ bänkä yakkalaŋ ti cäänna, aŋ a yaaka tuujana kä ye ikki." 44 Aŋ Ike attä me päkkede Jiik Jooŋ däŋkämalläni yek Yühüüṇṇï ti baan mä Yühüdïya jï muure.